Read Hmong Njua 1 Thexalaunikes 5 Bible Online

1 Thexalaunikes 5 - Hmong Njua bible

1 Thexalaunikes 5

¹Cov kwvtij, tsi taag kuv yuavtsum sau qha rua mej paub has tas, nub twg hab lub sijhawm twg yuav muaj tej ntawd.

²Rua qhov mej yeej paub lawm has tas, nub kws tug Tswv Yexus yuav lug, nwg yuav lug ib yaam le tubsaab tuaj mo ntuj.

³Thaus suavdlawg has tas, “Peb tau zoo noj hab tau zoo nyob kawg le lawm”, taamsim ntawd puab yuav raug kev puamtsuaj. Puab yuav tsiv tsi dlim ib yaam le tug quaspuj kws mob plaab yuav yug mivnyuas, nwg yuav tsiv tsi dlim le.

⁴Tabsis cov kwvtij, mej tsi yog cov kws nyob huv qhov tsaus ntuj, txawm yog nub ntawd yuav lug ib yaam le tug tubsaab tuaj los tsi taag mej yuav ntshai.

⁵Rua qhov mej yog cov kws nyob qhov pum kev hab nyob nruab nub. Peb tsi yog cov kws nyob mo ntuj lossis nyob huv qhov tsaus ntuj.

⁶Yog le ntawd peb tsi xob tsaug zug le lwm tug. Peb yuavtsum tsi xob tsaug zug hab ceevfaaj zuv tog.

⁷Tsuas yog thaus tsaus ntuj tuabneeg txhaj pw tsaug zug; hab tsuas yog thaus tsaus ntuj tuabneeg txhaj haus cawv qaug xwb.

⁸Tabsis peb yog cov kws nyob nruab nub, tsi tsimnyog peb yuav qaug rua ib yaam dlaabtsi le. Peb yuavtsum muab kev ntseeg hab kev hlub lug ua dlaim hlau thaiv hauvsab, hab peb yuavtsum muab qhov kws peb ca sab has tas peb yuav dlim peb lub txim, lug ua lub mom hlau ntoo.

⁹Vaajtswv yuav tsi rau txim rua peb cov kws Vaajtswv xaiv ca lawm, tabsis Vaajtswv yuav zaam txim rua peb cov kws ntseeg peb tug Tswv Yexus.

¹⁰Yexus Khetos yog tug kws tuag theej peb lub txhoj. Nwg ua le ntawd kuas peb txhaj tau nrug nwg nyob moog ibtxhis le. Thaus Yexus rov qaab lug txawm yog peb tseem muaj sa nyob lossis peb tuag lawm los xij, peb yeej yuav tau moog nrug nwg nyob.

¹¹Yog le ntawd, mej ib tug yuavtsum txhawb ib tug zug, hab ib tug paab ib tug, ib yaam le naj nub nua mej ua.

¹²Cov kwvtij, peb qha mej has tas, tsimnyog mej yuavtsum fwm cov kws saib mej. Puab yog cov kws Vaajtswv xaiv lug coj mej hab qha mej.

¹³Mej yuavtsum fwm puab hab hlub puab, rua qhov puab muab sab rau ua num paab mej. Mej yuavtsum nyob sis humxeeb hab sis hlub sis paab.

¹⁴Cov kwvtij, peb qha mej has tas, mej yuavtsum ntuag tug tuabneeg tubnkeeg, hab txhawb tug kws tsi muaj lub sab tawv, paab tug kws qaug zug hab ua sab ntev rua suavdlawg.

¹⁵Mej ib tug tsi xob ua phem pauj ib tug, tabsis mej ib tug yuavtsum ua zoo rua ib tug hab ua zoo rua suavdlawg.

¹⁶Mej yuavtsum naj nub zoo sab.

¹⁷Mej yuavtsum thov Vaajtswv tsi tseg tsi tu.

¹⁸Txawm yog mej raug kev txomnyem hab tau zoo los mej yuavtsum ua Vaajtswv tsaug. Vaajtswv xaav kuas mej txhua tug kws nrug Yexus Khetos koom ib txujsa lawd ua tej nuav.

¹⁹Mej tsi xob txwv Vaaj Ntsujplig tug Dlawbhuv.

²⁰Mej tsi xob thuam tej lug kws Vaaj Ntsujplig kuas tuabneeg qha.

²¹Mej yuavtsum ua tuab zoo saib txhua yaam huv tuabsi, saib yaam twg zoo, mej khaws yaam ntawd ca.

²²Mej yuavtsum zaam kuas dlhau txhua yaam kev phem huv tuabsi.

²³Thov Vaajtswv tug kws pub rua peb tau nyob kaaj sab lug, paab kuas mej ua tau tuabneeg zoo kawg nkaus. Hab thov Vaajtswv tsomkwm mej tug ntsujplig, mej lub sab hab mej lub cev huv tuabsi. Thaus peb tug Tswv Yexus Khetos rov lug, mej txhaj yuav tsi muaj ib qhov txhum le.

²⁴Vaajtswv tug kws hu mej lug ua nwg tsaav tuabneeg, nwg yuav ua kuas tej nuav tav, rua qhov nwg yog tug kws ncaaj nceeg.

²⁵Cov kwvtij, mej yuavtsum thov Vaajtswv paab peb hab.

²⁶Mej ib leeg yuavtsum hlub ib leeg.

²⁷Tug Tswv Yexus kuas kuv qha rua mej has tas, mej yuavtsum muab tsaab ntawv nuav nyeem rua cov ntseeg txhua tug noog.

²⁸Thov peb tug Tswv Yexus Khetos foom koob moov rua mej suavdlawg.