Read Hmong Njua Kaulauxais 2 Bible Online

Kaulauxais 2 - Hmong Njua bible

Kaulauxais 2

¹Kuv xaav kuas mej paub has tas, kuv ua num khwv kawg le paab mej, hab paab cov ntseeg kws nyob huv lub nroog Laudikeyas, hab cov tuabneeg kws tseem tsi tau pum dlua kuv.

²Qhov kws kuv ua le nuav yog kuv xaav txhawb puab tug zug, hab xaav kuas puab ib leeg txawj hlub ib leeg. Hab kuas puab totaub zoo, puab txhaj yuav ca sab rua Yexus Khetos. Puab txhaj le paub zaaj kws Vaajtswv muab zais ca lawm, zaaj ntawd yog Yexus Khetos ntaag.

³Yexus Khetos yog tug yumsij kws qheb Vaajtswv lub txhaab tswvyim hab kev txawj ntse kws Vaajtswv muab zais ca lawm.

⁴Kuv qha rua mej has tas mej yuavtsum ceevfaaj, tsi xob pub leejtwg ntxag tau mej. Txawm yog puab yuav txawj has zoo npaum le caag los mej tsi xob noog puab lug.

⁵Txawm yog kuv nyob dleb mej los kuv lub sab yeej nrug nraim mej nyob. Kuv zoo sab kawg le, rua qhov kuv nov has tas, mej cov kws ntseeg Yexus Khetos, mej puavleej koom ib lub sab.

⁶Mej tub leeg has tas Yexus Khetos yog mej tug Tswv lawm, yog le ntawd mej yuavtsum ua mej lub neej kuas phim qhov kws mej nrug nwg koom ib txujsa.

⁷Mej yuavtsum muab sab rau ntseeg Yexus Khetos ib yaam le tug caag ntoo kws ntsa aav tub tub. Hab mej yuavtsum sawv khov kho ib yaam le lub tsev kws cov ncej txhus tub tub. Mej yuavtsum muab sab npuab tej kws mej tub kawm lug lawm. Hab mej yuavtsum naj nub ncu ntsoov ua Vaajtswv tsaug.

⁸Mej yuavtsum ceevfaaj. Mej tsi xob moog noog tej zaaj kws tsi muaj hauvpaug hauvntsis kws suavdlawg qhuas has tas, yog kev txawj kev ntse, nyob tsaam mej tso Vaajtswv tseg. Tej zaaj ntawd yeej yog tej kws tuabneeg ibtxwm qha ib tam dlhau ib tam lug. Hab tej ntawd yog dlaab le tsi yog Yexus Khetos le.

⁹Rua qhov Yexus lug yug ua tuabneeg, nwg tug yaam ntxwv zoo ib yaam le Vaajtswv tug.

¹⁰Hab mej cov kws nrug Yexus Khetos koom ib txujsa, mej tub zoo kawg nkaus lawm. Yexus Khetos yog tug kws muaj fwjchim luj dlua cov kws kaav sau nruab ntug hab huv nplajteb nuav.

¹¹Mej cov kws nrug Yexus Khetos koom ib txujsa, mej tub ua kevcai txav lawm. Tsi yog tuabneeg muab mej ua, tabsis qhov kws Yexus Khetos paab mej dlim mej lub sab kws pheej yuam mej lub cev moog ua txhum, qhov ntawd tub yog nwg muab mej ua kevcai txav ntaag.

¹²Thaus mej ua kevcai raus dlej, tub yog muab mej log nrug Yexus Khetos ua ke lawm. Hab Vaajtswv tub tsaa mej nrug Yexus Khetos sawv rov qaab lug lawm, rua qhov mej ca sab rua Vaajtswv lub fwjchim kws tsaa Yexus sawv huv qhov tuag rov qaab lug.

¹³Yaav taag lug, mej zoo ib yaam le cov kws tuag lawd, vim mej ua txhum hab mej yog lwm tsaav tuabneeg kws yeej tsi muaj Vaajtswv txuj kevcai kaav. Tabsis nwgnuav Vaajtswv coj mej lug nrug Yexus Khetos koom ib txujsa. Vaajtswv tub zaam peb lub txim huv tuabsi lawm.

¹⁴Vaajtswv rhuav tej kevcai nruj kws kaav peb. Hab Vaajtswv tub muab tej ntawd huv tuabsi coj moog ntsa rua sau ntoo khaublig lawm.

¹⁵Yexus Khetos kovyeej ib puas tsaav yaam kws muaj fwjchim sau tug ntoo khaublig. Nwg coj ib puas tsaav yaam ntawd lug rua suavdlawg saib has tas, nwg yog tug kws yeej, hab tej ntawd yog cov kws swb.

¹⁶Yog le ntawd mej tsi xob pub leejtwg thuam mej has tas, ua le caag mej tsi caiv kev noj kev haus lossis nub ua kevcai lossis nub hli xab lossis nub Xanpataus.

¹⁷Tej ntawd tsuas yog tej kws yuav muaj lug yaav tom ntej nuav tug dluab xwb, tug kws tseemceeb yog Yexus Khetos.

¹⁸Mej tsi xob pub tug kws khaav has tas nwg zoo dlua lwm tug thuam mej. Tug ntawd pheej has tas nwg ua ywgtoog pum tej kws tseemceeb, nwg ua txuj ua le nwg yog tug kws tsi muab hlub, nwg pehawm cov timtswv ceebtsheej, tug ntawd nwg laam khaav qhuav lawv le nwg xaav xwb.

¹⁹Nwg tsi muab sab npuab Yexus Khetos kws yog cov ntseeg lub taubhau. Yexus Khetos yog tug kws ntxiv roj ntxiv ntshaav rua lub cev, hab muab tej qej txhaa lug sis dlhos. Nwg muab tej leeg lug tuav, lub cev txhaj nyob ruaj ua ke, hab txawj luj hlub quas zug lawv le Vaajtswv lub sab nyam.

²⁰Mej tub nrug Yexus Khetos tuag hab mej tub dlim tej kws ibtxwm kaav tuabneeg huv lub qaab ntuj nuav lawm. Ua le caag mej tseem ua mej lub neej ib yaam le tuabneeg nplajteb ua hab?

²¹Ua le caag mej tseem coj tej kevcai kws qha has tas, tsi xob tuav, tsi xob saaj, hab tsi xob kov.

²²Txawm yog peb ua lawv le tej ntawd los thaus kawg yeej tsi muaj nqes dlaabtsi rua peb le. Tej kevcai ntawd tsuas yog tej kws tuabneeg xaav hab tuabneeg qha xwb.

²³Tej kevcai kws qha tuabneeg kuas pe cov timtswv ceebtsheej, kuas ua le cov tuabneeg tsi muab hlub, hab kuas tuabneeg tsimtxom tuabneeg lub cev, suavdlawg saib yaam le tej ntawd yog tej kws tseemceeb. Tabsis tej ntawd yeej paab tsi tau kuas tuabneeg tswj tau tuabneeg lub sab kws nyam ua phem.