Read Hmong Njua Kalatias 6 Bible Online

Kalatias 6 - Hmong Njua bible

Kalatias 6

¹Cov kwvtij, yog mej pum ib tug ua txhum mej cov kws muab sab rau ntseeg, mej yuavtsum ua tuab zoo ntuag tug ntawd kuas nwg rov qaab lug ua zoo. Tabsis thaus mej yuav moog ntuag nwg, mej yuavtsum ceevfaaj, nyob tsaam mej yuam kev nrug nwg ua txhum hab.

²Mej yuavtsum sis paab ris nraa, yog mej ua le ntawd txhaj yog mej coj lawv le Yexus Khetos txuj kevcai.

³Tug kws tsi yog tuabneeg tseemceeb, yog nwg laam khaav has tas nwg yog tug kws tseemceeb, nwg yeej rov dlaag nwg xwb.

⁴Txhua tug nyag yuavtsum ua tuab zoo saib nyag teg num saib zoo le caag tsaiv. Yog leejtwg teg num zoo lawm, tug ntawd txhaj khaav tau, tsi taag nwg yuav coj nwg teg num moog pev rua lwm tug teg.

⁵Rua qhov txhua tug nyag yuavtsum ris nyag lub nraa.

⁶Tug kws kawm Yexus Khetos tej lug, nwg yuavtsum zoo sab hlo muab tej kws nwg muaj faib rua tug kws qha nwg.

⁷Mej tsi xob xaav yuam kev, yeej tsi muaj ib tug yuav dlaag tau Vaajtswv, txhua tug nyag yuav tau sau lawv le tej kws nyag tseb.

⁸Tug kws tseb tej kws tuabneeg lub sab nyam, tug ntawd yeej yuav tau sau kev pluj kev tuag lawv le tej kws nwg tseb. Tabsis tug kws tseb tej kws Vaaj Ntsujplig nyam, tug ntawd yuav tau sau txujsa ntev dlhawv moog ibtxhis.

⁹Yog le ntawd, peb tsi xob nkeeg ua tej num zoo; yog peb pheej ua tsi tso tseg, muaj ib nub peb yeej yuav tau sau xwb.

¹⁰Txhua lub sijhawm kws peb paab tau lwm tug, peb yuavtsum paab, tabsis peb yuavtsum paab cov ntseeg heev dlua.

¹¹Mej sim ua tuab zoo saib tej npe ntawv kws kuv txhais teg sau xaa tuaj rua mej luj npaum le caag dlag!

¹²Qhov kws cov tuabneeg ntawd pheej yuav yuam mej ua kevcai txav, tub yog puab xaav kuas suavdlawg qhuas has tas mej tub ua lawv le puab has lawm. Puab qha le ntawd, rua qhov puab yeej paub has tas tug kws leeg has tas tsuas yog Yexus Khetos tug ntoo khaublig txhaj le paab tau tuabneeg dlim tuabneeg lub txim xwb, tug ntawd yeej yuav raug kev tsimtxom.

¹³Txawm yog cov tuabneeg kws ua kevcai txav lawm los puab tub tsi ua lawv le Vaajtswv txuj kevcai; cov tuabneeg ntawd xaav kuas mej ua kevcai txav, puab txhaj le tau lug khaav has tas mej tub zoo sab ca puab muab mej ua kevcai txav lawm.

¹⁴Tabsis kuv yuav tsi khaav le puab, kuv tsuas khaav has txug peb tug Tswv Yexus Khetos tug ntoo khaublig xwb. Tub yog vim kuv ntseeg tug kws tuag sau ntoo khaublig, tuabneeg nplajteb txhaj suav has tas kuv yog tug kws tuag lawm. Hab kuv suav has tas tej kws muaj nyob huv nplajteb nuav tsi muaj ib yaam kws tseemceeb le.

¹⁵Qhov kws tuabneeg ua kevcai txav lossis tsi ua, qhov ntawd yeej tsi tseemceeb dlaabtsi; qhov tseemceeb yog qhov kws tuabneeg muaj dlua lub sab tshab.

¹⁶Thov Vaajtswv foom koob moov rua txhua tug kws muaj lub sab tshab, hab cov ntseeg Vaajtswv txhua tug kuas suavdlawg tau zoo nyob kaaj sab lug.

¹⁷Txij nuav moog, tsi xob pub leejtwg tuaj ua rua kuv nyuaj sab dlua lawm, rua qhov kuv lub cev kws muaj caws plav tub ua rua suavdlawg pum lawm has tas kuv yog Yexus Khetos tug tubqhe.

¹⁸Cov kwvtij, thov peb tug Tswv Yexus Khetos foom koob moov rua mej txhua tug. Amees.