Read Hmong Njua 2 Kauleethaus 3 Bible Online

2 Kauleethaus 3 - Hmong Njua bible

2 Kauleethaus 3

¹Peb has le nuav puas yog peb khaavtheeb? Peb yuavtsum tau ntawv nqaa tuaj rua mej ib yaam le luas lwm tug, lossis tau ntawv ntawm mej hab los?

²Mej tub yog tsaab ntawv kws peb muab sau rua huv peb lub sab, kuas txhua tug paub hab tau nyeem ntaag los sav!

³Qhov tseeb, Yexus Khetos yog tug sau tsaab ntawv nuav hab peb yog cov kws xaa. Tsaab ntawv nuav tsi yog nwg muab kua mem sau, tabsis yog nwg muab Vaajtswv tug kws muaj sa nyob tug Ntsujplig sau, hab tsi yog sau rua ntawm tej txag zeb, tabsis yog sau rua huv tuabneeg lub sab.

⁴Peb has le nuav rua qhov Yexus Khetos ua rua peb ca sab rua Vaajtswv.

⁵Peb yeej tsi tau khaav has tas, peb muaj tswvyim ua tau teg num nuav. Qhov kws peb ua tau yog Vaajtswv pub rua peb xwb;

⁶Vaajtswv yog tug pub tswvyim rua peb qha txuj Kevcai Tshab, tsi yog txuj Kevcai kws sau rua huv ntawv tabsis yog Vaaj Ntsujplig; txuj kevcai kws sau rua huv ntawv ua rua tuabneeg raug kev pluj kev tuag, tabsis Vaaj Ntsujplig ua rua tuabneeg tau txujsa.

⁷Txuj kevcai ntawd, muab txaug ua npe ntawv rua ntawm ob dlaim txag zeb, hab thaus muaj txuj kevcai ntawd, suavdlawg pum Vaajtswv tug tshwjchim kws ci ntsaa ab. tug tshwjchim ntawd tub pluj lawm los Mauxes lub ntsejmuag tseem ci heev, cov Yixalayees yeej saib tsi taug le. Txawm le ntawd los txuj kevcai ntawd yeej yuav ua rua cov tuabneeg kws xyum ua lawv le txuj kevcai ntawd raug kev pluj kev tuag.

⁸Yog le ntawd, qhov kws suavdlawg xyum ua lawv le Vaaj Ntsujplig qha, suavdlawg hajyam yuav pum Vaajtswv tug tshwjchim kws luj dlua ntawd hab.

⁹Yog has tas txuj kevcai kws ua rua tuabneeg raug txim tub muaj tshwjchim luj npaum le ntawd; ces txuj kevcai kws ua rua tuabneeg dlim txim tseem hajyam muaj tshwjchim luj dlua ntawd hab!

¹⁰Peb has tau has tas tug tshwjchim kws nwgnuav ci ntsaa ab ntawd tub ua rua tug tshwjchim thaus u tsi ci lawm.

¹¹Rua qhov yaam kws nyob ib ntus xwb, tub muaj tshwjchim luj npaum le ntawd, ces yaam kws yuav nyob moog ibtxhis hajyam muaj tshwjchim luj dlua ntawd hab.

¹²Tub yog vim peb ca sab le ntawd, peb txhaj muaj lub sab tawv.

¹³Peb tsi ua le Mauxes kws muab ntaub npug nwg lub ntsejmuag kuas cov Yixalayees tsi xob pum nwg tug tshwjchim ci ntsaa ab kws pluj zuj zug moog ntawd.

¹⁴Tabsis puab lub sab tawv heev, txawm yog naj nub nua los thaus puab nyeem txuj qub kevcai, dlaim ntaub ntawd tseem npug rawv puab ntsejmuag le. Tsuas yog tug kws ntseeg Yexus Khetos lawm txhaj tsi muaj dlaim ntaub ntawd npug ntsejmuag lawm xwb.

¹⁵Txawm yog naj nub nua los thaus puab nyeem Mauxes txuj kevcai, dlaim ntaub ntawd tseem npug rawv puab lub sab.

¹⁶Tabsis luas tub muab dlaim ntaub ntawd yaws lawm, lawv le Vaajtswv txujlug has txug Mauxes has tas, “Thaus Mauxes tig rua ntawm tug Tswv, luas tub muab nwg dlaim ntaub kws npug Mauxes ntsejmuag yaws lawm.”

¹⁷Lu lug kws has tas tug Tswv, lu lug ntawd yog has txug Vaaj Ntsujplig, yog tug Tswv tug Ntsujplig nyob qhov twg, qhov ntawd muaj kev thaajyeeb.

¹⁸Peb txhua tug tsi muab dlaim ntaub npug ntsejmuag lawm, peb zoo le dlaim tsom av rua suavdlawg pum tug Tswv tug tshwjchim; hab tug tshwjchim kws tug Tswv pub rua peb yog Vaaj Ntsujplig, nwg muab peb hloov kuas peb muaj tug yaam ntxwv zoo zuj zug le tug Tswv tug yaam ntxwv.