Read Hmong Njua 1 Thexalaunikes 1 Bible Online

1 Thexalaunikes 1 - Hmong Njua bible

1 Thexalaunikes 1

¹Kuv yog Paulus, kuv hab Xilas hab Timautes sau tsaab ntawv nuav xaa tuaj rua mej txhua tug kws nyob huv lub nroog Thexalaunikes kws ntseeg Vaajtswv tug kws yog peb leej Txiv hab ntseeg tug Tswv Yexus Khetos. Thov Vaajtswv foom koob moov rua mej, hab paab kuas mej tau nyob kaaj sab lug.

²Peb naj nub ua Vaajtswv tsaug hab thov Vaajtswv paab mej tsi tseg tsi tu, rua qhov peb ncu ntsoov has tas, mej yog cov kws muab sab rau ntseeg.

³Thaus peb thov Vaajtswv tug kws yog peb leej Txiv, peb ncu ntsoov has tas mej tsi yog cov kws ntseeg ntawm lub ncauj xwb, tabsis mej ua mej teg num rua suavdlawg pum hab. Mej zoo sab quas hlo paab lwm tug. Txawm yog mej yuav ua num khwv npaum le caag los mej yeej tsi khauvxwm mej tug zug le, hab mej ca sab ntsoov rua peb tug Tswv Yexus Khetos.

⁴Cov kwvtij, peb paub has tas Vaajtswv hlub mej hab xaiv mej ca ua nwg tsaav tuabneeg lawm.

⁵Peb paub le nuav, rua qhov Txujmoo Zoo kws peb coj tuaj qha mej, tsi yog lu lug qhuav xwb. Tabsis yog Vaaj Ntsujplig tug Dlawbhuv hab Vaajtswv lub fwjchim nrug nraim cov lug ntawd, hab txujlug ntawd yog txuj tseeb. Thaus peb nrug mej nyob peb ua peb lub neej zoo le caag los mej tub paub lawm. Peb ua le ntawd tub yog peb ua qha mej kuas mej paub ua mej lub neej.

⁶Mej tub xyum ua lawv le peb ua hab lawv le tug Tswv Yexus ua lawm. Txawm yog mej raug kev txomnyem heev los mej tseem zoo sab noog tej lug kws Vaaj Ntsujplig tug Dlawbhuv qha rua mej.

⁷Yog le ntawd, mej txhaj ua tau yaam ntxwv zoo rua cov ntseeg kws nyob huv lub xeev Makedaunias nuav, hab cov ntseeg kws nyob nraag lub xeev Akhayas xyum.

⁸Rua qhov mej cov ntseeg kws nyob huv lub nroog Thexalaunikes nuav, mej tub moog qha Vaajtswv txujlug thoob plawg txhua qhov lawm, tsi yog qha huv lub xeev Makedaunias hab xeev Akhayas xwb, tabsis tej tuabneeg kws nyob rua txhua qhov puavleej nov moo has tas mej tub ntseeg Vaajtswv lawm. Yog le ntawd, tsi taag peb yuav has ntxiv lawm.

⁹Suavdlawg puavleej has tas, thaus peb tuaj saib mej, mej zoo sab noog peb qha. Hab puab has txug qhov kws mej muab mej tej dlaab tej mlom tso povtseg tig lug cuag Vaajtswv, kuas mej tau ua Vaajtswv tug kws muaj sa nyob teg num. Nwg yog Vaajtswv tag.

¹⁰Hab puab has txug qhov kws mej kub sab lug tog Vaajtswv tug Tub Yexus kws yuav lug sau ntuj ceebtsheej lug. Tug ntawd yog Vaajtswv tug Tub Yexus kws Vaajtswv tsaa sawv huv qhov tuag rov qaab lug, hab yog tug kws cawm peb dlim ntawm Vaajtswv txujkev chim kws yuav muaj lug.