Read Hmong Njua 2 Kauleethaus 8 Bible Online

2 Kauleethaus 8 - Hmong Njua bible

2 Kauleethaus 8

¹Cov kwvtij, peb xaav kuas mej paub has tas, Vaajtswv tub foom koob moov ntau kawg rua cov ntseeg kws nyob qhov txhua chaw huv lub xeev Makedaunias lawm.

²Tej kev txomnyem kws puab raug tub yog sim saib puab puas muab sab rau ntseeg. Txawm yog puab txomnyem npaum le ntawd los puab tseem zoo sab kawg le. Puab yeej yog cov tuabneeg kws pluag heev, tabsis puab muaj nplooj sab dlawb paug muab puab tej nyaj paab lwm tug.

³Kuv paub has tas, puab sau puab tej nyaj paab lwm tug lawv le kws puab paab tau.

⁴Tsi yog le ntawd xwb, puab tseem muab tshaaj tej ntawd hab. Puab naj nub thov peb ca puab xaa nyaj moog paab cov ntseeg Vaajtswv kws nyob nraag lub xeev Yudas. Yeej tsi muaj leejtwg yuam puab ua le ntawd, puab ca le ua puab xwb.

⁵Peb tsi xaav has tas, puab yuav muab ntau npaum le ntawd. qhov tseemceeb puab yeej xub ca peb tug Tswv kaav puab lub sab lawm. hab puab zoo sab ca peb khaiv puab moog ua num, lawv le Vaajtswv pum zoo.

⁶Yog le ntawd peb txhaj thov Titus tug kws pib ua teg num nuav rov tuaj tim mej. Nwg yuav paab mej ua teg num kws mej zoo sab ua ntawd kuas tav.

⁷Mej tub muaj ib puas tsaav yaam txhij lawm, tsi has cov tuabneeg kws muab sab rau ntseeg lossis cov kws txawj qha, cov kws txawj ntse, cov kws kub sab lug paab lwm tug hab cov kws hlub peb. Yog le ntawd tsimnyog mej zoo sab hlo paab ua teg num nuav hab.

⁸Kuv tsi yuam mej ua le ntawd, tabsis kuv tsuas qha rua mej has tas, lwm cov kub sab lug sis paab le caag xwb. Kuv xaav paub has tas, mej puas muaj lub sab hlub tag.

⁹Rua qhov mej yeej paub has tas, peb tug Tswv Yexus Khetos hlub peb kawg le. Txawm yog nwg yog tug kws npluanuj los nwg zoo sab lug ua tug kws pluag. Nwg ua le ntawd tub yog nwg xaav paab mej kuas mej ua tau tuabneeg npluanuj.

¹⁰Kuv xaav has tas mej ca le ua teg num kws tseb nua mej tub pib ua lawm kuas tav. Yog mej ua le ntawd yuav zoo heev. Mej yeej yog cov kws xub pib ua teg num ntawd, tabsis tsi yog mej xub pib ua xwb, mej yeej zoo sab hlo ua hab.

¹¹Thaus chivthawj mej yeej kub sab lug ua. Yog le ntawd, nwgnuav mej ca le rau sab ntso ua kuas tav lawv le mej ua tau.

¹²Rua qhov yog mej zoo sab hlo paab lawv le mej muaj, Vaajtswv zoo sab yuav npaum le ntawd, yeej tsi muaj leejtwg thov tej kws mej tsi muaj.

¹³Tsi yog kuv xaav kuas lwm cov tau zoo, tabsis ca mej txomnyem.

¹⁴Nwgnuav mej muaj ntau, tsimnyog mej paab cov kws tsi muaj. Thaus mej tsi muaj, puab muaj, puab tsua paab mej. Yog le ntawd mej suavdlawg yuav muaj sis npaug zog.

¹⁵Lawv le Vaajtswv txujlug has tas, “Tug kws khaws tau ntau nwg yeej tsi muaj seem, tug kws khaws tau tsawg los nwg yeej muaj txaus.”

¹⁶Peb ua Vaajtswv tsaug, rua qhov Vaajtswv ua rua Titus muaj lub sab kub lug paab mej.

¹⁷Titus tuaj paab mej tsi yog vim peb thov nwg xwb, tabsis nwg yeej zoo nwg sab tuaj.

¹⁸Peb khaiv peb ib tug kwvtij nrug Titus tuaj. Tug kwvtij ntawd yog tug kws qha Txujmoo Zoo, cov ntseeg kws nyob txhua qhov chaw puavleej fwm nwg heev.

¹⁹Tsi yog le ntawd xwb, nwg yog tug kws cov ntseeg tsaa nrug peb ua teg num sau nyaj nuav. Teg num nuav yuav ua rua peb tug Tswv Yexus Khetos tau ntsejmuag hab ua rua cov ntseeg nraag paub has tas, peb yeej xaav paab puab tag.

²⁰Peb ua tuab zoo ua le nuav kuas txhaj tsi muaj xaiv muaj lug thaus peb xaa cov nyaj nuav moog paab cov ntseeg nraag.

²¹Rua qhov peb xaav ua ncaaj ua nceeg. Tsi yog yuav ua rua Vaajtswv pum xwb, tabsis ua rua tuabneeg pum hab.

²²Yog le ntawd peb yuav khaiv peb tug kwvtij nrug puab tuaj. Peb tub saib nwg teg num ntau zag lawm peb pum has tas, nwg kub sab lug xaav paab. Nwgnuav nwg ca sab tau rua mej, nwg hajyam xaav paab mej heev.

²³Tug Titus kws yuav tuaj nuav, nwg yog ib tug kws nrug kuv ua num paab mej. Tabsis cov kwvtij kws nrug Titus tuaj, puab yog cov kws cov ntseeg kws nyob txhua qhov chaw khaiv tuaj. Hab puab yog cov kws ua rua Yexus Khetos tau ntsejmuag.

²⁴Yog le ntawd, mej yuavtsum hlub puab, cov ntseeg kws nyob txhua qhov chaw txhaj yuav paub has tas, mej hlub cov tuabneeg kws puab khaiv tuaj ntawd, hab puab yuav paub has tas, tej lug kws peb qhuas mej rua puab yeej muaj tseeb tag.