Read Hmong Njua Kalatias 3 Bible Online

Kalatias 3 - Hmong Njua bible

Kalatias 3

¹Cov tuabneeg Kalatias kws ruag! Leejtwg ntxag tau mej lawm? Kuv tub qha zaaj kws Yexus Khetos raug ntsa rua sau ntoo khaublig rua mej paub tseeb, ib yaam le mej lub qhovmuag tub pum kag nwg lawm ntaag.

²Mej ca le qha rua kuv saib: qhov kws Vaajtswv pub Vaajtswv tug Ntsujplig rua mej, vim mej xyum coj lawv le Vaajtswv txuj kevcai lossis vim mej noog hab ntseeg Txujmoo Zoo?

³Ua le caag mej yuav ruag ua luaj le! Thaus chivthawj mej tub ua lawv le Vaajtswv tug Ntsujplig qha mej lawm, tabsis nwgnuav mej tsua yuav siv mej tug zug ua kuas tej ntawd tav los?

⁴Ib puas tsaav yaam kws Vaajtswv paab mej lawm, txawm tsi muaj nqes rua mej le los? Yeej muaj los sav!

⁵Qhov kws Vaajtswv pub Vaaj Ntsujplig rua mej hab ua tej txujci tseemceeb rua mej pum, vim mej xyum coj lawv le Vaajtswv txuj kevcai lossis vim mej noog hab ntseeg Txujmoo Zoo?

⁶Ib yaam le Vaajtswv txujlug has txug Anplahaas has tas, “Anplahaas ntseeg Vaajtswv, hab tub yog vim Anplahaas ntseeg, Vaajtswv txhaj suav has tas nwg yog tug kws ncaaj nceeg.”

⁷Yog le ntawd, mej yuavtsum paub has tas, tsuas yog cov tuabneeg kws ntseeg xwb txhaj yog Anplahaas cov xeebntxwv.

⁸Vaajtswv txujlug tub xub qha tseg lawm has tas Vaajtswv yuav coj lwm Tsaav Tuabneeg kws ntseeg lug nrug Vaajtswv sis raug zoo. Yog le ntawd, Vaajtswv txujlug txhaj xub qha Txujmoo Zoo rua Anplahaas ua ntej has tas, “Vim koj noog Vaajtswv lug, Vaajtswv yuav foom koob moov rua txhua tsaav tuabneeg huv qaab ntuj nuav.”

⁹Vim Anplahaas ntseeg, Anplahaas txhaj tau koob moov; yog le ntawd txhua tug kws ntseeg puavleej yuav tau koob moov ib yaam le Anplahaas.

¹⁰Cov tuabneeg kws ca sab rua qhov kws puab xyum coj lawv le Vaajtswv txuj kevcai, cov tuabneeg ntawd tub raug foom tsi zoo lawm, rua qhov Vaajtswv txujlug has tas, “Yog leejtwg tsi ua lawv le txhua nqai kws sau ca rua huv phoo ntawv kws yog Vaajtswv txuj kevcai, tug ntawd tub raug Vaajtswv foom tsi zoo lawm.”

¹¹Yog le ntawd, peb paub tseeb has tas tug kws xyum coj lawv le Vaajtswv txuj kevcai, tsi yog tug kws Vaajtswv suav has tas ncaaj nceeg, rua qhov Vaajtswv txujlug has tas “Tsuas yog tug ntseeg, Vaajtswv txhaj suav has tas, yog tug kws ncaaj nceeg hab tau txujsa.”

¹²Tabsis txuj kevcai yeej tsi muaj ib qhov has txug kev ntseeg le. Vim le ntawd Vaajtswv txujlug txhaj has tas, “Yog leejtwg coj tau lawv le txuj kevcai txhua nqai, tug ntawd yuav tau txujsa.”

¹³Vaajtswv txuj kevcai tub ua rua peb raug foom tsi zoo lawm, tabsis Yexus Khetos lug hloov peb chaw, nwg txhaj raug foom tsi zoo; rua qhov Vaajtswv txujlug has tas, “Tug kws raug dlai rua sau ntoo, tug ntawd tub raug foom tsi zoo lawm.”

¹⁴Thaus luas muab Yexus Khetos dlai rua sau tug ntoo khaublig lawm, Vaajtswv txhaj foom koob moov rua lwm Tsaav Tuabneeg kws lug ntseeg Yexus Khetos lawv le Vaajtswv tau coglug tseg rua Anplahaas, hab Vaajtswv pub Vaaj Ntsujplig rua peb txhua tug kws ntseeg Yexus Khetos lawv le Vaajtswv tau coglug tseg lawm.

¹⁵Cov kwvtij, suavdlawg puavleej paub has tas yog muaj ob leeg tau sis coglug has hum sau ca lawm, yeej tsi muaj leejtwg yuav rhuav tau lossis yuav muab lwm lu lug ntxiv tau rua.

