Read Hmong Njua Kaulauxais 4 Bible Online

Kaulauxais 4 - Hmong Njua bible

Kaulauxais 4

¹Mej cov kws yog tswv, mej yuavtsum ua ncaaj rua mej cov tubkhai, tsi xob hlub ib tug tseg ib tug. Mej yuavtsum ncu ntsoov has tas, mej koom tuab tug Tswv kws nyob sau ntuj ceebtsheej xwb.

²Mej yuavtsum naj nub nquag thov Vaajtswv tsi xob nkeeg hab ncu ntsoov ua nwg tsaug.

³Thaus mej thov Vaajtswv, mej yuavtsum thov nwg qheb kev rua peb qha Txujmoo Zoo kws has txug Yexus Khetos zaaj kws yaav taag lug tsi muaj tuabneeg paub. Tub yog vim kuv qha zaaj ntawd kuv txhaj raug kaw rua huv tsev lojcuj nuav.

⁴Hab mej yuavtsum thov Vaajtswv pub tswvyim rua kuv kuas kuv txawj qha tej kws tsimnyog kuv yuavtsum qha, suavdlawg txhaj yuav totaub zoo.

⁵Mej yuavtsum ua mej lub neej kuas zoo rua cov tuabneeg kws tsi ntseeg pum. Hab txhua zag kws zoo qha Txujmoo Zoo, mej ca le qha tsi xob ca nkim sijhawm.

⁶Tej lug kws mej has, mej yuavtsum ua tuab zoo has kuas suavdlawg xaav noog. Tej kws lwm tug nug mej, mej yuavtsum paub teb.

⁷Peb tug kwv Tikhikus kws yog peb tug phoojywg zoo, nwg yuav qha rua mej paub has tas kuv nyob le caag, nwg yog ib tug kws muab sab rau nrug peb ua Vaajtswv teg num.

⁸Tub yog vim le ntawd kuv txhaj khaiv nwg tuaj saib mej, nwg yuav qha rua mej paub has tas, peb nyob le caag hab ua le caag, mej txhaj yuav zoo sab.

⁹Peb tug kwv Auneximus kws peb hlub, nwg yuav nrug Tikhikus tuaj saib mej. Nwg yeej yog mej paab hab nwg yog tug kws muab sab rau ua num. Thaus obtug tuaj txug tim mej, obtug yuav qha txhua yaam kws peb ua tim nuav rua mej paub.

¹⁰Alixakus kws raug kaw nrug kuv huv tsev lojcuj, nwg has noj qaab nyob zoo rua mej. Hab Malakaus kws yog Npananpas tug kwvtij los has noj qaab nyob zoo rua mej. Kuv tub qha ib zag rua mej lawm has tas, yog Malakaus tuaj saib mej, mej ca le hu nwg lug su huv mej tsev.

¹¹Yausuas kws suavdlawg hu ua Yuxatus los has noj qaab nyob zoo rua mej hab. Cov Yudais kws ntseeg Yexus lawd, tsuas muaj peb leeg ntawd xwb txhaj le nrug kuv qha txug Vaajtswv lub tebchaws. Puab peb leeg ntawd tau paab kuv ntau kawg le.

¹²Epafas yeej yog mej paab hab nwg yog Yexus Khetos ib tug tubkhai, nwg has noj qaab nyob zoo rua mej. Nwg naj nub kub sab lug thov Vaajtswv paab kuas mej muab sab rau ntseeg hab ua tau zoo zuj zug. Hab kuas mej ua tau mej teg num lawv le Vaajtswv lub sab nyam.

¹³Kuv ua tau timkhawv has tas, nwg ua num khwv kawg le paab mej hab paab cov ntseeg kws nyob huv lub nroog Laudikeyas hab lub nroog Hailafulis.

¹⁴Lukas tug kws yog kws tshuaj kws peb hlub, hab Demas obtug has noj qaab nyob zoo rua mej.

¹⁵Thov mej has noj qaab nyob zoo rua cov kwvtij ntseeg kws nyob huv lub nroog Laudikeyas, rua Nifas, hab rua pawg ntseeg kws tuaj pehawm Vaajtswv huv nwg tsev.

¹⁶Thaus mej nyeem tsaab ntawv nuav taag, mej yuavtsum muab xaa moog rua cov ntseeg kws nyob huv lub nroog Laudikeyas nyeem hab. Hab mej yuavtsum nyeem tsaab ntawv kws cov ntseeg kws nyob huv lub nroog Laudikeyas xaa tuaj rua mej ib yaam nkaus.

¹⁷Thov mej has rua Akipus has tas, teg num kws Vaajtswv muab rua nwg ua lawd, nwg yuavtsum ua tuab zoo ua kuas tav.

¹⁸Lu lug kws has tas, Paulus ncu ncu mej, tub yog kuv txhais teg sau ntaag. Thov mej ncu ntsoov has tas kuv tseem raug kaw rua huv tsev lojcuj. Thov Vaajtswv foom koob moov rua mej txhua tug.