Read Hmong Njua 1 Thexalaunikes 4 Bible Online

1 Thexalaunikes 4 - Hmong Njua bible

1 Thexalaunikes 4

¹Cov kwvtij, peb tub qha rua mej lawm has tas, mej yuavtsum ua mej lub neej le caag txhaj yuav hum Vaajtswv sab, mej tub ua le peb qha ntawd lawm. Tabsis nwgnuav peb thov ntuag mej lawv le peb tug Tswv Yexus kuas peb ntuag, mej yuavtsum ua mej lub neej kuas zoo dlua yaav taag lug lawm hab.

²Rua qhov mej tub paub lawm has tas, tej lug kws peb qha mej tsi yog peb tej lug, tabsis yog peb tug Tswv Yexus tej lug.

³Vaajtswv xaav kuas mej ua mej lub neej zoo kawg nkaus, tsi xob ua kev nkauj kev nraug txhaj le hum Vaajtswv sab.

⁴Mej txhua tug yuavtsum tswj mej lub cev hab ncaaj nceeg rua mej tug quaspuj, mej txhaj ua tau hum Vaajtswv sab hab hum tuabneeg sab.

⁵Cov tuabneeg kws tsi paub Vaajtswv, puab muaj lub sab ntshaw ua phem ua qas, mej tsi xob ntshaw le puab.

⁶Mej yuavtsum ncu ntsoov zaaj nuav, mej tsi xob ua kev nkauj kev nraug ib zag le. Yog mej ua nkauj ua nraug mej yeej yuav ua txhum lwm tug xwb. Yaav taag lug peb tub qha rua mej paub lawm has tas, Vaajtswv yuav rau txim rua cov tuabneeg kws ua txhum le ntawd.

⁷Vaajtswv hu peb lug ua tuabneeg zoo, tsi yog hu peb lug ua kev nkauj kev nraug.

⁸Yog leejtwg tsi ua lawv le txujlug nuav qha, tsi yog nwg saib tsi taug tuabneeg, tabsis yog nwg saib tsi taug Vaajtswv tug kws pub Vaaj Ntsujplig tug Dlawbhuv rua mej.

⁹Tsi taag kuv yuav sau qha rua mej has tas, mej cov kws ntseeg yuavtsum sis hlub, rua qhov Vaajtswv tub qha rua mej lawm has tas, ib tug yuavtsum hlub ib tug.

¹⁰Mej yeej hlub cov kwvtij ntseeg Yexus kws nyob txhua qhov huv lub xeev Makedaunias lawm. Tabsis cov kwvtij, peb thov ntuag mej has tas, mej ib leeg yuavtsum hlub ib leeg heev dlua ntawd hab.

¹¹Mej yuavtsum naj nub xyum ua tuabneeg zoo, tsi xob ntau ncauj. Mej yuavtsum rau sab ntso ua mej teg num xwb tsi xob moog taabkaum lwm tug. Hab mej yuavtsum ua ntawm mej txhais teg tsi xob tog lwm tug ua rua mej noj, lawv le peb tub qha rua mej lawm.

¹²Yog mej ua le nuav, cov kws tsi ntseeg Vaajtswv txhaj yuav saib taug mej, hab mej txhaj yuav tsi tog lwm tug ua rua mej noj.

¹³Cov kwvtij, peb xaav kuas mej paub tseeb has tas cov tuabneeg kws tuag lawm, puab moog rua qhov twg lawm, mej txhaj yuav tsi quaj ntsuag ib yaam le cov tuabneeg kws tsi muaj chaw ca sab.

¹⁴Peb paub tseeb has tas, Yexus tub tuag hab sawv huv qhov tuag rov qaab lug lawm, yog le ntawd peb txhaj ntseeg has tas, Vaajtswv yuav coj cov ntseeg kws tuag lawd nrug Yexus sawv rov qaab lug hab.

¹⁵Zaaj kws peb qha rua mej nuav tub yog peb qha lawv le peb tug Tswv Yexus tej lug qha kws has tas, nub kws tug Tswv Yexus rov qaab lug, peb cov kws tseem ua neej nyob, peb yuav tsi xub ua cov kws tuag lawd ntej moog.

¹⁶Thaus tug Tswv Yexus yuav lug sau ntuj lug, suavdlawg yuav nov ib lub suab hu nrov nrov sau ntuj tuaj, hab yuav nov tug thawj timtswv ceebtsheej lub suab hu hab nov Vaajtswv lub suab raaj suab xyu nrov. Ces cov tuabneeg tuag lawm kws ntseeg Yexus yuav sawv huv qhov tuag lug.

¹⁷Tom qaab ntawd Vaajtswv yuav coj peb cov kws tseem ua neej nyob, nrug cov tuabneeg ntawd ua ke nrug fuab nrug cua moog ntsib tug Tswv sau ib ntaa ntuj, peb yuav nrug tug Tswv nyob moog ibtxhis le.

¹⁸Yog le ntawd mej ca le muab tej lug nuav lug nplig txhua tug lub sab.