Read Hmong Njua Filipis 2 Bible Online

Filipis 2 - Hmong Njua bible

Filipis 2

¹Qhov kws mej nrug Yexus Khetos koom ib txujsa, qhov ntawd ua rua mej muab sab rau ntseeg ntxiv, hab qhov kws Yexus Khetos hlub mej, ua rua mej zoo sab. Mej nrug Vaaj Ntsujplig sis raug zoo, mej txhaj muaj lub sab dlawb sab zoo hab ua rua mej ib leeg txawj hlub ib leeg.

²Kuv thov ntuag mej kuas mej txhua tug muaj lub sab xaav ib yaam nkaus, muaj lub sab hlub ib yaam nkaus hab suavdlawg koom ua ib lub sab, ib tug nrug ib tug sis raug zoo. Yog mej ua le ntawd, yuav ua rua kuv zoo sab kawg le.

³Mej tsi xob ua ib yaam dlaabtsi kuas zoo rua mej lossis kuas tuabneeg qhuas mej xwb; tabsis mej yuavtsum txu fwjchim hab ib tug tsi xob khaav has tas ib tug zoo dlua ib tug.

⁴Mej tsi xob xaav txug mej xwb, tabsis mej yuavtsum xaav txug lwm tug hab.

⁵Tsimnyog mej muaj lub sab zoo ib yaam le Yexus Khetos lub:

⁶Yexus yeej muaj fwjchim sis luag zog le Vaajtswv, tabsis nwg tsi tau xaav has tas, nwg yuav tuav lub fwjchim ntawd moog le.

⁷Tabsis nwg zoo sab tso ib puas tsaav yaam tseg, nwg lug yug ua tuabneeg. Nwg ua nwg lub neej zoo le ib tug tubkhai, hab nwg txu fwjchim.

⁸Nwg txu fwjchim hab naj nub ua lawv le Vaajtswv lub sab nyam, txawm yog tuabneeg muab nwg ntsa rua sau ntoo khaublig los nwg tseem noog Vaajtswv lug.

⁹Tub yog vim le nuav Vaajtswv txhaj tsaa nwg ua tug luj dlua ndlais, hab tis lub npe kws zoo tshaaj tej npe huv tuabsi rua nwg.

¹⁰Vaajtswv ua le ntawd kuas Yexus lub npe muaj koob meej, txhua tug, tsi has cov kws nyob sau ntuj ceebtsheej, cov kws nyob huv nplajteb nuav hab tej kws nyob huv nruab tivtxwv puavleej yuav txhus caug pe nwg,

¹¹hab txhua tug yuav leeg has tas Yexus Khetos yog tug Tswv, kuas Vaajtswv tug kws yog Leej Txiv txhaj tau koob meej.

¹²Yog le ntawd cov kwvtij kws kuv hlub, thaus kuv tseem nrug mej nyob, mej ibtxwm noog kuv lug, txawm yog nwgnuav kuv tsi nrug mej nyob lawm los mej yuavtsum noog kuv lug heev dlua yaav taag lug hab. Mej yuavtsum paub ntshai Vaajtswv ua ib ce tshee nyo, mej txhaj yuav dlim mej lub txim,

¹³rua qhov Vaajtswv yog tug kws naj nub ua num huv mej lub sab kuas mej xaav ua Vaajtswv teg num, hab ua tau lawv le Vaajtswv lub sab nyam.

¹⁴Ib puas tsaav yaam kws mej ua mej tsi xob ywg hab tsi xob sis caav sis tshe,

¹⁵mej txhaj yuav ua tau tuabneeg zoo kws tsi muaj leejtwg yuav thuam tau, hab ua tau Vaajtswv cov mivnyuas kws zoo kawg nkaus kws nrug cov tuabneeg tsi ncaaj hab muaj txim nyob ua ke huv nplajteb nuav. Thaus mej qha Vaajtswv txujlug kws cawm tuabneeg txujsa,

¹⁶mej yuavtsum ci rua puab ib yaam le cov nubqub kws ci sau nruab ntug. Yog mej ua le ntawd thaus txug nub kws Yexus Khetos rov qaab lug kuv yuav tau ntsejmuag. Rua qhov thaus ntawd suavdlawg yuav pum has tas, tej num kws kuv siv siv zug ua muaj nqes heev.

¹⁷Txawm yog muab kuv cov ntshaav fij rua Vaajtswv, txhaj ua rua mej kev ntseeg tav los kuv yeej zoo sab; yog kuv zoo sab mej yeej yuav zoo sab hab.

¹⁸Ib yaam nkaus le ntawd, tsimnyog mej yuav zoo sab hab ua rua kuv zoo sab.

¹⁹Kuv ca sab has tas, yog peb tug Tswv pum zoo, tsi ntev nuav kuv yuav khaiv Timautes tuaj saib mej, hab thaus nwg coj mej xuv lug qha rua kuv lawm, kuv yuav qaab sab nyob.

²⁰Timautes tuab leeg xwb, txhaj le xaav ib yaam le kuv hab mob sab txug mej.

²¹Dlua le lwm tug, puab tsuas xaav txug puab tej num xwb, puab tsi quavntsej Yexus Khetos tej num le.

²²Mej tub paub lawm has tas, Timautes teg num muaj nqes heev; nwg nrug kuv ua teg num kws qha Txujmoo Zoo ib yaam le wb yog ob txiv tub.

²³Yog le ntawd thaus twg kuv paub has tas puab yuav ua le caag rua kuv, kuv ca sab has tas kuv yuav tau khaiv Timautes tuaj qha rua mej sai sai.

²⁴Hab kuv ca sab has tas yog Vaajtswv pum zoo, tsi ntev nuav kuv yuav tau tuaj saib mej.

²⁵Kuv xaav has tas, kuv yuavtsum khaiv peb tug kwv Epafauditus kws mej khaiv tuaj paab kuv ntawd, rov qaab lug tim mej. Nwg nrug kuv ua num hab nwg ua ib tug tubrog ib yaam le kuv.

²⁶Nwg kub sab lug xaav pum mej suavdlawg hab nwg nyuaj sab kawg rua qhov kws mej tau nov has tas nwg mob.

²⁷Nwg yeej mob tag, nwg tub yuav laug tuag, tabsis Vaajtswv hlub nwg, Vaajtswv txhaj tsi pub nwg tuag. Tsi yog Vaajtswv hlub nwg ib leeg xwb, tabsis Vaajtswv taabncuab kuv hab. Vaajtswv tsi pub nwg tuag kuas kuv txhaj tsi muaj kev nyuaj sab.

²⁸Yog le ntawd, kuv txhaj le maaj khaiv nwg rov qaab lug tim mej, thaus nwg hab mej rov sis pum lawm, mej yuav zoo sab kawg le hab kuv yuav tsi nyuaj sab lawm.

²⁹Mej yuavtsum zoo sab hlo txais tog nwg, rua qhov nwg yog ib tug kwvtij kws ntseeg tug Tswv. Mej yuavtsum fwm tej tug tuabneeg kws muab sab rau ua num le nwg,

³⁰rua qhov nwg tuaj paab kuv ua tej kws mej paab tsi tau, nwg tub yuav laug tuag vim nwg ua Yexus Khetos teg num, nwg yeej tsi khauvxwm nwg txujsa le.