Read Hmong Njua Filipis 1 Bible Online

Filipis 1 - Hmong Njua bible

Filipis 1

¹Kuv yog Paulus hab Timautes kws yog Yexus Khetos ob tug tubkhai, wb sau tsaab ntawv nuav xaa tuaj rua mej txhua tug kws ntseeg Vaajtswv kws nyob huv lub nroog Filipis kws koom nrug Yexus Khetos, hab cov txwjlaug kws saib cov ntseeg hab cov kws paab ua Vaajtswv teg num:

²Thov Vaajtswv tug kws yog peb leej Txiv hab Tswv Yexus Khetos foom koob moov rua mej, hab paab kuas mej tau zoo nyob kaaj sab lug.

³Txhua zag kws kuv ncu txug mej suavdlawg, kuv ncu ntsoov ua kuv tug Vaajtswv tsaug;

⁴hab txhua zag kws kuv thov Vaajtswv paab mej, kuv zoo sab kawg le,

⁵rua qhov mej tau paab kuv ua teg num kws qha Txujmoo Zoo txij thaus hauvpaug lug txug naj nub nwgnuav.

⁶Yog le ntawd kuv txhaj ca sab has tas, Vaajtswv tug kws pib ua num zoo rua huv mej lub sab lawm, nwg yeej yuav ua kuas teg num ntawd tav rua nub kws Yexus Khetos lug.

⁷Qhov kws kuv ncu ntsoov mej txhua tug ntawd yeej tsimnyog lawm, rua qhov kuv hlub mej txhua tug! Mej suavdlawg puavleej nrug kuv tau txuj koob moov kws Vaajtswv pub rua kuv, tsi has thaus kuv raug kaw rua huv tsev lojcuj hab thaus luas tso kuv tawm lug has dlaws tej kws luas thuam Txujmoo Zoo, hab ua kuas suavdlawg paub has tas Txujmoo zoo yeej tseemceeb.

⁸Qhov kws kuv has rua mej has tas, kuv hlub mej ib yaam le Yexus Khetos hlub, Vaajtswv yeej paub has tas kuv has tseeb.

⁹Tej lug kws kuv thov Vaajtswv paab mej, kuv thov kuas mej ib tug txawj hlub ib tug heev zuj zug, kuas mej paub tseeb hab totaub txhua yaam huv tuabsi.

¹⁰Kuv thov Vaajtswv paab mej le ntawd, mej txhaj le yuav paub has tas yaam twg yog yaam kws zoo dlua ndlais. Yog mej paub le ntawd lawm, ces thaus txug Nub kws Yexus Khetos rov qaab lug, mej txhaj yuav zoo kawg nkaus tsi muaj ib qho txhum le.

¹¹Tub yog vim Yexus Khetos nyob huv mej lub sab lawm, mej txhaj ua tau mej lub neej zoo kawg nkaus rua Vaajtswv tau ntsejmuag.

¹²Cov kwvtij, kuv xaav qha rua mej paub has tas, tej kev tsimtxom kws kuv raug, tej ntawd tub ua rua Txujmoo zoo nrov nchaa moog thoob plawg txhua qhov chaw lawm.

¹³Vim kuv raug kev tsimtxom, cov tubrog kws zuv fuabtais tsev hab txhua tug kws nyob ntawm nuav, puab txhaj paub has tas, qhov kws kuv raug kaw huv tsev lojcuj ntawd, tub yog vim kuv ua Yexus Khetos tug tubkhai.

¹⁴Hab qhov kws kuv raug kaw huv tsev lojcuj ntawd, qhov ntawd ua rua cov kwvtij ntseeg muab sab rau ntseeg tug Tswv heev ntxiv, hab ua rua puab muaj lub sab tawv moog qha Vaajtswv txujlug tsi ntshai leejtwg le.

¹⁵Muaj qee leej qha Yexus Khetos zaaj, rua qhov puab khib hab puab nyam sis caav sis tshe, tabsis muaj qee leej muaj lub sab ncaaj qha tag tag.

