Read Hmong Njua Kaulauxais 1 Bible Online

Kaulauxais 1 - Hmong Njua bible

Kaulauxais 1

¹Kuv yog Paulus kws Vaajtswv tsaa ua Yexus Khetos tug timthawj.

²Kuv hab peb tug kwv Timautes sau tsaab ntawv nuav xaa tuaj rua Vaajtswv tsaav tuabneeg kws nyob huv lub nroog Kaulauxais. Mej yog peb cov kwvtij kws muab sab rau ntseeg Yexus Khetos. Thov Vaajtswv tug kws yog peb leej Txiv foom koob moov rua mej hab paab kuas mej tau nyob kaaj sab lug.

³Txhua zag kws peb thov Vaajtswv paab mej, peb yeej ncu ntsoov ua peb tug Tswv Yexus Khetos leej Txiv tsaug,

⁴rua qhov peb tub nov xuv has tas, mej muab sab rau ntseeg Yexus Khetos hab mej hlub Vaajtswv tsaav tuabneeg txhua tug huv tuabsi.

⁵Thaus mej xub nov Txujmoo Zoo kws yog txuj tseeb, mej paub has tas Txujmoo Zoo ntawd ua rua mej muaj chaw ca sab. Vim mej ca sab rua tej kws Vaajtswv tub khaws ca rua mej sau ntuj ceebtsheej lawm, mej txhaj muab sab rau ntseeg hab sis hlub.

⁶Txujmoo Zoo taabtom nrov nchaa moog thoob plawg huv qaab ntuj nuav, hab Txujmoo Zoo ntawd coj tej koob moov zoo lug, ib yaam le thaus kws Txujmoo Zoo nrov tuaj txug mej, mej paub has tas yog Vaajtswv hlub cov tuabneeg kws muaj txim, mej txhaj tau txais tej koob moov zoo ntawd.

⁷Qhov kws mej paub le ntawd, tub yog peb tug kwv Epafas kws nrug peb ua num, hab yog tug kws peb hlub qha rua mej. Nwg yog ib tug kws muab sab rau paab peb ua Yexus Khetos teg num.

⁸Nwg qha rua peb has tas, Vaaj Ntsujplig tub ua rua mej txawj sis hlub lawm.

⁹Vim le ntawd txij nub kws peb tau nov mej moo, peb txhaj naj nub thov Vaajtswv paab mej tsi tseg le. Peb thov Vaajtswv paab kuas mej muaj tswvyim hab totaub tej kws Vaaj Ntsujplig tug Dlawbhuv qha, mej txhaj paub tej kws Vaajtswv lub sab nyam.

¹⁰Yog mej paub lawd, mej yuav ua tau tuabneeg zoo lawv le Vaajtswv lub sab nyam hab naj nub ua tej kws hum Vaajtswv sab. Mej lub neej yuav tawg paaj txi txiv hab mej yuav paub Vaajtswv heev zuj zug.

¹¹Thov Vaajtswv tug kws muaj fwjchim txhawb mej tug zug kuas mej muaj zug heev ntxiv, txawm yog mej tau zoo hab txomnyem los mej txhaj ua taug sab ntev.

¹²Hab mej yuav zoo sab hlo ua leej Txiv tsaug. Leej Txiv yog tug kws coj mej lug yuav nwg txuj koob moov kws nwg npaaj ca rua nwg tsaav tuabneeg kws taug txujkev kaaj.

¹³Vaajtswv tub paab peb cov kws dlaab Ntxwgnyoog muab kaw rua huv qhov tsaus ntuj dlim lawm; hab Vaajtswv coj peb lug nyob huv qhov pum kev kws Vaajtswv tug Tub kaav. Tug Tub ntawd yog tug kws Vaajtswv hlub,

¹⁴hab yog tug kws tso peb dlim hab zaam peb lub txim.

¹⁵Yexus Khetos tug kws peb qhovmuag pum yeej zoo ib yaam le Vaajtswv tug kws peb qhovmuag tsi pum. Yexus Khetos yog Vaajtswv tug Tub hlub. Nwg muaj fwjchim luj dlua ib puas tsaav yaam kws Vaajtswv tsim huv tuabsi.

¹⁶Tsi has tej kws nyob sau nruab ntug, hab tej kws nyob huv nplajteb nuav, tej kws peb qhovmuag pum hab tej kws peb qhovmuag tsi pum, cov timtswv ceebtsheej kws muaj fwjchim hab tej numtswv lossis cov vaajntxwv hab cov tuabneeg kws muaj fwjchim kaav nplajteb, txhua yaam ntawd puavleej yog Vaajtswv has kuas Yexus tsim, hab nwg tsim tej ntawd rua nwg.

