Read Hmong Njua 2 Kauleethaus 6 Bible Online

2 Kauleethaus 6 - Hmong Njua bible

2 Kauleethaus 6

¹Peb cov kws ua Vaajtswv teg num, peb ntuag mej has tas, mej tsi xob ua rua tej koob moov kws Vaajtswv foom rua mej lawm tsi muaj nqes.

²Rua qhov Vaajtswv txujlug has tas: “Thaus lub sijhawm kws kuv txaus sab rua mej, thaus ntawd kuv noog mej tej lug thov. nub kws mej dlim, yog kuv paab mej.” Mej ua tuab zoo noog kuv tej lug. Lub sijhawm nuav yog lub sijhawm kws Vaajtswv pum zoo paab mej. Nub nuav yog nub kws mej yuav dlim tau mej lub txim.

³Peb yeej tsi xaav ca leejtwg thuam tau peb teg num, peb txhaj tsi muab ib yaam dlaabtsi lug cuab leejtwg kev.

⁴Peb ua txhua yaam rua suavdlawg pum has tas, peb yog Vaajtswv cov tubkhai. Peb ua sab ntev tiv teebmeem, nyaj kev txomnyem, hab kev nyuaj sab.

⁵Luas muab peb nplawm, muab peb kaw rua huv tsev lojcuj hab puav peb nteg. Peb ua num khwv khwv yoo dlaab ndlub nris, yoo tshaib yoo nqhes;

⁶Txawm yog le ntawd los peb ua sab dlawb sab zoo, paub qhov tseeb, ua sab ntev, muaj lub sab hlub lwm tug, suavdlawg txhaj pum has tas, peb yog Vaajtswv cov tubkhai. Peb muaj lub sab hlub suavdlawg tag tag,

⁷peb naj nub qha Vaajtswv txujlug kws yog qhov tseeb hab peb lub neej ua rua suavdlawg pum Vaajtswv lub fwjchim. Tej cuabyeej kws peb siv tawmtsaam yeebncuab hab thaiv peb lub cev tub yog qhov kws peb ua peb lub neej zoo hab ncaaj nceeg.

⁸Tej tuabneeg muaj ibtxha fwm peb, ibtxha saib tsi taug peb. Ibtxha thuam peb ibtxha qhuas peb. Txawm yog peb yeej has lug tseeb xwb los tseem muaj tuabneeg has tas, peb has dlaag;

⁹peb zoo le cov tuabneeg kws tsi muaj leejtwg paub, tabsis suavdlawg puavleej paub peb. Peb zoo le cov tuabneeg kws tuag lawm, tabsis mej sim saib peb tseem muaj sa nyob. Luas tsimtxom peb, tabsis peb tsi tuag;

¹⁰peb muaj kev txhawjxeeb, tabsis peb tseem naj nub zoo sab. Peb yog tuabneeg pluag, tabsis peb tseem ua rua ntau leej npluanuj. Peb tsi muaj ib yaam dlaabtsi le, tabsis qhov tseemceeb ib puas tsaav yaam puavleej yog peb tug.

¹¹Cov kwvtij kws nyob huv lub nroog Kauleethaus, peb tub nthuav peb lub sab lub ntsws qha tseeb rua mej lawm, peb tsi tau zais ib qho hlo le.

¹²Peb tsi tau zais sab rua mej, tsuas yog mej txhaj zais sab rua peb xwb.

¹³Kuv suav has tas, mej yog kuv cov mivnyuas, kuv txhaj has le nuav rua mej, mej ca le qha hlo mej lub sab rua peb, ib yaam le peb tub qha peb lub sab rua mej lawm.

¹⁴Tug kws ntseeg Vaajtswv tsi xob moog nrug tug kws tsi ntseeg koom kwv ib tug quab, rua qhov obtug yeej kwv tsi tau ua ke. qhov phem hab qhov zoo, qhov kaaj hab qhov tsaus yeej nyob tsi tau ua ke.

¹⁵Yexus Khetos hab dlaab Ntxwgnyoog yeej nyob tsi tau ua ke. Tug kws ntseeg hab tug kws tsi ntseeg nyag yeej nyam nyag lawm ib yaam.

¹⁶Yeej tsi muaj leejtwg yuav nqaa mlom moog teev huv Vaajtswv lub Tuamtsev, rua qhov peb lub cev yog Vaajtswv tug kws muaj sa nyob lub Tuamtsev. Lawv le tej lug kws Vaajtswv has ca le nuav: “Kuv yuav muab puab ua kuv qhov chaw nyob hab kuv yuav naj nub nrug puab nyob. Kuv yuav yog puab tug Vaajtswv hab puab yuav yog kuv tsaav tuabneeg.”

¹⁷Yog le ntawd tug Tswv txhaj has tas, “Mej ca le tso plhuav puab cov ntawd tseg, moog nyob rua ib caag hab mej tsi xob kov tej kws qas, kuv txhaj le yuav mej.

¹⁸Kuv yuav uog mej txiv, mej yuav yog kuv cov tub cov ntxhais. Tug Tswv kws muaj Fwjchim Luj kawg nkaus yog tug kws has le nuav.”