Read Hmong Njua 2 Kauleethaus 4 Bible Online

2 Kauleethaus 4 - Hmong Njua bible

2 Kauleethaus 4

¹Vaajtswv hlub peb heev nwg txhaj muab teg num nuav rua peb ua, yog le ntawd peb txhaj tsi poob sab.

²Peb yeej tsi zais sab hab tsi ua tej kws yuav poob ntsejmuag; peb tsi tau dlaag ntxag leejtwg, lossis peb tsi hloov Vaajtswv txujlug. Vaajtswv yeej pum has tas peb qha tseeb xwb, peb naj nub qha tej kws yuav ua rua suavdlawg nyag paub nyag tej kev txhum.

³Rua qhov cov tuabneeg kws tsi totaub Txujmoo Zoo kws peb qha, tsuas yog cov tuabneeg kws taabtom yuav raug puamtsuaj xwb.

⁴Puab tsi ntseeg, rua qhov tug vaajtswv kws kaav nplajteb nuav ua rua puab lub sab ruag lawm. Nwg ua kuas puab tsi pum qhov kaaj kws ci tuaj rua puab, qhov kaaj ntawd yog Txujmoo Zoo kws qha txug Yexus Khetos tug tshwjchim kws ci ntsaa ab, nwg muaj tug yaam ntxwv zoo le Vaajtswv.

⁵Peb yeej tsi qha txug peb zaaj; peb qha has tas Yexus Khetos yog tug Tswv, hab peb yog mej cov tubkhai rua qhov peb ua Yexus Khetos teg num.

⁶Tug Vaajtswv kws has tas, “Qhov kaaj ca le ci huv qhov tsaus ntuj tuaj,” tug ntawd yog tug Vaajtswv kws ua kuas qhov kaaj ci tuaj rua huv peb lub sab, qha kuas peb paub Vaajtswv tug tshwjchim kws ua rua Yexus Khetos lub ntsejmuag ci ntsaa ab.

⁷Peb zoo le lub laujkaub aav kws luas muab tej yaam muaj nqes ntim rua huv, kuas suavdlawg txhaj pum lub fwjchim kws luj kawg nkaus kws yog Vaajtswv lub, tsi yog peb lub.

⁸Peb naj nub raug kev nyuaj sab, tabsis peb tsi poob sab; muaj qee zag peb kawg tswvyim, tabsis peb tsi twg kev;

⁹peb raug luas tsimtxom, tabsis Vaajtswv tsi tso peb tseg, luas muab peb ntaus qaug, tabsis peb tsi tuag.

¹⁰Peb txaus sab raug kev pluj kev tuag txhua lub sijhawm ib yaam le Yexus Khetos, kuas suavdlawg pum has tas peb ua peb lub neej ib yaam le Yexus Khetos lub.

¹¹Thaus peb tseem ua neej nyob, peb cov kws ua Yexus Khetos teg num, peb naj nub txaus sab raug kev pluj kev tuag, kuas suavdlawg pum peb ua peb lub neej ib yaam le Yexus Khetos lub.

¹²Qhov kws peb raug kev pluj kev tuag, qhov ntawd ua rua mej tau txujsa.

¹³Tabsis peb ntseeg lawv le Vaajtswv txujlug kws has tas, “Kuv ntseeg, kuv txhaj has.” Peb yeej ntseeg, yog le ntawd peb txhaj has.

¹⁴Peb paub has tas Vaajtswv tug kws tsaa Tswv Yexus sawv huv qhov tuag rov qaab lug, nwg yuav tsaa peb cov kws nrug Yexus koom ib txujsa sawv huv qhov tuag rov qaab lug ib yaam nkaus, nwg yuav coj peb hab mej moog cuag nwg.

¹⁵Ib puas tsaav yaam nuav puavleej yuav muaj nqes rua mej. Thaus muaj tuabneeg coob zuj zug nov has tas, Vaajtswv hlub suavdlawg, yuav muaj tuabneeg ua Vaajtswv tsaug coob zuj zug ntxiv ib yaam nkaus. Tej ntawd puavleej ua rua Vaajtswv tau ntsejmuag.

¹⁶Tub yog vim le ntawd peb txhaj tsi poob sab. Txawm yog peb lub cev tsaug muag zuj zug los peb lub sab tseem naj nub muaj zug ntxiv.

¹⁷Tej teebmeem miv miv kws peb raug ib nyuas ntu nuav, yuav ua rua peb tau txuj koob moov zoo kws yuav nyob moog ibtxhis, tej teebmeem kws peb raug yeej pev tsi tau txuj koob moov kws peb tau le.

¹⁸Rua qhov peb tsi muab sab npuab tej kws peb qhovmuag pum, tabsis peb muab sab npuab tej kws peb qhovmuag tsi pum. Tej kws peb qhovmuag pum tsuas nyob ib ntus xwb, tabsis tej kws peb qhovmuag tsi pum yuav nyob moog ibtxhis.