Read Hmong Njua 2 Kauleethaus 9 Bible Online

2 Kauleethaus 9 - Hmong Njua bible

2 Kauleethaus 9

¹Tsi taag kuv yuav sau ntawv tuaj qha mej has txug tej nyaj kws suavdlawg yuav xaa moog paab cov ntseeg Vaajtswv kws nyob nraag lub xeev Yudas.

²Kuv yeej paub has tas, mej puavleej yuav zoo sab paab, kuv tub qhuas mej rua cov tuabneeg peg lub xeev Makedaunias lawm has tas, “Cov kwvtij kws nyob huv lub xeev Akhayas, puab tub xub npaaj nyaj ca tseb nua lug lawm.” Qhov kws mej kub sab lug xaav paab, qhov ntawd ua rua puab raag dlheev ua teg num nuav.

³Nwgnuav kuv khaiv cov kwvtij nuav tuaj saib mej kuas puab pum has tas, tej lug kws kuv qhuas mej rua puab, tsi yog kuv laam qhuas qhuav qhuav xwb, tabsis mej yeej npaaj nyaj txhij lawv le kuv has lawm tag.

⁴Yog cov tuabneeg kws nyob peg lub xeev Makedaunias kws nrug kuv tuaj puab pum has tas, mej tseem tsi tau npaaj lawv le kuv has, ntshai mej hab peb yuav poob ntsejmuag kawg le.

⁵Yog le ntawd, kuv txhaj xaav has tas, kuv yuavtsum thov cov kwvtij ntawd ua kuv ntej tuaj nraag mej, ca puab sau cov nyaj kws mej tub xub has tseg lawm has tas, mej yuav muab rua peb. Thaus kuv tuaj txug mej yuav npaaj txhij lawm. Yog mej ua le ntawd puab yuav pum has tas, mej yeej zoo sab hlo muab tsi yog kuv yuam mej.

⁶Mej yuavtsum ncu ntsoov has tas, tug kws cog tsawg nwg yeej yuav tau sau tsawg. Tug kws cog ntau nwg yeej yuav tau sau ntau.

⁷Yog le ntawd, nyag yuavtsum muab lawv le nyag tub xub xaav tseg lawm, tsi yog yuav khauvxwm lossis yug yuav yuam yug lub sab muab.

⁸Vaajtswv tug kws muaj ib puas tsaav yaam, nwg yuav pub tej kws mej yuavtsum muaj rua mej, kuas mej naj nub muaj txaus siv hab muaj txaus coj moog paab lwm tug.

⁹Lawv le Vaajtswv txujlug has tas: “Tug kws muaj nplooj sab dlawb paug paab cov tuabneeg pluag, tug ntawd teg num yuav nyob moog ibtxhis.”

¹⁰Vaajtswv tug kws pub noob qoob noob loo rua tug kws cog, hab pub zaub pub mov rua tug kws noj, nwg yeej yuav pub tej noob qoob noob loo rua mej. Nwg yuav ua kuas tej qoobloo kws mej cog luj hlub zoo hab tej num zoo kws mej ua tawg paaj txi txiv ncw.

¹¹Nwg yuav pub ib puas tsaav yaam rua mej kuas mej muaj txaus siv hab muaj txaus paab lwm tug. Yog le ntawd, yuav muaj ntau leej ua Vaajtswv tsaug, rua qhov mej muab mej tej nyaj rua peb nqaa moog paab puab.

¹²Tej kws mej ua nuav tsi yog yuav paab cov ntseeg Vaajtswv kws txomnyem xwb, tabsis yuav ua rua suavdlawg naj nub ua Vaajtswv tsaug hab.

¹³Thaus suavdlawg pum tej nyaj kws mej paab nuav yuav muaj ntau leej ua Vaajtswv tsaug, rua qhov mej muab sab npuab Txujmoo Zoo kws has txug Yexus Khetos zaaj kws mej ntseeg. hab mej muaj nplooj sab dlawb paug paab puab hab paab suavdlawg.

¹⁴Puab yuav ncu ntsoov mej tshaav ntuj hab thov Vaajtswv paab mej, rua qhov puab pum has tas, Vaajtswv tub foom koob moov ntau kawg rua mej lawm.

¹⁵Peb ca le ua Vaajtswv tsaug, rua qhov Vaajtswv tub pub Vaajtswv txuj koob moov kws muaj nqes kawg nkaus rua peb lawm.