Read Hmong Njua Kalatias 4 Bible Online

Kalatias 4 - Hmong Njua bible

Kalatias 4

¹Peb suavdlawg puavleej paub has tas, lawv le ibtxwm leej txiv yeej yuav muab nwg tej qubtxeeg qubteg rua nwg tug tub. Txawm yog tug tub yeej yuav tau ib puas tsaav yaam ntawd los thaus nwg tseem yau, nwg zoo ib yaam le ib tug tubqhe xwb.

²Thaus nwg tseem yau yeej muaj tuabneeg saib nwg hab ceev nwg tej nyaj txag moog txug nub kws nwg txiv teem ca lawm has tas nwg txiv yuav muab rua nwg.

³Ib yaam nkaus le ntawd, thaus peb tseem tsi tau paub Vaajtswv, peb ua dlaab tauj dlaab qhev.

⁴Tabsis thaus txug lub sijhawm kws Vaajtswv teem ca lawm, Vaajtswv khaiv Vaajtswv tug Tub lug yug ua tuabneeg, muaj ib tug quaspuj yug nwg. Hab nwg kuj coj lawv le cov Yudais txuj kevcai ib yaam le suavdlawg,

⁵nwg txhaj paab tau cov tuabneeg kws Vaajtswv txuj kevcai muab khi ca lawm kuas puab dlim. Nwg ua le ntawd, peb txhaj tau ua Vaajtswv cov mivnyuas.

⁶Vaajtswv khaiv Vaajtswv tug tub tug Ntsujplig lug nyob huv peb lub sab, suavdlawg txhaj pum has tas, peb yog Vaajtswv cov mivnyuas, tug Vaaj Ntsujplig ntawd yog tug kws qha peb hu Vaajtswv has tas, “Anpas, kuv Txiv.”

⁷Yog le ntawd mej tsi yog qhev lawm, tabsis yog tub. Vim mej yog Vaajtswv cov tub lawm, mej txhaj yuav tau ib puas tsaav yaam kws Vaajtswv khaws ca rua Vaajtswv cov tub.

⁸Yaav taag lug mej tsi paub Vaajtswv, mej txhaj moog ua dlaab tauj dlaab qhev, tabsis nwgnuav mej tub paub Vaajtswv lawm.

⁹Yog kuv has tas nwgnuav Vaajtswv tub paub mej lawm, ntshai yuav yog dlua. Ua le caag mej tseem xaav rov moog coj dlaab? Tej dlaab ntawd tsi muaj fwjchim yuav paab tau mej, mej tseem xaav rov qaab moog ua dlaab qhev dlua hab los?

¹⁰Mej naj nub saib nub, saib hli, saib caij saib nyoog hab saib naj saib xyoo ua qhov tseemceeb.

¹¹Mej pheej ua le ntawd, kuv ntshai nyob tsaam tej kws kuv tub qha rua mej lawm tsi muaj nqes dlaabtsi rua mej.

¹²Cov kwvtij, kuv thov mej ua mej lub neej ib yaam le kuv ua kuv lub, rua qhov kuv tub ua kuv lub neej ib yaam le mej ua mej lub lawm. Mej tsi tau ua txhum rua kuv le.

¹³Mej tub paub lawm has tas thawj zag kws kuv tuaj saib mej, kuv mob kuv txhaj le tau qha Txujmoo Zoo rua mej.

¹⁴Txawm yog kuv tug mob ua rua mej tau kev nyuaj sab los mej tsi ntxub kuv, mej tseem saib taug kuv. Mej tu kuv zoo ib yaam le kuv yog Vaajtswv ib tug timtswv hab ib yaam le kuv yog Yexus Khetos ntaag.

¹⁵Thaus kuv tuaj saib mej, mej zoo sab rua kuv kawg le! Nwgnuav mej tsi ncu qaab lawm los? Kuv paub has tas txawm yog thaus ntawd kuv xaav yuav mej lub qhovmuag los mej yeej yuav kaus rua kuv.

¹⁶Kuv yeej has ncaaj rua mej, kuv tsi dlaag mej, vim le ntawd nwgnuav mej txhaj ntxub kuv los?