¹⁶Thaus Vaajtswv coglug rua Anplahaas hab Anplahaas tug xeebntxwv. Vaajtswv tsi tau has tas, “Cog rua cov xeebntxwv” le kws muaj ntau leej, tabsis Vaajtswv has tas, “Cog rua koj tug xeebntxwv,” Vaajtswv has le ntawd, nwg has txug tuab leeg xwb, tug ntawd yog Yexus Khetos.

¹⁷Kuv has le nuav tub yog kuv has tas Vaajtswv yog tug kws coglug tseg rua Anplahaas hab yog tug kws yuav ua lawv le lu lug cog tseg ntawd. Vaajtswv tub coglug tseg tau plaub puas peb caug xyoo lawm, maam le muaj Vaajtswv txuj kevcai. Yog le ntawd, Vaajtswv txuj kevcai yeej rhuav tsi tau Vaajtswv lu lug cog tseg.

¹⁸Yog tug kws ua lawv le Vaajtswv txuj kevcai tau Vaajtswv txuj koob moov lawm, ces tsi taag yuav tog txuj koob moov kws Vaajtswv coglug tseg has tas Vaajtswv yuav pub rua Anplahaas. Anplahaas tub tau Vaajtswv txuj koob moov lawv le Vaajtswv lu lug cog tseg lawm.

¹⁹Yog le ntawd, ua le caag Vaajtswv tseem yuav qha Mauxes sau ib txuj kevcai hab? Qhov kws Vaajtswv qha Mauxes sau ib txuj kevcai ntxiv ntawd, tub yog Vaajtswv xaav kuas tuabneeg paub has tas muaj kev txhum. Vaajtswv tub xaav tseg lawm has tas tsuas pub tuabneeg coj txuj kevcai ntawd moog txug thaus Anplahaas tug xeebntxwv kws Vaajtswv lu lug cog tseg has txug lug xwb. Vaajtswv kuas cov timtswv ceebtsheej muab txuj kevcai ntawd rua Mauxes coj lug qha rua suavdlawg. Yog le ntawd, Mauxes yog tug kws cev Vaajtswv lug xwb.

²⁰Tabsis yog muaj tuab leeg ua num xwb, ces tsi taag yuav muaj tug kws cevlug. Vaajtswv yeej yog tug kws ua teg num ntawd.

²¹Yog le ntawd, Vaajtswv txuj kevcai tawmtsaam Vaajtswv lu lug cog tseg los? Yeej tsi yog le ntawd. Yog muaj ib txuj kevcai kws cawm tau tuabneeg txujsa, Vaajtswv yeej yuav coj tug kws ua lawv le txuj kevcai ntawd lug nrug Vaajtswv sis raug zoo.

²²Tabsis Vaajtswv txujlug has tas txhua tug kws nyob huv qaab ntuj nuav puavleej yog tuabneeg txhum huv tuabsi; kuas txhua tug kws ntseeg txhaj yuav tau txuj koob moov kws Vaajtswv coglug tseg has tas Vaajtswv yuav muab pub rua cov kws ntseeg Yexus Khetos.

²³Thaus tseem tsi tau txug lub sijhawm kws yuav muaj tuabneeg lug ntseeg, Vaajtswv txuj kevcai yeej ibtxwm khi peb lug txug thaus kws peb paub lug ntseeg.

²⁴Yog le ntawd, Vaajtswv txuj kevcai zoo ib yaam le tug kws saib peb lug txug lub sijhawm kws Yexus Khetos lug, Vaajtswv txhaj suav has tas peb txhua tug kws ntseeg yog tuabneeg ncaaj nceeg.

²⁵Nwgnuav tub txug lub sijhawm kws tuabneeg paub lug ntseeg lawm, yog le ntawd Vaajtswv txuj kevcai txhaj tsi kaav peb lawm.

²⁶Nwgnuav mej txhua tug kws ntseeg, mej puavleej yog Vaajtswv cov mivnyuas, rua qhov mej nrug Yexus Khetos koom ib txujsa lawm.

²⁷Mej tub ua kevcai raus dlej rua suavdlawg pum lawm has tas mej yog cov kws nrug Yexus Khetos koom ib txujsa, mej txhaj coj tau mej tug yaam ntxwv zoo ib yaam le Yexus Khetos tug.

²⁸Yog le ntawd, mej txhua tug kws nrug Yexus Khetos koom ib txujsa, tsi has cov Yudais lossis lwm Tsaav Tuabneeg, cov kws ua qhev lossis cov kws tsi ua qhev, tsi has quaspuj lossis txivneej, mej suavdlawg puavleej koom ib lub sab rua ntawm Yexus Khetos.

²⁹Mej txhua tug kws ntseeg Yexus Khetos, mej puavleej yog Anplahaas cov xeebntxwv, mej yeej yuav tau tej kws Vaajtswv coglug tseg lawm has tas nwg yuav muab pub rua mej.