Read Hmong Njua Efexaus 2 Bible Online

Efexaus 2 - Hmong Njua bible

Efexaus 2

¹Yaav taag lug mej zoo le cov tuabneeg kws tuag lawm, rua qhov mej tsi noog Vaajtswv lug hab mej ua txhum.

²Thaus ntawd mej tseem nyam ua ib yaam le tej tuabneeg kws nyob huv nplajteb nuav ua, hab mej ua lawv le tug kws kaav sau nruab ntug qha mej. Tug ntawd yog tug Dlaab Ntxwgnyoog kws nwgnuav kaav cov tuabneeg kws tsi noog Vaajtswv lug.

³Txawm yog peb cov los yaav taag lug, peb yeej ua ib yaam le puab hab, peb ntshaw kev phem kev qas hab peb ua lawv le peb lub cev hab peb lub sab ibtxwm nyam ua, yog le ntawd Vaajtswv yeej yuav rau txim rua peb ib yaam le Vaajtswv rau rua lwm tug.

⁴Tabsis Vaajtswv hlub peb kawg nkaus le.

⁵Peb tsi noog Vaajtswv lug, hab peb zoo le cov tuabneeg kws tuag lawm los Vaajtswv tseem pub peb rov muaj txujsa ib yaam le Vaajtswv tau tsaa Yexus Khetos sawv huv qhov tuag rov qaab lug. Vaajtswv hlub mej kawg le, Vaajtswv txhaj le cawm kuas mej dlim.

⁶Vim peb nrug Yexus Khetos koom ib txujsa, Vaajtswv txhaj tsaa peb nrug Yexus Khetos sawv rov qaab lug. Vaajtswv ua le ntawd kuas peb tau nrug Yexus Khetos kaav sau ntuj ceebtsheej.

⁷Txij nuav moog rua yaav tom ntej, tej kws Vaajtswv ua ntawd yuav qha rua suavdlawg paub has tas, Vaajtswv foom koob moov ntau kawg nkaus rua peb cov kws ntseeg Yexus Khetos, rua qhov Vaajtswv hlub peb heev.

⁸Vaajtswv tug kws hlub mej, nwg cawm mej dlim, tub yog vim mej ntseeg. Qhov kws mej dlim ntawd, tsi yog vim mej ua num zoo, tabsis yog Vaajtswv ca le pub dlawb rua mej xwb.

⁹Qhov kws mej dlim tsi yog mej tug dlaag tug zug ua, mas mej txhaj tsi muaj lug khaav tau.

¹⁰Peb yog cov kws Vaajtswv txhais teg puab. Vaajtswv tsim peb lug nrug Yexus Khetos koom ib txujsa, kuas peb ua tau tej num zoo kws Vaajtswv tub xub npaaj tseg ca rua peb ua lawm.

¹¹Cov Yudais hu mej cov kws yog lwm Tsaav Tuabneeg has tas, cov kws tsi ua kevcai txav, puab hu mej le ntawd, rua qhov puab yeej hu puab ua cov kws ua kevcai txav. Txuj kevcai txav yeej yog yaam kws tuabneeg txhais teg ua rua tuabneeg lub cev. Mej cov kws yog lwm Tsaav Tuabneeg, mej yuavtsum ncu ntsoov has tas yaav taag lug mej yeej tsi yog cov kws ua kevcai txav.

¹²Mej yeej yog lwm tsaav tuabneeg, mej tsi yog cov kws Vaajtswv xaiv ca lawm, Mej tsi muaj feem nrug Vaajtswv tsaav tuabneeg tau tej koob moov kws Vaajtswv coglug tseg yuav muab pub rua cov tuabneeg kws nwg xaiv tseg lawm. Mej nyob huv nplajteb nuav, mej tsi muaj chaw ca sab, hab mej tsi paub Vaajtswv.

¹³Tabsis nwgnuav mej cov kws yaav taag lug nyob nrug dleb, mej tub lug nrug Yexus Khetos koom ib txujsa lawm. Vim Yexus Khetos tuag txhwv mej, Vaajtswv txhaj coj mej lug cuag Vaajtswv.

¹⁴Rua qhov Yexus Khetos tub lug ua rua cov Yudais hab lwm tsaav tuabneeg ua tau ib paab lawm, peb txhaj nyob tau ua ke. Saab phaab ntsaa kws kem nruab nraab kuas ob tog ua yeebncuab, Yexus Khetos tub lug muab rhuav lawm.

¹⁵Nwg rhuav cov Yudais txuj kevcai, tsi has tej kws puab qha hab tej kws puab txwv. Nwg ua le ntawd, tub yog nwg tsim dlua ib paab tuabneeg tshab tawm huv ob paab tuabneeg ntawd lug nrug nwg sis raug zoo.

¹⁶Vim Yexus Khetos tuag le ntawd, nwg txhaj rhuav tau qhov kws ob tsaav tuabneeg ntawd ua yeebncuab kuas puab lug ua tau ib paab, hab coj puab rov lug cuag Vaajtswv.

¹⁷Yog le ntawd, Yexus Khetos txhaj lug qha txujmoo zoo kws ua rua suavdlawg nyob taug ua ke, tsi has mej cov kws yog lwm tsaav tuabneeg kws nyob nrug dleb Vaajtswv hab cov Yudais kws nyob ze Vaajtswv.

¹⁸Yog le ntawd peb txhua tug kws ntseeg Yexus Khetos, tsi has cov Yudais hab lwm Tsaav Tuabneeg, peb moog cuag tau Vaajtswv, rua qhov peb puavleej koom Vaajtswv tuab tug Ntsujplig xwb.

¹⁹Yog le ntawd mej cov kws yog lwm tsaav tuabneeg, mej tsi yog lwm tsaav tuabneeg lawm, mej yog Vaajtswv tsaav tuabneeg. Mej muaj feem ib yaam nkaus le Vaajtswv tsaav tuabneeg, hab mej yog Vaajtswv tsev tuabneeg lawm.

²⁰Vaajtswv muab mej lug ua rua sau lub qua tsev kws cov timthawj hab cov cev Vaajtswv lug tub ncaws ca lawm. Tug ncej taag ntawd yog Yexus Khetos ntaag.

²¹Yexus yog tug kws txheem lub tsev ntawd kuas khov, hab ua kuas tav, txhaj le tau ib lub tuamtsev kws zoo kawg nkaus rua Vaajtswv nyob.

²²Vaajtswv taabtom muab mej cov hab puab cov txhua tug kws nrug Yexus Khetos koom ib txujsa, lug ua ib lub tsev rua Vaajtswv tug Ntsujplig nyob.