Read Hmong Njua Efexaus 4 Bible Online

Efexaus 4 - Hmong Njua bible

Efexaus 4

¹Kuv yog tug kws raug kaw rua huv tsev lojcuj, rua qhov kuv ua Vaajtswv teg num. Kuv thov mej ua mej lub neej kuas phim qhov kws Vaajtswv tub hu mej lug ua Vaajtswv tsaav tuabneeg lawm.

²mej yuavtsum txu fwjchim, ua sab dlawb sab zoo hab ua sab ntev. mej ib leeg yuavtsum paab ib leeg, suavdlawg txhaj paub has tas mej sis hlub tag.

³Vaajtswv tug Ntsujplig tub ua rua mej sis raug zoo lawm, hab qhov kws mej sis raug zoo ntawd, tub nqug mej lug nyob ua ke sis hum lawm. Yog le ntawd, mej tsi xob ca ib yaam dlaabtsi ua rua mej nyob tsi taug ua ke.

⁴Peb suavdlawg puavleej koom ib lub cev hab peb koom Vaajtswv tuab tug Ntsujplig. Vaajtswv tub hu mej lug ua nwg tsaav tuabneeg lawm, mej txhaj muaj chaw ca sab ib yaam le peb.

⁵Peb koom tuab tug Tswv, muaj tuab txujkev ntseeg, hab muaj tuab txuj kevcai raus dlej xwb.

⁶Txhua tsaav tuabneeg puavleej koom tuab tug Vaajtswv, nwg yog suavdlawg Txiv. nwg yog tug kws kaav suavdlawg, nwg khaiv suavdlawg ua nwg teg num, hab nwg nyob huv suavdlawg lub sab.

⁷Yexus Khetos pub peb txhua tug nyag muaj nyag tswvyim.

⁸Lawv le Vaajtswv txujlug has tseg has tas: Thaus nwg moog rua sau ntuj kws yog qhov chaw sab, nwg coj cov tuabneeg kws raug luas nteg coob leej nrug nwg moog; hab nwg pub tswvyim rua nwg cov tuabneeg.

⁹Lu lug kws has tas, nwg moog rua sau ntuj, txhais has tas, nwg tub xub moog rua huv nruab aa qhov kws tub tshaaj plawg.

¹⁰Yog le ntawd, tug kws moog rua huv nruab aa tub yog tug kws moog rua sau ntuj ceebtsheej ntaag. Nwg txhaj nyob tau txhua qhov chaw.

¹¹Nwg yog tug kws pub koob moov rua tuabneeg, nwg tsaa qee leej ua timthawj, qee leej ua cov cev Vaajtswv lug, qee leej ua xwbfwb qha Txujmoo Zoo, qee leej ua cov xwbfwb qha, hab qee leej ua cov saib cov ntseeg.

¹²Nwg ua le ntawd tub yog nwg qha kuas cov ntseeg paub ua Vaajtswv teg num, cov ntseeg kws yog Yexus Khetos lub cev txhaj le yuav txawj luj hlub zuj zug

¹³moog txug thaus peb suavdlawg ua tau ib lub sab, ntseeg ib yaam nkaus, paub tseeb Vaajtswv tug Tub, hab ua tau lub neej zoo ib yaam le Yexus Khetos.

¹⁴Thaus ntawd peb yuav tsi ua le tej mivnyuas yau kws noog cov tuabneeg dlaag tej lug, hab lawv luas qaab rua nuav rua u. Cov tuabneeg dlaag ntawd txhobtxwm dlaag kuas suavdlawg yuam kev xwb.

¹⁵Peb tsi xob ua le puab, peb yuavtsum muaj txujkev hlub hab has lug tseeb, peb txhaj yuav ua tau lub neej zoo rua txhua faab le Yexus Khetos kws yog lub taubhau.