¹⁷Yexus Khetos yeej xub nyob dlua ib puas tsaav yaam huv tuabsi, hab nwg tu kuas nyag nyob muaj nyag chaw.

¹⁸Yexus Khetos yog lub taubhau rua lub cev, lub cev yog cov tuabneeg kws ntseeg Vaajtswv. Nwg yog lub hauvpaug kws ua kuas lub cev caj sa. Nwg yog thawj tug kws Vaajtswv tsaa sawv huv qhov tuag rov qaab lug. Vaajtswv ua le ntawd kuas Yexus Khetos tuab leeg txhaj ua tau ib puas tsaav yaam tug thawj.

¹⁹Rua qhov Vaajtswv yeej pum zoo ca Vaajtswv tug Tub muaj fwjchim hab muaj yaam ntxwv ib yaam le Vaajtswv.

²⁰Vaajtswv pum zoo kuas Vaajtswv tug Tub coj ib puas tsaav yaam kws nyob huv qaab ntuj nuav, hab nyob sau nruab ntug rov lug ua Vaajtswv tug. Vaajtswv tso Vaajtswv tug Tub lug tuag sau tug ntoo khaublig, peb txhaj le tau lug nrug Vaajtswv sis raug zoo.

²¹Yaav taag lug mej ua tsi hum Vaajtswv sab, mej ua yeebncuab rua Vaajtswv, rua qhov mej nyam ua phem, tsi has tej kws mej ua hab tej kws mej xaav.

²²Tabsis qhov kws nwgnuav mej tau lug nrug Vaajtswv sis raug zoo, tub yog vim Vaajtswv tug Tub lub cev raug kev tuag txhwv mej. Vaajtswv khaiv Vaajtswv tug Tub lug tuag txhwv mej, rua qhov Vaajtswv xaav kuas mej ua tau tuabneeg zoo kawg nkaus tsi muaj ib qho txhum, thaus mej moog sawv ntawm Vaajtswv lub xubndlag.

²³Mej yuavtsum muab sab rau ntseeg Txujmoo Zoo ib yaam le thaus mej nyavnyuas nov. Hab mej yuavtsum ncu ntsoov qhov kws mej tub ca sab rua lawm. Mej tsi xob pub leejtwg ua rua mej xaav yuam kev. Txujmoo Zoo nuav yog txuj kws tub muaj tuabneeg coj moog qha rua txhua tug kws nyob huv qaab ntuj nuav lawm. Kuv yog ib tug tubkhai kws qha Txujmoo Zoo ntawd ntaag.

²⁴Nwgnuav kuv zoo sab raug kev txomnyem paab mej. Rua qhov kuv xaav kuas tej kev txomnyem kws Yexus Khetos raug paab nwg lub cev tav. Yexus Khetos lub cev yog cov tuabneeg kws ntseeg Vaajtswv.

²⁵Vaajtswv tsaa kuv ua ib tug tubkhai paab cov ntseeg. Vaajtswv kuas kuv ua teg num nuav txhaj paab tau mej. Teg num nuav yog qhov kws qha txug nwg zaaj.

²⁶Nwg kuas kuv qha txhij qha txhua has txug zaaj kws nwg tub muab zais ca tau ntau tam lug lawm, tsi pub rua leejtwg paub. Tabsis nwgnuav nwg tub qha rua nwg tsaav tuabneeg paub lawm.

²⁷Vaajtswv ua le nuav, rua qhov Vaajtswv yeej pum zoo qha zaaj kws tsi muaj tuabneeg paub nuav rua nwg tsaav tuabneeg paub. zaaj ntawd yog zaaj kws muaj nqes heev hab zoo kawg nkaus. Vaajtswv tub npaaj zaaj nuav ca rua txhua tsaav tuabneeg lawm. Zaaj kws Vaajtswv muab zais ca lawm yog has tas: Yexus Khetos tub lug nrug mej nyob lawm, yog le ntawd mej yuav tau Vaajtswv tug tshwjchim kws ci ntsaa ab.

²⁸Peb paub le nuav, peb txhaj qha Yexus Khetos zaaj rua suavdlawg. Peb ntuag hab qha txhua tug lawv le peb muaj tswvyim qha, rua qhov peb xaav kuas txhua tug kws ntseeg Yexus Khetos ua tau puab lub neej zoo hab coj tau puab moog cuag Vaajtswv.

²⁹Yexus Khetos tub pub nwg tug zug rua kuv lawm, kuv txhaj muab sab rau siv tug zug kws Yexus Khetos pub rua kuv ua kuas tau lawv le tej kws kuv xaav ua.