Read Hmong Njua Efexaus 6 Bible Online

Efexaus 6 - Hmong Njua bible

Efexaus 6

¹Cov mivnyuas, mej yuavtsum noog mej nam mej txiv lug, txhaj lawv le tug Tswv txuj kevcai.

²Vaajtswv txuj kevcai qha has tas, “Mej yuavtsum fwm mej nam mej txiv.” Nqai nuav yog thawj nqai kws Vaajtswv coglug has tas,

³“Yog mej ua le ntawd, mej yuav noj qaab nyob zoo hab muaj txujsa nyob ntev huv nplajteb nuav.”

⁴Mej cov kws ua nam ua txiv, mej tsi xob ua rua mej tej mivnyuas chim. Mej yuavtsum qhuab ntuag mej tej mivnyuas lawv le Vaajtswv txujlug qha.

⁵Mej cov kws yog tubqhe, mej txhua tug yuavtsum noog mej cov tswv lug, hab paub ntshai puab. Mej yuavtsum rau sab ntso ua mej teg num tag tag, ib yaam le mej ua rua Yexus Khetos.

⁶Mej tsi xob ua num thaus cov tswv pum kuas puab qhuas mej xwb, tabsis mej yuavtsum rau sab ntso ua lawv le Vaajtswv lub sab nyam, rua qhov mej yog Yexus Khetos cov tubqhe.

⁷Yog le ntawd mej cov kws yog tubqhe, mej yuavtsum zoo sab hlo ua mej teg num ib yaam le mej ua rua Vaajtswv, tsi yog ua rua tuabneeg.

⁸Mej ncu ntsoov has tas Vaajtswv yuav muab nqe zug rua txhua tug kws ua num zoo, tsi has cov kws ua qhev hab cov kws tsi ua qhev.

⁹Mej cov kws ua tswv, mej yuavtsum ua zoo ib yaam le ntawd rua mej cov tubqhe, mej tsi xob ua phem rua puab. Mej yuavtsum ncu ntsoov has tas, mej hab mej cov tubqhe puavleej muaj tuab tug TSWV nyob sau ntuj ceebtsheej, nwg yog tug txav txim rua txhua tug ib yaam nkaus.

¹⁰Thaus kawg nuav kuv qha rua mej has tas, mej yuavtsum nrug tug Tswv sis raug zoo, mej txhaj le yuav muaj zug, hab tau nwg lub fwjchim kws luj kawg nkaus.

¹¹Mej yuavtsum muab tej cuabyeej kws Vaajtswv pub rua mej lawm lug naav. Yog mej ua le ntawd thaus dlaab Ntxwgnyoog tuaj ntxag mej, mej txhaj yuav kovyeej.

¹²Rua qhov tsi yog peb tawmtsaam tuabneeg, tabsis yog peb tawmtsaam tej dlaab kws nyob sau nruab ntug, tsi has cov thawj, tej kws muaj fwjchim hab tej fwjchim kws kaav tam tsaus ntuj.

¹³Yog le ntawd, nwgnuav mej yuavtsum muab Vaajtswv tej cuabyeej lug naav. Yog mej ua le ntawd thaus dlaab Ntxwgnyoog lug tawmtsaam mej, mej txhaj kovyeej. Hab thaus tej kev tawmtsaam ntawd dlhau lawm, mej txhaj tseem nyob ruaj nreeg.

¹⁴Yog le ntawd mej yuavtsum npaaj tog. Ca le muab txujlug tseeb lug ua hlaab sa, muab kev ncaaj nceeg lug ua dlaim hlau thaiv hauvsab.

¹⁵Hab mej yuavtsum muab lub sab kub lug moog qha txujmoo zoo kws has txug txujkev kaaj sab lug ua khau rau.

¹⁶Mej yuavtsum naj nub tuav txujkev ntseeg thaiv mej, ib yaam le mej tuav dlaim thaiv nav ntaaj. Yog mej ua le ntawd, mej yuav tua tau dlaab Ntxwgnyoog xibxub suavtawg kws nwg tua tuaj.

¹⁷Ca le muab txujkev dlim txim kws Vaajtswv pub rua mej lawm coj lug ua mom hlau ntoo. Hab muab Vaajtswv txujlug kws Vaajtswv tug Ntsujplig pub rua mej, coj lug ua raab ntaaj.

¹⁸Ib puas tsaav yaam kws mej ua nuav, mej yuavtsum thov Vaajtswv paab hab. Mej yuavtsum thov Vaajtswv txhua lub sijhawm lawv le Vaajtswv tug Ntsujplig coj mej. Vim le ntawd mej yuavtsum ceevfaaj hab ua sab ntev thov Vaajtswv tsi xob nkeeg. Hab naj nub thov Vaajtswv paab cov ntseeg suavdlawg.

¹⁹Hab mej thov Vaajtswv paab kuv, kuas thaus kuv qha Vaajtswv txujlug, kuv muaj lub sab tawv qha Txujmoo Zoo lub ntsab lug rua suavdlawg paub.

²⁰Txawm yog nwgnuav kuv raug kaw rua huv tsev lojcuj los kuv yeej yog ib tug xeebcom, vim kuv tseem qha txujmoo zoo, yog le ntawd thov mej thov Vaajtswv paab kuas kuv muaj sab tawv qha Txujmoo Zoo kws kuv yuavtsum qha.

²¹Peb tug kwv Tikhikus kws peb hlub, nwg yog ib tug tubkhai kws ua tug Tswv teg num, nwg yuav qha txhua yaam num kws kuv ua rua mej, mej txhaj paub has tas kuv nyob le caag.

²²Tub yog vim le ntawd kuv txhaj le khaiv nwg tuaj saib mej. Kuv kuas nwg qha rua mej paub has tas, peb suavdlawg nyob le caag, hab nwg yuav txhawb mej tug zug.

²³Thov Vaajtswv tug kws yog peb leej Txiv hab tug Tswv Yexus Khetos paab kuas mej cov ntseeg tau nyob kaaj sab lug, kuas mej muab sab rau ntseeg hab ib leeg txawj hlub ib leeg.

²⁴Thov Vaajtswv txuj koob moov nyob nrug txhua tug kws muaj lub sab hlub peb tug Tswv Yexus Khetos moog ibtxhis le.