Read Hmong Njua 1 Thexalaunikes 2 Bible Online

1 Thexalaunikes 2 - Hmong Njua bible

1 Thexalaunikes 2

¹Cov kwvtij, mej tub paub lawm has tas, thaus peb tuaj saib mej, mas muaj nqes heev rua mej.

²Hab mej tub paub zoo has tas, thaus peb tseem tuaj tsi tau txug ntawm mej, peb xub tuaj qha peg lub nroog Filipis, cov tuabneeg kws nyob peg, puab tsimtxom peb hab saib tsi taug peb kag le. Tsi yog le ntawd xwb, thaus peb tuaj txug rua huv mej lub nroog los tseem muaj tuabneeg tawmtsaam peb heev hab. Txawm le ntawd los Vaajtswv tseem pub peb muaj lub sab tawv qha Txujmoo Zoo rua mej.

³Tej lug kws peb qha mej, peb qha tseeb xwb. Peb yeej tsi muaj ib nplooj sab kws xaav ua phem lossis xaav dlaag mej.

⁴Peb yeej tsi muaj nplooj sab xaav le ntawd. Peb tsuas qha tej kws Vaajtswv muab rua peb qha xwb. Rua qhov Vaajtswv yeej pum zoo muab Txujmoo Zoo ntawd rua peb qha. Tsi yog peb qha kuas hum tuabneeg sab, tabsis yog peb qha kuas hum Vaajtswv sab, rua qhov Vaajtswv yog tug kws naj nub saib ntsoov peb lub sab.

⁵Mej tub paub lawm has tas thaus peb tuaj qha mej, peb tsi tau laam qhuas leejtwg le lossis ntxag leejtwg tug yuav. Vaajtswv yeej ua timkhawv has tas peb has tseeb xwb.

⁶Peb cov kws yog Yexus Khetos cov timthawj, peb yeej tsi tau kuas leejtwg fwm peb, tsi has mej lossis lwm tug,

⁷txawm yog peb yog Yexus Khetos cov timthawj los peb tsi yuam mej, tabsis peb ua lub sab ntev rua mej ib yaam le leej nam ua sab ntev tu nwg cov mivnyuas.

⁸Peb hlub mej kawg le, peb txhaj coj Txujmoo Zoo kws Vaajtswv muab rua peb lawm tuaj qha rua mej. Tsi yog le ntawd xwb, peb tseem zoo sab muab peb tug zug huv tuabsi paab mej, peb tsi khauvxwm le, rua qhov peb hlub mej heev.

⁹Cov kwvtij, nyaj mej yuav ncu tau has tas, thaus peb nrug mej nyob, peb yeej ua num nyaav hab khwv kawg le yug peb. Peb ua num taag nub taag mo, rua qhov peb tsi xaav kuas mej nyuaj sab rua peb lub sijhawm kws peb tuaj qha Vaajtswv Txujmoo Zoo rua mej.

¹⁰Mej hab Vaajtswv ua tau timkhawv has tas, thaus peb tseem nrug mej cov ntseeg nyob, peb ua peb lub neej zoo kawg nkaus, peb ua tuabneeg ncaaj nceeg hab peb tsi tau ua ib qho txhum le.

¹¹Mej tub paub lawm has tas, peb hlub mej txhua tug ib yaam le leej txiv hlub nwg cov mivnyuas.

¹²Peb tub txhawb mej tug zug hab nplig mej sab lawm. Peb ua le ntawd kuas mej txhaj paub ua mej lub neej hum Vaajtswv sab. Vaajtswv yog tug kws hu mej lug ua nwg tsaav tuabneeg hab lug txais nwg txuj koob moov.

¹³Tsi yog le ntawd xwb, tseem muaj ib qhov kws peb naj nub ua Vaajtswv tsaug. Qhov ntawd yog qhov kws mej noog hab muab sab rau ntseeg Vaajtswv txujlug kws peb coj tuaj qha mej. Thaus mej nov lawd, mej ca sab has tas, txujlug ntawd tsi yog tuabneeg txuj, tabsis yog Vaajtswv txuj. Txujlug kws mej ca sab rua ntawd yeej yog Vaajtswv txuj tag, rua qhov Vaajtswv naj nub ua num huv mej cov kws ntseeg lawm lub sab.

¹⁴Cov kwvtij, yaav taag lug mej raug kev tsimtxom ib yaam le cov ntseeg Yexus Khetos kws nyob nraag lub xeev Yudas. Mej tsaav tuabneeg tsimtxom mej ib yaam le cov tuabneeg Yudais raug puab tsaav tuabneeg tsimtxom puab hab.

¹⁵Cov Yudais yog cov kws tau muab tug Tswv Yexus hab cov cev Vaajtswv lug tua povtseg, hab puab yog cov kws tau tsimtxom peb. Puab tawmtsaam Vaajtswv hab ntxub cov ntseeg.

¹⁶Tsi yog le ntawd xwb, puab tseem txwv tsi pub peb coj Txujmoo Zoo kws cawm tau tuabneeg dlim tuabneeg lub txim moog qha rua lwm Tsaav Tuabneeg hab. Puab ua le ntawd tub yog puab tsub kev txhum ntxiv rua tej kws puab tau ua lug lawm. Nwgnuav Vaajtswv yuav rau txim nyaav rua puab.

¹⁷Cov kwvtij, qhov kws peb tau ncaim mej ib nyuas ntu, tsuas yog ncaim ntsej ncaim muag xwb, peb lub sab yeej tsi ncaim mej. Thaus ntawd peb ncu mej heev hab xaav pum mej kawg le.

¹⁸Peb xaav rov qaab tuaj saib mej, kuv tub yuav tuaj ob peb zag, tabsis dlaab Ntxwgnyoog tsi pub peb tuaj.

¹⁹Thaus peb tug Tswv Yexus Khetos rov qaab lug, hab peb moog nyob ntawm nwg lub xubndlag, cov tuabneeg kws yuav ua rua peb ca sab, ua rua peb zoo sab, hab ua rua peb muaj lug khaav has tas, peb kovyeej lawm, tub yog mej ntaag.

²⁰Rua qhov mej yog cov kws ua rua peb tau ntsejmuag, hab ua rua peb zoo sab.