¹⁶Puab cov nuav hlub kuv puab txhaj qha le ntawd, rua qhov puab yeej paub has tas, Vaajtswv tsaa kuv ua tug kws teb cov tuabneeg kws thuam Txujmoo Zoo.

¹⁷Tabsis cov tuabneeg kws tsi muaj lub sab ncaaj qha, puab qha kuas suavdlawg qhuas puab xwb; puab xaav has tas puab yuav ua kuas kuv hajyam nyuaj sab heev, thaus kws kuv tseem raug kaw huv tsev lojcuj nuav.

¹⁸Txawm yog puab muaj lub sab ncaaj qha lossis tsi muaj los kuv yeej tsi poob sab le. Tsuav yog puab qha Yexus Khetos zaaj rua txhua qhov xwb, ces kuv yeej zoo sab lawm. Hab kuv yuav naj nub zoo sab,

¹⁹rua qhov kuv paub has tas vim mej thov Vaajtswv paab kuv, hab vim Yexus Khetos tug Ntsujplig paab kuv, luas yeej yuav tso kuv tawm huv tsev lojcuj xwb.

²⁰Rua qhov kuv yeej ca sab has tas Vaajtswv yuav paab kuas kuv tsi ua ib yaam dlaabtsi rua kuv txaajmuag le. Nwg yuav paab kuas kuv muaj lub sab tawv qha tsi has nwgnuav lossis thaus twg le, kuv lub neej txhaj yuav ua rua Yexus Khetos tau ntsejmuag. Txawm yog kuv yuav caj hab yuav tuag los kuv yeej yuav ua kuv lub neej kuas Yexus Khetos tau ntsejmuag.

²¹Thaus kuv tseem ua neej nyob nuav kuv nrug Yexus Khetos koom ib txujsa, thaus kuv tuag los kuv yeej yuav moog nrug Yexus Khetos nyob.

²²Kuv xaav moog nrug Yexus Khetos nyob, tabsis yog kuv teg num huv nplajteb nuav tseem muaj nqes, yog le ntawd kuv tsi paub has tas sov kuv yuav xaiv txuj twg txhaj le zoo.

²³Kuv ua ob lub sab. Kuv muaj ib lub sab xaav tso lub nplajteb nuav tseg hab moog nrug Yexus Khetos nyob ntshai yuav zoo dlua;

²⁴tabsis yog kuv nyob paab mej yuav muaj nqes rua mej heev.

²⁵Thaus kuv paub tseeb le nuav lawm, kuv txhaj xaav has tas kuv yuavtsum nrug mej nyob paab mej, kuas mej zoo sab rua tej kws mej tub ntseeg lawm,

²⁶yog le ntawd thaus kuv rov qaab tuaj nrug mej nyob, mej cov kws ntseeg Yexus Khetos, mej yuav zoo sab kawg le.

²⁷Tabsis qhov tseemceeb mej yuavtsum ua mej lub neej lawv le Yexus Khetos Txujmoo Zoo, yog mej ua le ntawd txawm yog kuv tuaj saib mej hab tsi tuaj los kuv yuav tau nov xuv has tas, mej muab sab rau ntseeg hab ua ib lub sab tawmtsaam yeebncuab kuas yeebncuab tsi xob rhuav tau Txujmoo Zoo kws mej ntseeg.

²⁸Mej tsi xob ntshai cov tuabneeg kws ua yeebncuab rua mej; yog mej ua sab tawv qhawv, puab txhaj paub has tas puab yuav kov tsi yeej mej, mej yuav kovyeej puab, rua qhov Vaajtswv yuav paab kuas mej kovyeej puab.

²⁹Txuj koob moov kws Vaajtswv pub rua mej tub yog qhov kws nwg hu mej lug ua Yexus Khetos teg num. Mej cov kws ua nwg teg num, tsi yog mej ntseeg nwg xwb, tabsis mej tseem yuav raug kev txomnyem hab.

³⁰Nwgnuav mej yuavtsum tawmtsaam ib yaam le kws mej tub pum kuv tawmtsaam lug lawm, hab lawv le mej tau nov has tas kuv tseem taabtom tawmtsaam.