¹⁷Cov tuabneeg ntawd muab sab npuab mej heev kuas mej nyam puab ib yaam le puab nyam mej, tabsis puab lub sab yeej phem, puab xaav ua kuas mej hab kuv tsi sis hum.

¹⁸Qhov kws muaj tuabneeg muab sab npuab mej, qhov ntawd zoo heev, tsi has thaus kuv nrug mej nyob lossis tsi nrug mej nyob, tsuav yog puab muaj lub sab ncaaj xwb.

¹⁹Cov mivnyuas kws kuv hlub, kuv txhawj mej ib yaam le tug quaspuj kws yuav yug mivnyuas, nwg txhawj yug nwg tug mivnyuas ntaag. Ntshai kuv yuav txhawj le nuav moog txug thaus mej muaj lub sab zoo ib yaam le Yexus Khetos lub.

²⁰Yog taamsim nuav kuv nrug mej nyob, kuv yuav ua tuab zoo qha mej, rua qhov kuv txhawj mej heev.

²¹Mej cov kws nyam xyum ua lawv le Vaajtswv txuj kevcai, mej ca le qha kuv saib txuj kevcai ntawd qha le caag rua mej?

²²Txuj kevcai ntawd qha has tas Anplahaas muaj ob tug tub, ib tug yog tug quaspuj kws ua qhev yug, ib tug yog tug quaspuj kws tsi ua qhev yug.

²³Anplahaas tug tub kws yog tug ntxhais qhev yug, nwg yug lawv le tuabneeg ibtxwm yug, tabsis tug tub kws yog tug quaspuj kws tsi ua qhev yug, nwg yug lawv le Vaajtswv lu lug cog tseg kws has tas nwg yuav yug.

²⁴Ob tug quaspuj kws kuv pav rua mej nuav pev ib yaam le yog Vaajtswv ob txuj kevcai. Txuj kevcai kws Vaajtswv muab sau Roob Xinais, pev ib yaam le yog Hankas tug kws yug cov mivnyuas kws ua qhev.

²⁵Pev ib yaam le Hankas yog lub Roob Xinais kws nyob huv tebchaws Alanpias hab yog lub nroog Yeluxalees kws nwgnuav tseem nyob, rua qhov lub nroog hab cov pejxeem kws nyob huv lub nroog puavleej poob moog ua luas qhev.

²⁶Tabsis lub nroog Yeluxalees kws nyob sau ntuj, nwg tsi ua qhev, nwg yog peb nam.

²⁷Vim Vaajtswv txujlug has tas: “Tug quaspuj kws xeeb tsi taug mivnyuas koj ca le zoo sab! Tug quaspuj kws tsi tau mob dlua plaab yug mivnyuas, koj ca le qha nrov nrov rua suavdlawg has tas koj zoo sab kawg le! Rua qhov tug quaspuj kws tug quasyawg muab tso tseg lawm, nwg yuav yuav mivnyuas coob dlua tug quaspuj kws muaj tug quasyawg nrug nyob.”

²⁸Cov kwvtij, mej puavleej yog Vaajtswv cov mivnyuas lawv le Vaajtswv lu lug cog tseg, ib yaam le Ixaj.

²⁹Thaus ntawd tug tub kws yug lawv le tuabneeg ibtxwm yug, nwg tsimtxom tug tub kws Vaajtswv tug Ntsujplig yug; txawm yog naj nub nwgnuav los tseem muaj le ntawd.

³⁰Tabsis Vaajtswv txujlug has le caag? Vaajtswv txujlug has tas, “Ca le ntab tug ntxhais qhev hab nwg tug tub tsiv moog; rua qhov tug ntxhais qhev tug tub yuav tsi tau leej txiv tej qubtxeeg qubteg kws yuav muab rua tug quaspuj kws tsi yog qhev tug tub.”

³¹Yog le ntawd cov kwvtij, peb tsi yog tug ntxhais qhev cov mivnyuas, tabsis peb yog tug quaspuj kws tsi yog qhev cov mivnyuas.