Read Hmong Njua 1 Kauleethaus 9 Bible Online

1 Kauleethaus 9 - Hmong Njua bible

1 Kauleethaus 9

¹Kuv tsi muaj cai los? Kuv tsi yog timthawj los? Kuv tsi tau pum Yexus kws yog peb tug Tswv los? Qhov kws mej tau lug ntseeg tug Tswv tub yog vim kuv qha mej ntaag.

²Txawm yog lwm tug tsi leeg has tas, kuv yog ib tug timthawj los tsimnyog mej leeg kuv! Qhov kws mej nrug tug Tswv koom ib txujsa, qhov ntawd ua timkhawv has tas kuv yog ib tug timthawj tag.

³Thaus muaj tuabneeg thuam kuv, kuv has dlaws kuv zaaj le nuav:

⁴Kuv txawm tsi muaj cai noj hab haus vim teg num kws kuv ua le los?

⁵Petus hab txhua tug timthawj, puab puavleej muaj cai coj quaspuj mivnyuas nrug puab moog rua nuav rua u. Kuv yeej yog ib tug timthawj hab, kuv txawm tsi muaj cai le puab los?

⁶Tsuas yog Npananpas hab kuv, wb txhaj yuavtsum tau nrhav rua wb noj wb haus xwb los?

⁷Tug kws moog ua tubrog nwg tseem nrhav rua nwg noj nwg haus hab los? Tug kws cog txiv maab, nwg txawm tsi dle nwg cov txiv maab noj los? Tug kws yug yaaj, nwg txawm tsi tsu nwg cov yaaj tej kua mig haus los?

⁸Puas yog kuv has lawv le tuabneeg ibtxwm has? Puas yog Vaajtswv txuj kevcai has ib yaam le nuav hab?

⁹Muaj lug sau tseg rua huv Mauxes txuj Kevcai has tas, “Thaus mej taabtom muab nyuj tsuj nplej, mej tsi xob muab naab looj nyuj qhovncauj.” Puas yog Vaajtswv txhawj nyob tsaam nyuj tsi tau noj?

¹⁰Vaajtswv has le ntawd, tsi yog Vaajtswv has txug peb los? Tub yog Vaajtswv has txug peb ntaag. Tug kws laij teb hab tug kws ntaus nplej, obtug yeej ca sab has tas obtug yuav tau qoobloo sis npaug.

¹¹Yog peb tub tseb Vaajtswv txujlug rua huv mej lub sab lawm, yog le ntawd peb sau mej tej zaub tej mov lug yug peb, mej tseem has tas peb sau ntau dlhau lawm los?

¹²Yog lwm tug tub muaj cai kuas mej yug puab, yog le ntawd peb hajyam muaj cai kuas mej yug peb hab. Txawm yog le caag los peb yeej txhobtxwm tsi sau mej tug. Peb ua sab ntev nyaj txhua yaam kev txomnyem txhaj yuav tsi muaj ib yaam dlaabtsi lug taabkaum txuj Txujmoo Zoo kws has txug Yexus Khetos zaaj.

¹³Mej yeej paub has tas cov kws ua num huv lub Tuamtsev, puab yeej tau tej zaub mov huv lub Tuamtsev noj, hab cov kws hlawv khoom fij ntawm lub thaaj, puab yeej tau tej ntawd noj.

¹⁴Ib yaam nkaus le ntawd, tug Tswv qha has tas tsimnyog cov tuabneeg kws ntseeg txujmoo zoo yuavtsum yug tug kws tuaj qha Txujmoo Zoo.

¹⁵Tabsis kuv yeej ibtxwm tsi sau mej tug. Txawm yog kuv sau tsaab ntawv nuav tuaj rua mej los kuv tsi tau kuas mej yug kuv. Yog kuv yuav thov mej yug kuv, yeem ca kuv tuag zoo dlua. Yeej tsi muaj leejtwg yuav muaj cuabkaav thuam tej lug kws kuv khaav has tas kuv tsi thov mej yug kuv.

