Read Hmong Njua Efexaus 1 Bible Online

Efexaus 1 - Hmong Njua bible

Efexaus 1

¹Kuv yog Paulus kws Vaajtswv tsaa ua Yexus Khetos tug timthawj. Kuv sau tsaab ntawv nuav xaa tuaj rua mej cov kws ntseeg Vaajtswv huv lub nroog Efexus. Mej yog cov kws nrug Yexus Khetos koom ib txujsa hab muab sab rau ntseeg Vaajtswv.

²Peb thov Vaajtswv tug kws yog peb leej Txiv, hab tug Tswv Yexus Khetos foom koob moov rua mej hab pub kuas mej tau nyob kaaj sab lug.

³Peb ca le ua Vaajtswv kws yog peb tug Tswv Yexus Khetos leej Txiv tsaug! Vim peb nrug Yexus Khetos koom ib txujsa, Vaajtswv txhaj le foom ib puas tsaav yaam koob moov sau ntuj ceebtsheej lug rua peb.

⁴Thaus tsi tau tsim ntuj tsim teb, Vaajtswv tub xub xaiv peb lug nrug Yexus Khetos koom ib txujsa hab lug ua Vaajtswv tsaav tuabneeg lawm. Vaajtswv ua le ntawd, mas peb cov kws Vaajtswv naj nub tsomkwm txhaj yuav ua tau tuabneeg zoo kawg nkaus tsi muaj ib qhov txhum taabmeeg Vaajtswv le. Vim Vaajtswv hlub peb,

⁵Vaajtswv txhaj xub xaav tseg lawm has tas, Vaajtswv yuav khaiv Yexus Khetos lug coj peb moog ua Vaajtswv cov mivnyuas. Qhov ntawd hum Vaajtswv sab hab lawv le Vaajtswv tau xaav tseg lawm.

⁶Peb ca le qhuas Vaajtswv tug kws hlub peb. Vim peb ntseeg Vaajtswv leej Tub kws nwg hlub kawg nkaus, mas Vaajtswv txhaj pub nwg txuj koob moov dlawb dlawb rua peb.

⁷Vim Yexus Khetos tuag txhwv peb lub txim, Vaajtswv txhaj zaam txim rua peb. Vaajtswv txujkev hlub luj kawg le.

⁸Vaajtswv txuj koob moov kws Vaajtswv pub rua peb ntau nplua mag ntawd zoo kawg nkaus le! Vaajtswv tug kws muaj tswvyim hab paub ib puas tsaav yaam,

⁹tau khaiv Yexus Khetos lug ua kuas Vaajtswv teg num tav lawv le Vaajtswv tub xub xaav tseg lawm. Txij thaus u lug Vaajtswv tsi tau qha teg num ntawd rua leejtwg paub, tabsis nwgnuav nwg tub qha rua peb paub lawm.

¹⁰Teg num kws Vaajtswv yuav ua kuas tav ntawd, yog qhov kws Vaajtswv yuav coj ib puas tsaav yaam kws Vaajtswv tau tsim lug lawm, tsi has tej kws nyob sau nruab ntug hab tej kws nyob huv nplajteb lug nyob ua ke, hab Vaajtswv yuav tsaa Yexus Khetos ua ib puas tsaav yaam ntawd tug thawj. Thaus txug lub sijhawm kws Vaajtswv teem ca lawm, Vaajtswv yuav ua le ntawd.

¹¹Vaajtswv tub xaiv peb cov kws nrug Yexus Khetos koom ib txujsa lug ua Vaajtswv tsaav tuabneeg lawv le Vaajtswv tub xub xaav tseg thaus tsi tau tsim lub ntuj hab lub nplajteb lug lawm. Vaajtswv ua le ntawd, rua qhov Vaajtswv yeej ua ib puas tsaav yaam lawv le Vaajtswv pum zoo hab lawv le Vaajtswv tub xub xaav tseg lawm.

