Read Hmong Njua 2 Kauleethaus 1 Bible Online

2 Kauleethaus 1 - Hmong Njua bible

2 Kauleethaus 1

¹Kuv yog Paulus tug kws yog Yexus Khetos ib tug timthawj lawv le Vaajtswv lub sab nyam, hab Timautes kws yog peb tug kwv, sau tsaab ntawv nuav tuaj rua cov ntseeg Vaajtswv kws nyob huv lub nroog Kauleethaus, hab cov ntseeg Vaajtswv txhua tug kws nyob thoob plawg huv lub xeev Akhayas:

²Thov Vaajtswv kws yog peb leej Txiv hab Tswv Yexus Khetos foom koob moov rua mej hab pub kuas mej tau nyob kaaj sab lug.

³Peb ca le ua Vaajtswv kws yog peb tug Tswv Yexus Khetos leej Txiv tsaug, leej Txiv tug kws yog Vaajtswv, nwg hlub peb hab txhawb peb tug zug.

⁴Nwg txhawb peb tug zug thaus peb raug txhua yaam kev nyuaj sab, kuas peb txhaj txhawb tau lwm tug tug zug thaus puab raug tej kev nyuaj sab, peb txhawb lwm tug tug zug ib yaam le Vaajtswv tub txhawb peb tug zug lawm.

⁵Peb ua Yexus Khetos teg num, peb raug kev txomnyem ib yaam le Yexus raug; tabsis Vaajtswv yuav paab peb ib yaam le Vaajtswv tau paab Yexus lawm.

⁶Qhov kws peb raug kev txomnyem, yeej yuav txhawb tau mej tug zug, hab paab kuas mej dlim; qhov kws Vaajtswv txhawb peb tug zug, yuav txhawb mej tug zug ib yaam nkaus, kuas mej ua taug sab ntev tiv kev txomnyem ib yaam le peb tub tiv lug lawm.

⁷Yog le ntawd peb txhaj ca sab tau rua mej, rua qhov peb paub has tas, mej cov kws raug kev txomnyem ib yaam le peb, Vaajtswv yeej yuav txhawb mej ib yaam le nwg txhawb peb.

⁸Cov kwvtij, peb xaav kuas mej paub has tas, thaus peb moog peg lub xeev Axias, peb raug txomnyem heev kawg le, peb tiv yuav laug tsi taug, peb xaav has tas peb yeej yuav tuag xwb.

⁹Peb zoo le tej tuabneeg raug txim kws luas yuav coj moog tua. Tabsis ca peb raug kev txomnyem le nuav, peb txhaj tsi ca sab rua peb lub tswvyim, tabsis kuas peb ca sab rua Vaajtswv tug kws tsaa tau tuabneeg tuag sawv rov qaab lug.

¹⁰Nwg paab peb dlim ntawm txujkev tuag kws txaus ntshai heev, nwg yeej yuav paab kuas peb dlim; hab peb ca sab has tas, nwg tseem yuav paab peb moog lawm yaav tom ntej,

¹¹Rua qhov mej naj nub thov Vaajtswv paab peb. Yog muaj coob leej thov Vaajtswv paab peb, Vaajtswv yuav teb suavdlawg tej lug thov, hab Vaajtswv yuav foom koob moov rua peb; hab yuav muaj coob leej ua Vaajtswv tsaug vim Vaajtswv paab peb.

¹²Peb yeej khaav tau has tas, peb lub sab qha rua peb paub has tas, peb ua peb lub neej huv nplajteb nuav, peb ua ncaaj ua nceeg, hab muaj nplooj sab dlawb paug. Txawm yog thaus peb nrug mej nyob los mej puavleej pum le ntawd. Peb ua tau le ntawd, rua qhov Vaajtswv paab peb, tsi yog peb ua lawv le peb lub tswvyim.

¹³Tej kws peb sau tuaj rua mej, peb tsuas sau tej kws mej nyeem tau hab totaub xwb; kuv xaav has tas mej yuav totaub hauvpaug nto ntsis,

¹⁴tabsis mej tub totaub qee yaam lawm, kuv ca sab has tas mej yuav totaub txhua yaam huv tuabsi, yog le ntawd thaus txug nub kws peb tug Tswv Yexus rov qaab lug, mej yuav ua rua peb zoo sab ib yaam le peb ua rua mej zoo sab.

¹⁵Thaus kuv paub le nuav lawm, kuv txhaj xaav has tas, kuv yuav xub tuaj saib mej, kuas mej tau koob moov ob npaug.

¹⁶Kuv xaav has tas, kuv yuav tuaj saib mej thaus kuv tuaj moog peg Makedaunias, hab thaus kuv rov peg lug, kuv yuav rov lug saib mej dlua ib zag, kuas mej txhaj tau xaa kuv moog nraag lub xeev Yudas.

¹⁷Kuv tub npaaj sab tau le nuav lawm, kuv tseem yuav hloov sab hab los? Kuv puas yog ib tug tuabneeg kws has tas “Tuaj, tuaj,” tabsis tsua “Tsi tuaj” los?

¹⁸Vaajtswv yog tug ncaaj nceeg, tej lug kws kuv has rua mej tsi yog tej lug kws has tas, “Ua, ua” tabsis tsua “Tsi ua.”

¹⁹Rua qhov Vaajtswv tug tub Yexus Khetos kws Xilas, Timautes hab kuv qha rua mej, nwg tsi yog tug kws has tas, “Ua, ua” tabsis tsua “Tsi ua.” Tabsis nwg yeej ibtxwm ua le nwg has;

²⁰Rua qhov tej kws Yexus ua puavleej tav lawv le Vaajtswv tej lug cog tseg. Tub yog vim le ntawd peb cov kws ntseeg Yexus Khetos peb txhaj has tas, “Amees”, yog peb ua rua Vaajtswv tau koob meej.

²¹Vaajtswv ua rua peb hab mej paub has tas, peb nrug Yexus Khetos koom ib txujsa, hab Vaajtswv muab peb tshwj rua ib caag,

²²nwg nas cim rua peb, hab nwg pub Vaaj Ntsujplig tug Dlawbhuv lug kaav peb lub sab, ua timkhawv has tas peb yuav tau tej kws nwg npaaj tseg rua peb lawm.

²³Vaajtswv yeej paub kuv lub sab, kuv txhaj thov nwg ua kuv tug timkhawv! Qhov kws kuv tsi tuaj rua huv lub nroog Kauleethaus, tub yog kuv tsi xaav kuas mej nyuaj sab.

²⁴Peb tsi tau yuam kuas mej yuavtsum ntseeg le nuav le u; peb yeej paub has tas mej tub ntseeg lawm. Tabsis peb xaav paab mej kuas mej muaj kev kaaj sab xwb.