¹⁶Kuv yog tug qha Txujmoo Zoo los kuv yeej tsi muaj cai khaav hlo le. Rua qhov Vaajtswv kuas kuv qha. Yog kuv tsi qha Txujmoo Zoo, kuv yeej yuav raug kev puamtsuaj.

¹⁷Yog kuv yeem ua teg num ntawd, kuv yeej yuav tau nqe zug. Txawm yog kuv tsi yeem ua los teg num ntawd yeej yog kuv teg.

¹⁸Yog le ntawd kuv tau nqe zug dlaabtsi? Kuv tej nqe zug yog qhov kws kuv qha Txujmoo Zoo, kuv tsi thov leejtwg ib yaam dlaabtsi le. Thaus kuv moog qha Txujmoo Zoo, kuv yeej muaj cai thov suavdlawg yug kuv tabsis kuv tsi thov.

¹⁹Kuv yeej tsi ua leejtwg qhev; tabsis kuv zoo sab ua suavdlawg qhev, kuv txhaj yuav coj tau tuabneeg coob leej lug ntseeg Yexus Khetos.

²⁰Thaus kuv nrug cov tuabneeg Yudais nyob ua ke, kuv ua ib yaam le puab, rua qhov kuv xaav coj puab lug ntseeg. Txawm yog Mauxes txuj kevcai tsi muaj cuabkaav yuam kuv lawm los thaus kuv nrug cov tuabneeg kws xyum coj lawv le Mauxes txuj kevcai nyob ua ke, kuv ua ib yaam le puab, rua qhov kuv xaav coj puab lug ntseeg.

²¹Thaus kuv nrug lwm Tsaav Tuabneeg nyob ua ke, kuv ua ib yaam le tug kws tsi coj cov Yudais kevcai, rua qhov kuv xaav coj lwm Tsaav Tuabneeg lug ntseeg. Kuv has le nuav, tsi yog kuv has tas kuv tsi coj Vaajtswv txuj kevcai, tabsis qhov tseemceeb kuv yeej coj Yexus Khetos txuj kevcai.

²²Thaus kuv nrug cov tuabneeg kws tsi tshua paub Vaajtswv pistsawg nyob ua ke, kuv ua ib yaam le puab, kuv txhaj coj tau puab lug ntseeg. Kuv naj nub xyum ua ib yaam le txhua tsaav tuabneeg ua. Kuv ua le ntawd saib puas yuav paab tau qee leej lug ntseeg.

²³Kuv ua txhua yaam nuav kuas Txujmoo Zoo nrov nchaa moog thoob txhua qhov, kuv txhaj tau koob moov.

²⁴Mej yeej paub has tas cov tuabneeg kws sis tw dlha yeej tuab txhij dlha, tabsis tsuas muaj tuab tug txhaj dlha yeej hab tau nqe zug xwb. Mej ca le dlha tag kuas yeej, mej txhaj tau nqe zug.

²⁵Txhua tug kws sis tw dlha, nwg naj nub xyum dlha lawv le txuj kevcai, nwg ua le ntawd los nwg tsuas tau lub mom kws nyob tsi ntev xwb; tabsis peb sis tw dlha kuas peb tau lub mom kws nyob moog ibtxhis.

²⁶Tub yog vim le nuav kuv txhaj dlha ncaaj nraim moog kuas txug tug nrim tom kawg; hab tub yog vim le nuav kuv txhaj ua le tug kws txawj ntaus nrig, nwg tsi laam ntaus qhuav xwb.

²⁷Kuv naj nub tswj rawv kuv lub cev, rua qhov kuv yeej yog tug kws qha lwm tug. Yog kuv tsi tswj kuv lub cev, ntshai nyob tsaam kuv tsi tau nrug luas sis tw dlha.