Read Hmong Njua Kaulauxais 3 Bible Online

Kaulauxais 3 - Hmong Njua bible

Kaulauxais 3

¹Vaajtswv tub tsaa mej nrug Yexus Khetos sawv huv qhov tuag rov qaab lug lawm, yog le ntawd, mej yuavtsum muab sab npuab tej kws nyob sau ntuj ceebtsheej, qhov chaw ntawd yog qhov kws Yexus Khetos nyob sau lub zwmtxwv kws nyob ntawm Vaajtswv saab xis.

²Mej yuavtsum muab sab npuab tej kws nyob sau ntuj ceebtsheej, tsi yog muab sab npuab tej kws nyob huv nplajteb nuav.

³Rua qhov mej cov kws nrug Yexus Khetos koom ib txujsa, mej zoo le cov tuabneeg kws tuag lawm. Mej txujsa Vaajtswv tub muab khaws ca lawm.

⁴Yexus Khetos yog mej txujsa, thaus nwg rov lug mej yuav nrug nwg ua ke lug, hab nrug nwg tau koob meej ib yaam nkaus.

⁵Yog le ntawd tej kev phem kev qas kws mej lub sab nyam ua, mej yuavtsum muab tso povtseg, tsi has kev nkauj kev nraug lossis ua vuabtsuab lossis ntshaw luas tug lossis nyam ua phem ua qas lossis ua tuabneeg sab hlub. Tug tuabneeg sab hlub, nwg saib yaam kws nwg ntshaw tsimtxaj dlua Vaajtswv.

⁶Vim muaj tej nuav Vaajtswv txhaj yuav rau txim rua cov tuabneeg kws tsi noog Vaajtswv lug.

⁷Yaav taag lug mej nyam ua kev phem kev qas ib yaam le cov tuabneeg kws nyam ua phem ua qas ntawd.

⁸Tabsis nwgnuav mej yuavtsum muab tej kws yuav has nuav tso povtseg: kev chim, kev ua nruj ua tsiv, ua limham, mej tsi xob thuam lwm tug hab tsi xob has tej lug kws tshawv noog ib zag le.

⁹Mej ib leeg tsi xob dlaag ib leeg, rua qhov mej tub muab mej lub sab qub hab tej kev phem kws mej ibtxwm ua tso povtseg lawm.

¹⁰Nwgnuav mej tub ua tuabneeg tshab lawm. Qhov kws mej ua tau tuabneeg tshab ntawd, tub yog vim Vaajtswv tug kws tsim mej naj nub paab mej kuas mej coj tau tug yaam ntxwv zoo le nwg, mej txhaj le yuav paub nwg zoo zuj zug.

¹¹Tug kws ua tuabneeg tshab lawd, nwg yeej tsi suav has tas, cov nuav yog tuabneeg Kilis, cov nuav yog tuabneeg Yudais, cov nuav yog cov kws ua kevcai txav, cov nuav yog cov kws tsi ua kevcai txav, cov nuav yog lwm tsaav tuabneeg, cov nuav yog tuabneeg qus, cov nuav yog cov ua qhev, cov nuav yog cov kws tsi ua qhev. Rua qhov Yexus Khetos yog txhua yaam hab nwg nyob huv puab txhua tug lub sab.

¹²Mej yog Vaajtswv tsaav tuabneeg. Vaajtswv hlub mej hab tub xaiv mej ca ua nwg cov mivnyuas lawm, yog le ntawd mej yuavtsum hlub lwm tug, ua sab zoo tsi xob khaavtheeb, tabsis muaj lub sab mog sab muas hab ua sab ntev.

¹³Mej ib leeg yuavtsum paab ib leeg. Yog mej cov muaj ib tug ua txhum rua ib tug, mej ib tug yuavtsum zaam txim rua ib tug, ib yaam le Vaajtswv tub zaam txim rua mej lawm.

¹⁴Qhov kws tseemceeb dlua tej ntawd huv tuabsi, mej ib tug yuavtsum hlub ib tug tag tag. Yog mej ua le nuav, mej txhaj yuav nyob taug ua ke.

¹⁵Mej cov kws Yexus Khetos hu lug koom ua ib lub cev, mej yuavtsum ca Yexus Khetos txujkev ncaaj nceeg coj mej lub neej. Mej yuavtsum naj nub ua Vaajtswv tsaug.

¹⁶Mej yuavtsum khaws Yexus Khetos tej lug huv tuabsi ca rua huv mej lub sab. Mej ib leeg yuavtsum ua tuab zoo qha ib leeg, hab ib leeg ntuag ib leeg tsi xob laam tau laam has le tej tuabneeg kws tsi muaj tswvyim. Thaus mej hu nkauj, tsi has tej nkauj kws Daviv sau lossis tej nkauj qhuas Vaajtswv lossis tej nkauj kws cov ntseeg ibtxwm hu qhuas Vaajtswv, mej yuavtsum zoo sab hlo hu ua Vaajtswv tsaug.

¹⁷Txhua yaam kws mej ua, mej yuavtsum ua kuas tsimnyog qhov kws mej yog cov ntseeg tug Tswv Yexus. Mej cov kws ntseeg Yexus, mej ca le ua Vaajtswv tug kws yog peb leej Txiv tsaug.

¹⁸Mej cov kws yog quaspuj, nyag yuavtsum noog nyag tug quasyawg lug, mej ua le ntawd txhaj tsimnyog qhov kws mej yog tug ntseeg Yexus.

¹⁹Mej cov kws yog quasyawg, nyag yuavtsum hlub nyag tug quaspuj, tsi xob ua limham rua nwg.

²⁰Mej cov kws yog mivnyuas, mej yuavtsum noog mej nam mej txiv lug, mej ua le ntawd txhaj le hum Vaajtswv sab.

²¹Mej cov kws yog nam yog txiv, mej tsi xob laam tau laam ua rua mej cov mivnyuas chim, nyob tsaam puab tu sab.

²²Mej cov kws yog tubkhai, mej yuavtsum noog mej tug tswv lug txhua lu. Mej tsi xob ua num thaus mej tug tswv pum, kuas nwg qhuas mej xwb, tabsis mej yuavtsum muab sab rau ua num tag tag, rua qhov mej yog cov kws fwm tug Tswv.

²³Txhua yaam kws mej ua, mej yuavtsum rau sab ntso ua ib yaam le mej ua rua Vaajtswv, tsi yog mej ua rua tuabneeg.

²⁴Yexus Khetos yog mej tug Tswv, mej yog nwg cov tubkhai. Yog le ntawd, mej yuavtsum ncu ntsoov has tas, mej yeej yuav tau tej nqe zug kws Vaajtswv khaws ca rua Vaajtswv tsaav tuabneeg lawm.

²⁵Tug kws ua txhum yeej yuav tau sau tej kws nwg tau ua lug lawm, rua qhov Vaajtswv yeej tsi xaiv leejtwg ntsejmuag hlo le.