Read Hmong Njua 2 Kauleethaus 7 Bible Online

2 Kauleethaus 7 - Hmong Njua bible

2 Kauleethaus 7

¹Cov kwvtij kws kuv hlub, Vaajtswv tub coglug le nuav rua peb lawm. Yog le ntawd, peb yuavtsum ua tuabneeg dlawbhuv hab paub ntshai Vaajtswv. Peb yuavtsum tso plhuav tej kev txhum kws peb ua hab peb xaav huv tuabsi tseg.

²Mej tsi xob tso peb tseg. Peb yeej tsi tau ua txhum rua leejtwg lossis xaav txu leejtwg lub neej lossis ntxag leejtwg tug yuav.

³Kuv has le nuav tsi yog kuv tshev mej. Kuv tub qha rua mej lawm has tas, mej naj nub nyob rawv huv kuv lub sab. Txawm yog yuav caj hab tuag los peb yeej yuav nyob ua ke moog le.

⁴Kuv ca sab rua mej hab qhuas mej. Txawm yog peb raug kev txomnyem ntau yaam los kuv tsi poob sab, kuv zoo sab kawg le.

⁵Thaus peb moog txug peg lub xeev Makedaunias, peb tsi tau su le. Muaj kev kub ntxhuv puagncig peb. Peb lub ncauj nrug luas sis caav, peb lub sab naj nub txhawj ntshai.

⁶Tabsis Vaajtswv tug kws txhawb cov tuabneeg kws poob sab tug zug, nwg txhawb peb tug zug, rua qhov nwg kuas Titus tuaj saib kuv.

⁷Tsi yog le ntawd xwb Titus tuaj qha rua kuv has tas, mej txhawb Titus tug zug. Mej xaav xaav pum kuv hab tej kws mej ua lug lawm ua rua mej nyuaj sab kawg le. Nwg has tas, mej muab sab npuab kuv heev. Tej ntawd ua rua kuv zoo sab kawg le.

⁸Txawm yog tsaab ntawv kws kuv sau xaa tuaj rua mej ntawd ua rua mej tu sab los xij, kuv yeej tsi tu sab le, tsuas yog kuv muaj ntsiv txhawj xwb. Thaus kuv nov has tas, tsaab ntawv ntawd ua rua mej tu sab ib nyuas ntu.

⁹Tabsis nwgnuav kuv zoo sab tsi yog vim kuv ua rua mej tu sab, kuv zoo sab vim qhov kws mej tu sab ntawd ua rua mej tso mej tej kev txhum tseg. tub yog Vaajtswv ca mej tu sab, yog le ntawd tej lug kws peb has yeej tsi txhum,

¹⁰Rua qhov qhov kws Vaajtswv ca mej tu sab, qhov ntawd ua rua mej tso mej tej kev txhum tseg kuas mej tau txujkev cawm dlim. Yog le ntawd, tsi taag leejtwg yuav tu sab. Tabsis cov tuabneeg kws tsi ntseeg Vaajtswv txawm yog puab paub tu sab rua puab tej kev txhum los yog puab tsi tso tseg, puab yeej yuav raug kev pluj kev tuag.

¹¹Mej sim ua tuab zoo xaav saib Vaajtswv ca mej tu sab le ntawd muaj nqes hov ntau rua mej. Tej ntawd ua rua mej mob sab hab ua rua mej kub sab lug dlaws mej zaaj kuas suavdlawg paub has tas, mej tsi tau ua txhum, ua rua mej ncu txug kuv, hab ua rua mej zoo sab rau txim rua tug kws ua txhum. Tej kws muaj nuav suavdlawg puavleej pum has tas, mej tsi tau ua txhum ib qho le.

¹²Yog le ntawd, txawm yog kuv sau tsaab ntawv ntawd tuaj rua mej los kuv yeej tsi txhobtxwm sau tuaj qha tug kws ua txhum ntawd lossis qha tug kws tug ntawd ua txhum rua. Tabsis kuv sau tuaj qha mej kuas mej ncu ntsoov has tas, Vaajtswv pum mej muab sab npuab peb kawg le.

¹³Tub yog vim le ntawd peb txhaj zoo sab. Tsi yog le ntawd xwb, Titus tuaj ua rua peb zoo sab kawg le hab, rua qhov mej txhua tug puavleej ua rua nwg tso sab plhuav tsi txob tsi txhawj lawm.

¹⁴Kuv qhuas mej rua nwg. qhov kws kuv qhuas le ntawd yeej tsi ua rua kuv poob ntsejmuag. Tej kws peb qha mej puavleej yog tej kws tseemceeb tsi muaj ib qho dlaag le. Ib yaam le ntawd, tej kws peb qhuas mej rua Titus yeej muaj tseeb tag.

¹⁵Thaus Titus pum has tas, mej noog nwg lug, saib taug nwg hab fwm nwg, nwg hajyam hlub mej heev.

¹⁶Kuv zoo sab kawg le, rua qhov kuv yeej ca sab tau rua mej.