¹⁶Nwg yog tug kws kaav lub cev tej teg taw hab tej sab tej ntsws. Nwg muab tej ntawd lug sis txuas ua ke, hab nwg pub lub cev muaj tej qej txhaa, tej yaag txhaa txhaj lug sis dlhos ua ke. Yog le ntawd thaus tej teg taw nyag ua nyag teg num, hab sis hlub sis paab, ces lub cev txhaj le kheev hlub.

¹⁷Kuv thov qha tseeb rua mej lawv le kws Vaajtswv tub xub qha rua kuv lawm has tas, mej tsi xob ua le cov tuabneeg pe dlaab ua. Puab xaav tej zaaj kws tsi muaj nqes dlaabtsi le.

¹⁸Puab lub sab ruag hab tsaus ntuj nti lawm. Puab tsi tau txujsa kws Vaajtswv pub rua cov ntseeg, rua qhov puab tsi quavntsej hab puab tawv ncauj.

¹⁹Puab tsi paub txaajmuag, puab muab puab lub cev moog ua kev phem kev qas, puab tsi tswj puab lub sab, hab puab ua tej kws tsi tsimnyog ua.

²⁰Yexus Khetos zaaj kws mej kawm tub tsi qha kuas mej ua le ntawd.

²¹Mej tub nov nwg zaaj lawm, hab vim mej yog nwg cov thwjtim, mej txhaj tau kawm tej lug tseeb kws nwg qha.

²²Yog le ntawd mej yuavtsum muab mej lub sab qub kws mej ibtxwm coj tso povtseg, lub sab qub kws naj nub ntxag kuas mej ua kev phem kev qas ntawd taabtom yuav puamtsuaj moog.

²³Mej yuavtsum hloov dlua sab tshab.

²⁴Mej yuavtsum muab lub sab tshab lug coj. Lub sab tshab ntawd Vaajtswv tsim zoo le Vaajtswv tug yaam ntxwv, suavdlawg txhaj pum has tas mej ua mej lub neej ncaaj nceeg hab dlawbhuv.

²⁵Yog le ntawd mej tsi xob dlaag lawm. Txhua tug yuavtsum has lug tseeb rua kwvtij zej zog, rua qhov peb suavdlawg puavleej yog tej teg taw kws koom Yexus lub cev.

²⁶Yog thaus twg mej chim, mej tsi xob pub qhov kws mej chim ntawd ua rua mej ua txhum, hab tsi xob chim taag nub.

²⁷Tsi xob ca dlaab Ntxwgnyoog tau kev ntxag mej.

²⁸Tug kws ibtxwm nyag luas tug tsi xob nyag lawm. Nwg khwv ntawm nwg teg zoo dlua, nwg txhaj le yuav muaj yaam nuav yaam u paab cov tuabneeg txomnyem.

²⁹Mej tsi xob has lug twm lwm tug, tabsis mej yuavtsum has tej lug zoo xwb txhaj muaj nqes rua cov kws noog.

³⁰Hab tsi xob ua rua Vaajtswv tug Ntsujplig tu sab; rua qhov Vaajtswv tug Ntsujplig yog Vaajtswv lub homthawj kws Vaajtswv muab nas rua mej lawm, kuas suavdlawg paub has tas mej yog Vaajtswv tsaav tuabneeg. Vaajtswv ua le ntawd kuas mej paub has tas, muaj ib nub Vaajtswv yuav tso mej dlim ntawm txujkev txhum.

³¹Mej yuavtsum muab mej lub sab phem, lub sab ua nruj ua tsiv, hab lub sab heev tso povtseg. Tsi xob sis caav sis tshe, tsi xob thuam lwm tug, hab tsi xob xaav ib yaam phem hlo le.

³²Mej yuavtsum ua sab dlawb sab zoo, ib leeg hlub ib leeg, hab ib leeg zaam txim rua ib leeg, ib yaam le Vaajtswv tub zaam txim rua mej cov kws ntseeg Yexus Khetos lawm.