¹²Yog le ntawd peb cov kws tub xub tso sab rua Yexus Khetos, peb ca le qhuas Vaajtswv tug kws muaj tshwjchim.

¹³Mej cov los kuj ib yaam le peb hab. Thaus mej tau nov txujmoo zoo kws yog txujlug tseeb kws cawm tau kuas mej dlim mej lub txim, mej txhaj ntseeg Yexus Khetos. Vaajtswv pub Vaaj Ntsujplig tug Dlawbhuv rua mej lawv le nwg tau coglug tseg rua mej lawm. Vaaj Ntsujplig tug Dlawbhuv ntawd yog lub homthawj kws Vaajtswv nas rua mej. Vaajtswv ua le ntawd yog qha rua mej paub has tas, mej yog Vaajtswv tsaav tuabneeg lawm.

¹⁴Qhov kws Vaajtswv pub Vaaj Ntsujplig tug Dlawbhuv rua peb ntawd yog ib qhov tseemceeb kws qha rua peb paub has tas, peb yuav tau tej kws Vaajtswv tau coglug lawm has tas, Vaajtswv yuav muab pub rua nwg tsaav tuabneeg. Hab qha rua peb paub has tas, Vaajtswv yuav ca nwg cov tuabneeg tau nyob ywjpheej. Peb ca le qhuas Vaajtswv tug kws muaj tshwjchim.

¹⁵Tub yog vim le ntawd, txij thaus kuv nov has tas mej muab sab rau ntseeg tug Tswv Yexus hab hlub Vaajtswv tsaav tuabneeg txhua tug,

¹⁶mas kuv naj nub ua Vaajtswv tsaug tsi tseg tsi tu. Kuv ncu ntsoov thov Vaajtswv paab mej.

¹⁷Kuv thov peb tug Tswv Yexus Khetos tug Vaajtswv, hab tug kws yog peb leej Txiv tug kws muaj fwjchim ci ntsaa ab, pub Vaaj Ntsujplig tug Dlawbhuv rua mej. Tug Ntsujplig ntawd yuav pub tswvyim rua mej hab qha Vaajtswv rua mej, kuas mej paub Vaajtswv heev zuj zug ntxiv.

¹⁸Kuv thov Vaajtswv qheb mej lub sab kuas mej totaub zoo, mej txhaj paub has tas mej cov kws Vaajtswv tub hu lug cuag nwg lawm, mej ca sab le caag rua Vaajtswv. Hab txuj koob moov kws Vaajtswv coglug tseg has tas, Vaajtswv yuav pub rua Vaajtswv tsaav tuabneeg zoo npaum le caag.

¹⁹Hab paub has tas, Vaajtswv lub fwjchim kws ua num huv peb cov ntseeg lub sab, luj npaum le caag.

²⁰Lub fwjchim ntawd tub yog lub kws Vaajtswv tsaa Yexus Khetos sawv huv qhov tuag rov qaab lug, hab coj Yexus moog nyob ntawm Vaajtswv saab xis sau ntuj ceebtsheej.

²¹Yexus Khetos nyob sau ntuj ceebtsheej kaav cov timtswv, kaav tej vaajntxwv hab tej numtswv kws muaj fwjchim kaav huv nplajteb nuav huv tuabsi. Yexus Khetos muaj fwjchim luj dlua tej numtswv kws suavdlawg fwm, tsi has tam nuav lossis tam tom ntej.

²²Vaajtswv muab ib puas tsaav yaam huv tuabsi rua Yexus Khetos kaav, hab Vaajtswv tsaa Yexus Khetos ua tug thawj saib cov ntseeg hab ib puas tsaav yaam taagnrho.

²³Cov ntseeg yog Yexus Khetos lub cev kws muaj txhua yaam txhij. Yexus Khetos yog tug kws ua rua ib puas tsaav yaam kws nyob txhua qhov muaj txhij muaj txhua.