Read Hmong Njua Efexaus 3 Bible Online

Efexaus 3 - Hmong Njua bible

Efexaus 3

¹Tub yog vim le nuav kuv txhaj thov Vaajtswv paab mej. Vim kuv ua Yexus Khetos teg num paab mej cov kws yog lwm tsaav tuabneeg, kuv txhaj raug kaw rua huv tsev lojcuj.

²Kuv xaav has tas nyaj mej yuav nov moo lawm has tas, Vaajtswv tug kws hlub kuv, tsaa kuv ua teg num nuav paab mej.

³Zaaj kws yaav taag lug Vaajtswv tsi tau qha rua leejtwg paub, nwgnuav Vaajtswv tub qha rua kuv paub lawm. (Kuv tub sau mivntsiv has txug zaaj nuav lawm.

⁴Yog mej nyeem tej kws kuv sau ntawd, mej yuav paub has tas kuv totaub le caag txug Yexus Khetos zaaj kws Vaajtswv muab zais ca lawm.)

⁵Yaav taag lug Vaajtswv tsi qha rua leejtwg paub, tabsis nwgnuav Vaajtswv tug Ntsujplig tub qha rua cov timthawj hab cov cev Vaajtswv lug paub lawm.

⁶Zaaj kws Vaajtswv muab zais ca ntawd tub yog txujmoo zoo kws qha has tas, Vaajtswv foom koob moov rua lwm Tsaav Tuabneeg, ib yaam le Vaajtswv foom rua cov Yudais. Ob co puavleej yog tuab lub cev tej teg taw, hab suavdlawg puavleej yuav tau tej kws Vaajtswv coglug tseg lawm has tas, nwg yuav pub rua cov kws ntseeg Yexus Khetos.

⁷Vaajtswv hlub kuv, Vaajtswv txhaj le tsaa kuv ua nwg ib tug tubkhai qha Txujmoo Zoo. Hab Vaajtswv pub nwg lub fwjchim rua kuv, kuv txhaj ua tau teg num nuav.

⁸Kuv yog tug kws muaj fwjchim yau dlua Vaajtswv tsaav tuabneeg txhua tug huv tuabsi los Vaajtswv tseem muab Txujmoo Zoo kws has txug Yexus Khetos txuj koob moov kws tsimtxaj kawg nkaus rua kuv coj moog qha lwm Tsaav Tuabneeg.

⁹Hab qha rua suavdlawg paub has tas, Vaajtswv ua le caag ua tau lawv le tej kws Vaajtswv muab zais ca lawm. Vaajtswv tug kws tsim ib puas tsaav yaam huv tuabsi tub muab zaaj ntawd zais ca thaus tsim lub ntuj hab lub nplajteb lawm.

¹⁰Nwg ua le ntawd, naj nub nwgnuav cov timtswv ceebtsheej kws kaav sau ntuj, hab cov kws muaj fwjchim txhaj yuav paub ib puas tsaav yaam kws yog Vaajtswv lub fwjchim ua. Qhov kws puab yuav paub tej nuav yog vim puab pum teg num kws cov ntseeg ua.

¹¹Tej kws Vaajtswv ua nuav yog lawv le tej kws Vaajtswv tub xub xaav tseg thaus u lug lawm. Hab Vaajtswv khaiv peb tug Tswv Yexus Khetos lug ua kuas tej ntawd tav.

¹²Vim peb ntseeg hab nrug Yexus Khetos koom ib txujsa, peb txhaj muaj cuabkaav moog cuag Vaajtswv.

¹³Yog le ntawd kuv thov qha rua mej has tas, mej tsi xob poob sab rua qhov kws kuv raug kev txomnyem paab mej. Qhov kws kuv raug le nuav yeej yuav muaj nqes rua mej.

¹⁴Tub yog vim le nuav kuv txhaj txhus caug ndlua ntawm Vaaj leej Txiv lub xubndlag,

¹⁵nwg yog tug kws txhua tsaav tuabneeg tsi has cov kws nyob sau ntuj ceebtsheej hab cov kws nyob huv nplajteb nuav hu has tas, leej Txiv.

¹⁶Kuv thov Vaajtswv tug kws muaj koob moov ntau kawg nkaus pub nwg tug Ntsujplig lub fwjchim rua mej, kuas mej muaj lub sab tawv,

¹⁷hab kuv thov Yexus Khetos lug nyob huv mej lub sab. Kuv thov Vaajtswv paab kuas mej muab sab npuab Vaajtswv ib yaam le tsob ntoo kws tej caag ntsa aav tub tub, hab kuas mej puv npo txujkev hlub.

¹⁸Kuas mej hab Vaajtswv tsaav tuabneeg txhua tug muaj cuabkaav totaub has tas, Yexus Khetos txujkev hlub dlaav le caag, ntev le caag, sab le caag hab tub le caag.

¹⁹Hab kuas mej paub Vaajtswv txujkev hlub kws tsi muaj leejtwg paub txug, mej txhaj yuav paub tej kws Vaajtswv ua txhij txhua.

²⁰Peb ca le ua Vaajtswv tsaug, rua qhov Vaajtswv tug kws muaj fwjchim, nwg nyob huv peb lub sab. Nwg ua tau ib puas tsaav yaam ntau dlua le tej kws peb thov hab tej kws peb xaav.

²¹Peb cov ntseeg yuavtsum nrug Yexus Khetos ua kuas Vaajtswv tau koob meej ib tam dlhau ib tam moog ibtxhis le! Amees.