Read Hmong Njua 1 Thexalaunikes 3 Bible Online

1 Thexalaunikes 3 - Hmong Njua bible

1 Thexalaunikes 3

¹Peb xaav nov mej xuv kawg le, peb ua tsi taug sab ntev lawm, peb txhaj pum zoo ca Xilas wb nyob wb huv lub nroog Athees, hab ca wb tug kwv Timautes tuaj saib mej.

²Timautes yog tug kws ua Vaajtswv teg num qha Txujmoo Zoo kws has txug Yexus Khetos zaaj ib yaam le wb hab. Wb khaiv nwg tuaj txhawb mej tug zug, hab paab kuas mej muab sab rau ntseeg.

³Mej txhua tug kws taabtom raug kev txomnyem txhaj yuav tsi poob sab. Mej yeej paub lawm has tas, tej kev tsimtxom ntawd yog tej kws Vaajtswv tub xub npaaj tseg ca rua cov ntseeg lawm.

⁴Thaus peb tseem nrug mej nyob, peb tub qha rua mej paub lawm has tas, peb cov kws ntseeg yeej yuav raug kev tsimtxom. Nwgnuav mej pum has tas tub muaj le ntawd lawm tag.

⁵Vim le ntawd kuv txhaj pum zoo khaiv Timautes tuaj saib mej. Kuv tsi nov mej xuv le, kuv ua tsi taug sab ntev lawm, kuv txhaj khaiv Timautes tuaj saib mej, saib mej puas tseem muab sab rau ntseeg. Kuv ntshai nyob tsaam dlaab Ntxwgnyoog ntxag tau mej yuam kev, ces teg num kws peb ua lug lawm yuav tsi muaj nqes dlaabtsi le.

⁶Timautes tau tuaj saib mej, nwgnuav nwg tub rov qaab lug txug wb lawm. Nwg lug qha rua wb has tas, mej tseem muab sab rau ntseeg hab sis hlub. Nwg has rua wb has tas, mej ncu ncu wb hab xaav pum wb, ib yaam le wb xaav pum mej.

⁷Wb txhawj hab nyuaj sab heev, tabsis thaus wb nov has tas, mej tseem muab sab rau ntseeg, wb txhaj le qaab sab nyob.

⁸Thaus wb nov has tas mej tseem muab sab npuab Vaajtswv, wb txhaj tso sab plhuav lawm.

⁹Nwgnuav peb ua Vaajtswv tsaug tsi txawj taag, rua qhov peb paub has tas, mej muab sab rau ntseeg, peb zoo sab kawg le, peb tsi pum qaab yuav ua Vaajtswv tsaug le.

¹⁰Peb naj nub naj mo thov Vaajtswv paab kuas peb tau tuaj saib mej dlua ib zag, peb txhaj muaj sijhawm qha mej, rua qhov tej kws mej ntseeg lawm, tseem tshuav qee yaam kws mej tsi tau paub tseeb.

¹¹Peb thov Vaajtswv tug kws yog peb leej Txiv hab thov peb tug Tswv Yexus qheb kev kuas peb tau tuaj saib mej.

¹²Peb thov Vaajtswv paab kuas mej ib tug txawj hlub ib tug heev dlua yaav taag lug lawm, ib yaam le kws naj nub nua peb hlub mej.

¹³Yog mej xub muaj lub sab zoo le ntawd lawm, thaus peb tug Tswv Yexus coj cov kws ntseeg nwg nrug nwg lug, thaus ntawd Vaajtswv tug kws yog peb leej Txiv yuav pum has tas, mej yog cov kws zoo kawg nkaus, mej tsi muaj ib qhov txhum le.