Read Hmong Njua Filipis 4 Bible Online

Filipis 4 - Hmong Njua bible

Filipis 4

¹Yog le ntawd cov kwvtij, kuv hlub mej hab ncu mej heev! Mej ua rua kuv zoo sab hab ua rua kuv tau ntsejmuag kawg le! Cov kwvtij kws kuv hlub, mej yuavtsum muab sab rau ntseeg tug Tswv tsi xob tso nwg tseg.

²E-audias hab Xitikhes, kuv thov ntuag meb kuas meb nyob sis hum, txhaj tsimnyog qhov kws meb yog ob vivncaug kws ntseeg tug Tswv.

³Kuv qha tug kws nrug kuv ua num has tas, koj yuavtsum paab ob tug quaspuj ntawd, rua qhov obtug yog ob tug kws muab sab rau paab kuv qha Txujmoo Zoo, ib yaam le Kelemees hab cov kws nrug kuv ua num. Puab cov ntawd yog cov kws muaj lub npe sau rua huv Vaajtswv phoo ntawv kws Vaajtswv sau cov tuabneeg kws muaj txujsa ntev dlhawv moog ibtxhis lawm tej npe.

⁴Mej yuavtsum naj nub zoo sab, rua qhov mej tub nrug tug Tswv koom ib txujsa lawm. Kuv rov has ib lus ntxiv has tas: mej ca le zoo sab!

⁵Mej yuavtsum ua sab mog sab muas rua txhua tug. Tug Tswv tub yuav lug sai sai nuav.

⁶Mej tsi xob nyuaj sab rua ib yaam dlaabtsi hlo le, thaus mej thov Vaajtswv, mej ca le qha txhua yaam kws mej xaav yuav rua Vaajtswv, hab thaus mej thov mej yuavtsum ncu ntsoov ua Vaajtswv tsaug.

⁷Yeej tsi muaj leejtwg yuav paub qhov kws Vaajtswv ua rua mej muaj kev kaaj sab hab qhov kws mej nrug Yexus Khetos koom ib txujsa hab tej kws mej xaav huv tuabsi.

⁸Cov kwvtij, kuv thov xaus lug le nuav has tas, mej yuavtsum cim ntsoov tej kws zoo hab tsimnyog qhuas rua huv mej lub sab: tsi has tej kws tseeb, tej kws tsimnyog fwm, tej kws ncaaj nceeg, tej kws dlawbhuv, tej kws ntxim nyam hab tej kws yuav tau koob meej, mej yuavtsum khaws tej ntawd ca rua huv mej lub sab huv tuabsi.

⁹Mej yuavtsum ua lawv le tej kws mej kawm hab mej tau txais lug lawm, tsi has tej kws mej nov kuv qha hab tej kws mej pum kuv ua. Mej yuavtsum ua lawv le tej ntawd, Vaajtswv tug kws ua rua peb muaj kev kaaj sab, nwg txhaj yuav nrug nraim mej nyob.

¹⁰Qhov kws kuv nrug tug Tswv koom ib txujsa, qhov ntawd ua rua kuv zoo sab kawg le, mej tub tso kuv tseg tau ntev lug lawm, tabsis nwgnuav mej tsua rov qaab paab kuv dlua. Kuv has le nuav tsi yog kuv has tas mej tsi hlub kuv, qhov tseemceeb yog tsi muaj tuabneeg dlhau xwb, mej txhaj paab tsi tau kuv.

¹¹Kuv has le nuav tsi yog kuv ywg has tas tsi muaj tuabneeg hlub kuv, txawm yog kuv yuav nyob le caag los kuv yeej nyob tau.

¹²Kuv tub paub lawm has tas, thaus tsi muaj noj tsi muaj naav zoo le caag hab thaus muaj ntau lawm tsua zoo le caag. Kuv yeej paub tej kws tsi yoojyim totaub nuav, tsi has kuv nyob qhov twg hab lub sijhawm twg, yuav tshaib yuav tsau, yuav muaj ntau muaj tsawg los kuv yeej tsi txhawj.

¹³Vim Yexus Khetos txhawb kuv tug zug, kuv txhaj tiv taug txhua tsaav yaam huv tuabsi.

¹⁴Txawm yog le ntawd los kuv ua mej tsaug, rua qhov mej tub paab kuv thaus kuv raug kev txomnyem lawm.

¹⁵Mej cov kws yog tuabneeg Filipis, mej tub paub lawm has tas thaus kuv xub tuaj qha Txujmoo Zoo tim mej, tsi muaj leejtwg paab kuv le. Thaus kuv tawm huv Makedaunias moog, tsuas yog mej cov txhaj le paab kuv xwb. Mej muaj ntau muaj tsawg los mej puavleej xaa tuaj rua kuv.

¹⁶Thaus kuv nyob huv lub nroog Thexalaunikes, mej xaa qhov txhua chaw tuaj rua kuv, tsi yog xaa ib zag xwb, tabsis mej tseem xaa tuaj ntxiv hab.

¹⁷Tsi yog kuv xaav tau mej tej qhov txhua chaw, tabsis kuv xaav kuas tej kws mej xaa tuaj rua kuv ntawd muaj nqes rua mej.

¹⁸Kuv sau tsaab ntawv nuav tuaj qha rua mej has tas, tej kws mej muab rua Epafauditus nqaa tuaj rua kuv, kuv tau txais lawm, nwgnuav kuv muaj ntau siv tsi taag le! Tej kws mej xaa tuaj rua kuv ntawd zoo ib yaam le tej tshuaj tsw qaab kws suavdlawg muab fij rua Vaajtswv, hab yog tej kws Vaajtswv pum zoo yuav.

¹⁹Kuv tug Vaajtswv kws muaj koob moov nplua mag, nwg yuav pub txhua yaam kws mej xaav tau rua mej, rua qhov mej yog cov kws ntseeg Yexus Khetos.

²⁰Thov kuas Vaajtswv tug kws yog peb leej Txiv tau koob meej moog ibtxhis le! Amees.

²¹Kuv has noj qaab nyob zoo rua mej txhua tug kws ntseeg Vaajtswv hab mej cov kws yog Yexus Khetos tug lawm. Cov kwvtij kws nrug kuv nyob ntawm nuav, puab has noj qaab nyob zoo rua mej txhua tug ib yaam nkaus hab.

²²Cov ntseeg Vaajtswv txhua tug kws nyob ntawm nuav, puab puavleej has noj qaab nyob zoo tuaj rua mej suavdlawg, tshwjxeeb yog cov kws nyob huv fuabtais lub loog yog cov has.

²³Thov tug Tswv Yexus Khetos foom koob moov rua mej txhua tug.