Read Hmong Njua Filipis 3 Bible Online

Filipis 3 - Hmong Njua bible

Filipis 3

¹Cov kwvtij, thaus kawg nuav kuv thov kuas mej ca le zoo sab qhov kws mej tau nrug tug Tswv koom ua ke. Qhov kws kuv rov sau tej kws kuv tub sau ib zag tuaj rua mej lawm, yeej tsi ua rua kuv nyuaj sab dlaabtsi, tabsis yuav ua rua mej paub ceevfaaj mej txhaj tsi yuam kev.

²Mej yuavtsum ceevfaaj cov tuabneeg kws ua phem ua qas, cov tuabneeg kws ua phem, hab cov tuabneeg kws muab puab lub cev hlais.

³Cov tuabneeg kws ua kevcai txav tag yog peb, tsi yog puab, peb paub pehawm Vaajtswv, rua qhov Vaaj Ntsujplig qha peb, hab peb zoo sab vim peb nrug Yexus Khetos koom ib txujsa, peb yeej tsi ca sab rua tej kevcai kws tuabneeg ua,

⁴yog kuv xaav ca sab rua tej ntawd los yeej tau. Kuv yeej paub tej ntawd huv tuabsi, yog leejtwg tseem xaav has tas, nwg ca sab rua tej kevcai kws tuabneeg ua, kuv hajyam muaj chaw ca sab rua tej ntawd heev dlua nwg.

⁵Thaus yug kuv tau yim nub lawm, puab muab kuv ua kevcai txav. Kuv yeej yog tuabneeg Yixalayees, kuv yog xeem Npeenyamees, kuv yog tuabneeg Henplais, kuv yug huv tsaav tuabneeg Henplais. Yog yuav has txug qhov kws coj lawv le cov Yudais tej kevcai, kuv yeej yog tug kws coj lawv le cov Falixais paab.

⁶Yaav taag lug kuv coj txuj kevcai nuav nruj heev, kuv txhaj le tsimtxom cov ntseeg Yexus. Yog Vaajtswv coj tug kws xyum ua lawv le Vaajtswv txuj kevcai lug nrug Vaajtswv sis raug zoo lawm, ces Vaajtswv yuav xub coj kuv lug nrug Vaajtswv sis raug zoo, rua qhov kuv yeej coj lawv le txuj kevcai, kuv tsi tau ua txhum ib nqais le.

⁷Tabsis tej kws yaav taag lug kuv suav has tas muaj nqes, nwgnuav kuv tsi suav has tas tej ntawd muaj nqes lawm, rua qhov kuv xaav ua kuas hum Yexus Khetos sab.

⁸Tsi yog kuv suav has tas tej ntawd tsi muaj nqes xwb, tabsis yog txhua yaam huv tuabsi, rua qhov kuv xaav tau yaam kws muaj nqes heev dlua tej ntawd; yaam kws kuv xaav tau ntawd yog qhov kws kuv xaav muab sab npuab Yexus Khetos tug kws yog kuv tug Tswv heev dlua yaav taag lug. Kuv ua kuv lub neej kuas hum Yexus Khetos sab, kuv txhaj le tso ib puas tsaav yaam tseg. Kuv saib tej ntawd zoo ib yaam le tej lamsim kws luas muab povtseg lawm xwb; kuv ua le ntawd kuas kuv txhaj tau Yexus Khetos lug ua kuv tug Tswv

⁹hab kuas kuv tau nrug nwg koom ib txujsa. Txawm yog kuv xyum ua lawv le Vaajtswv txuj kevcai los Vaajtswv yeej tsi suav has tas kuv yog tuabneeg ncaaj nceeg. Tabsis qhov kws Vaajtswv suav has tas kuv yog tuabneeg ncaaj nceeg, tub yog vim kuv ntseeg Yexus Khetos. Txhua tug kws ntseeg, Vaajtswv yeej suav has tas puab yog cov kws ncaaj nceeg.

¹⁰Yaam kws kuv xaav yuav heev dlua lwm yaam huv tuabsi yog qhov kws kuv xaav paub Yexus Khetos hab xaav tau lub fwjchim kws ua rua Yexus sawv huv qhov tuag rov qaab lug. Kuv zoo sab nrug nwg raug kev txomnyem hab kuv xaav muaj lub sab zoo le nwg lub thaus nwg raug kev tuag,

¹¹kuv ca sab has tas Vaajtswv yeej yuav tsaa kuv sawv huv qhov tuag rov qaab lug.

¹²Kuv tsi tau khaav has tas kuv tub tau tej kws kuv has lug nuav lawm lossis ua tau kuv lub neej zoo kawg nkaus lawm, tabsis kuv tseem taabtom siv zug ua saib kuv puas tau tej ntawd lug ua kuv tug, ib yaam le Yexus Khetos tau coj kuv lug ua nwg tug lawm.

¹³Cov kwvtij, kuv tsi tau xaav has tas, kuv tub dlha moog txug tom kawg lawm; tsuas muaj ib yaam kws kuv yuav ua xwb, yaam ntawd yog le nuav: kuv yuav tsi cim ntsoov tej kws kuv ua taag lug lawm, tabsis kuv yuav siv zug ntsog moog kuas txug tej kws nyob tom hauv ntej.

¹⁴Yog le ntawd, kuv txhaj le dlha ncaaj nraim moog rua tug nrim tom kawg kuas kuv tau nqe zug. Qhov nqe zug ntawd yog txujsa kws Vaajtswv khaws ca rua sau ntuj ceebtsheej tog peb cov kws ntseeg Yexus Khetos.

¹⁵Peb cov kws paub Vaajtswv tseeb lawm, tsimnyog peb txhua tug xaav le ntawd. Tabsis yog mej cov muaj qee leej xaav lwm yaam lawm, Vaajtswv yuav qha yaam ntawd rua mej paub.

¹⁶Txawm yog le caag los peb yuavtsum coj lawv le tej kws peb tub paub lawm.

¹⁷Cov kwvtij, mej yuavtsum xyum ua lawv le kuv ua, peb tub ua yaam ntxwv rua mej xyum lawm, yog le ntawd mej yuavtsum saib cov tuabneeg kws coj lawv le peb ua, mej txhaj yuav paub ua.

¹⁸Muaj ntau leej tsi ua puab lub neej zoo, puab txhaj saib tsi taug qhov kws Yexus Khetos tuag sau tug ntoo khaublig. Kuv tub qha puab zaaj rua mej ntau zag lawm. Nwgnuav kuv rov qaab qha le nuav rua mej lug kuv kua muag kawg le.

¹⁹Thaus kawg cov tuabneeg ntawd yuav raug kev puamtsuaj, puab muab tej kev phem kev qas lug saib hlub dlua lwm yaam huv tuabsi. Yaam kws tub tsimnyog puab txaajmuag los puab tseem muab lug khaav, hab puab tsuas xaav txug tej kws yog nplajteb le xwb.

²⁰Peb yog tuabneeg qaum ntuj, peb naj nub ua sab ntev tog peb tug Cawmseej kws yog Tswv Yexus Khetos tug kws yuav lug sau ntuj lug.

²¹Nwg yuav muab peb lub cev kws txawj mob txawj tuag nuav hloov dlua tshab kuas zoo le nwg lub cev kws ci ntsaa ab tsi txawj mob tsi txawj tuag. Nwg ua tau le ntawd, rua qhov nwg muaj fwjchim muab ib puas tsaav yaam huv tuabsi lug rua nwg kaav.