Read Hmong Njua Kalatias 2 Bible Online

Kalatias 2 - Hmong Njua bible

Kalatias 2

¹Tom qaab ntawd kaum plaub xyoos, kuv hab Npananpas maam le rov qaab moog nraag lub nroog Yeluxalees hab kuv coj Titus nrug kuv moog.

²Thaus kuv hu cov thawj tuaj txhij lawm, kuv pav Txujmoo Zoo kws kuv naj nub coj moog qha lwm Tsaav tuabneeg rua puab noog. Kuv ua le nuav, rua qhov kuv tsi xaav ca leejtwg rhuav kuv teg num, tsi has tej kws kuv ua lug lawm lossis tej kws naj nub nwgnuav kuv tseem ua.

³Tug kwv Titus kws nrug kuv ua num ntawd, txawm yog nwg yog tuabneeg Kilis los tsi muaj leejtwg has tas yuavtsum muab nwg ua kevcai txav,

⁴txawm yog le ntawd los tseem muaj tuabneeg ua txuj tuaj has tas puab yog cov kwvtij ntseeg hab yog peb paab. Puab cov ntawd muaj qee leej xaav coj Titus moog ua kevcai txav. Cov tuabneeg ntawd yog cov kws tuaj xauj saib vim le caag peb cov kws ntseeg Yexus Khetos, peb tsua muaj kev thaajyeeb. Puab ua le ntawd rua qhov puab xaav ntxag peb ua puab qhev,

⁵tabsis peb yeej tsi kaam ua lawv le puab qha ib nyuas qhov le, rua qhov peb tsi xaav ca leejtwg rhuav qhov tseeb kws yog Txujmoo Zoo, mej txhaj yuav muaj Txujmoo Zoo kws yog txuj tseeb moog le.

⁶Tabsis cov tuabneeg kws suavdlawg hu has tas puab yog cov thawj, puab cov ntawd yeej tsi tau qha ib yaam dlaabtsi kws kuv tsi tau paub rua kuv le. Txawm yog yaav taag lug puab zoo le caag los Vaajtswv yeej tsi xaiv leejtwg ntsejmuag.

⁷Puab cov ntawd pum has tas, Vaajtswv muab teg num qha Txujmoo Zoo rua lwm Tsaav Tuabneeg rua kuv ua, ib yaam le Vaajtswv muab teg num qha Txujmoo Zoo rua cov tuabneeg Yudais rua Petus ua.

⁸Rua qhov Vaajtswv tsaa kuv ua ib tug timthawj qha lwm Tsaav Tuabneeg ib yaam le Vaajtswv tsaa Petus ua timthawj qha cov Yudais.

⁹Yakaunpaus, Petus, hab Yauhaas kws suavdlawg hu ua cov thawjcoj, puab puavleej paub has tas Vaajtswv tub muab teg num ntawd rua kuv ua lawm; puab txhaj tuav kuv hab Npananpas saab teg xis, peb txhua tug txhaj pum zoo has tas ca Npananpas wb moog qha lwm Tsaav Tuabneeg hab ca puab qha cov Yudais.

¹⁰Puab tsuas thov kuas wb ncu ntsoov paab cov tuabneeg pluag kws yog puab paab. qhov kws puab thov ntawd kuv yeej ibtxwm muab sab rau paab lug lawm.

¹¹Thaus Petus tuaj nyob peg lub nroog Aati-aukias, kuv ca le taabmeeg tshev nwg, rua qhov suavdlawg yeej paub has tas nwg tau ua txhum lawm.

¹²Thaus Yakaunpaus tseem tsi tau khaiv tuabneeg tuaj, Petus yeej nrug lwm Tsaav Tuabneeg kws ntseeg Vaajtswv noj mov ua ke. Tabsis thaus Yakaunpaus khaiv tuabneeg tuaj txug, Petus txawm ca le tsi nrug lwm Tsaav Tuabneeg noj mov ua ke lawm, rua qhov nwg ntshai cov tuabneeg kws qha has tas, yuavtsum muab lwm Tsaav Tuabneeg ua kevcai txav.

¹³Cov Yudais kws ntseeg Vaajtswv muaj ob peb leeg ntaus sab yau ib yaam le Petus; txawm yog Npananpas los kuj yuam kev ua ib yaam le puab hab.

¹⁴Thaus kuv pum has tas, puab txhua tug tsi ua lawv le qhov tseeb kws Txujmoo Zoo qha, kuv txhaj taabmeeg tshev Petus rua suavdlawg has tas, “Koj yog tuabneeg Yudais, tabsis koj tub moog ua le lwm Tsaav Tuabneeg ua, koj tsi ua le koj yog tuabneeg Yudais lawm. Ua le caag koj tseem yuam kuas lwm Tsaav Tuabneeg ua le cov tuabneeg Yudais ua hab?”

¹⁵Peb yog tuabneeg Yudais, peb “Tsi yog lwm Tsaav Tuabneeg kws muaj txim.”

¹⁶Tabsis peb yeej paub has tas, tug kws Vaajtswv suav has tas ncaaj nceeg tsi yog tug kws xyum coj lawv le Vaajtswv txuj kevcai, tabsis yog tug kws ntseeg Yexus Khetos. Txawm yog peb los kuj ib yaam nkaus le ntawd, qhov kws Vaajtswv coj peb lug nrug Vaajtswv sis raug zoo tub yog vim peb ntseeg Yexus Khetos, tsi yog vim peb xyum coj lawv le Vaajtswv txuj kevcai. Rua qhov tug kws Vaajtswv suav has tas ncaaj nceeg yeej tsi yog tug kws xyum coj lawv le Vaajtswv txuj kevcai.

¹⁷Peb cov kws ntseeg Yexus Khetos, Vaajtswv txhaj suav has tas peb yog cov kws ncaaj nceeg, yog peb tseem ua txhum le lwm Tsaav Tuabneeg, peb yuav has tas Yexus Khetos yog tug kws qha peb ua txhum nua los? Tsi yog le ntawd!

¹⁸Yog kuv tseem rov qaab moog muab txuj kevcai kws kuv tub muab rhuav lawm lug ua dlua, suavdlawg yeej yuav pum has tas kuv yog tug kws ua txhum Vaajtswv txuj kevcai.

¹⁹Thaus kuv tseem coj lawv le Vaajtswv txuj kevcai, kuv zoo le tug tuabneeg kws tuag lawm. Tabsis nwgnuav Vaajtswv txuj kevcai tsi kaav kuv lawm, kuv txhaj tau kev ua kuv lub neej lawv le Vaajtswv lub sab nyam,

²⁰yog le ntawd, kuv tub nrug Yexus Khetos tuag sau tug ntoo khaublig lawm, txujsa kws nwgnuav kuv muaj tsi yog kuv txuj, tabsis yog Yexus Khetos txuj. Qhov kws nwgnuav kuv muaj txujsa nyob tub yog vim kuv ntseeg Vaajtswv tug Tub, tug kws hlub kuv hab muab nwg txujsa lug txhwv kuv.

²¹Vaajtswv txuj koob moov kuv yeej tsi momtxheej, yog Vaajtswv suav has tas tug kws xyum ua lawv le Vaajtswv txuj kevcai yog tug ncaaj nceeg lawm, ces qhov kws Yexus Khetos tuag yeej tsi muaj nqes dlaabtsi le.