Read Hmong Njua Yausuas 10 Bible Online

Yausuas 10 - Hmong Njua bible

Yausuas 10

¹Adaunixedes kws ua vaajntxwv kaav lub nroog Yeluxalees nov has tas, Yausuas moog tua tau lub nroog A-is hab muab rhuav puamtsuaj taag, nteg tau tug vaajntxwv kws kaav lub nroog ntawd, hab muab tua povtseg ib yaam le tua tug vaajntxwv kws kaav lub nroog Yelikaus hab ua rua lub nroog puamtsuaj, hab nwg tseem nov has tas cov Nkinpe-oos nrug cov Yixalayees cog phoojywg hab nrug puab nyob lawm.

²Cov tuabneeg kws nyob huv lub nroog Yeluxalees ntshai heev, rua qhov lub nroog Nkinpe-oos tseem luj tshaaj tej nroog kws muaj vaajntxwv kaav hab luj dlua lub nroog A-is, hab muaj tej tubrog kws txawj tua rog nyob huv.

³Vaajntxwv Adaunixedes txhaj le tso tuabneeg moog has rua Vaajntxwv Hauhaas kws kaav lub nroog Henploos, Vaajntxwv Pilaas kws kaav lub nroog Yamus, Vaajntxwv Yafias kws kaav lub nroog Lakhis hab Vaajntxwv Denpis kws kaav lub nroog Enkiloos has tas:

⁴“Mej ca le tuaj paab kuv tua lub nroog Nkinpe-oos, rua qhov cov tuabneeg kws nyob huv lub nroog ntawd moog nrug Yausuas hab cov Yixalayees cog phoojywg lawm.”

⁵Cov Amaules tsib tug vaajntxwv kws kaav lub nroog Yeluxalees, lub nroog Henploos, lub nroog Yamus, lub nroog Lakhis, hab lub nroog Enkiloos txhaj koom tuaj tua lub nroog Nkinpe-oos.

⁶Cov Nkinpe-oos txhaj tso tuabneeg tuaj cuag Yausuas huv lub yeej kws nyob ntawm Nkilenkas has tas, “Koj ca le tuaj paab peb, rua qhov cov Amaules cov vaajntxwv kws nyob sau tej laaj roob huv tebchaws nuav koom ua ke tuaj tua peb lawm; Thov koj tsi xob tso peb tseg, ca le tuaj cawm peb!”

⁷Yog le ntawd Yausuas hab taagnrho nwg cov tubrog hab cov tubrog kws ua tau tshaaj plawg txawm sawv kev huv Nkilenkas moog lawm.

⁸Tug TSWV has rua Yausuas has tas, “Koj tsi xob ntshai puab. Kuv tub muab puab cob rua koj txhais teg lawm. Yuav tsi muaj leejtwg tawmtsaam yeej koj.”

⁹Yausuas txawm coj nwg paab tubrog tawm huv Nkilenkas maub ib mos kaaj ntug plawg moog txug ndlua lub nroog Nkinpe-oos, hab puab ca le tua thaus cov Amaules tsi nwm le.

¹⁰Thaus cov Amaules pum cov Yixalayees, tug TSWV ua rua cov Amaules ceeb hab tawg tsiv ua saab ua sua taag. Cov Yixalayees tua cov Amaules tuag coob heev rua huv lub nroog Nkinpe-oos, hab caum puab tsiv hlaa lub dlawm Npethes Hauloos moog txug ndlua lub nroog Axekas hab lub nroog Makedas.

¹¹Thaus cov Amaules tsiv hlaa lub dlawm ntawd moog ua cov Yixalayees ntej, tug TSWV tso tej lawg kws luj heev lug ntaus cov yeebncuab tuag pawg lug moog ti nkaus lub nroog Axekas. Cov kws lawg ntaus tuag tseem coob tshaaj cov kws raug cov Yixalayees tua.

¹²Nub kws tug TSWV paab cov Yixalayees tua yeej cov Amaules, Yausuas has rua tug TSWV taabmeeg cov Yixalayees has tas: “Lub nub, ca le nreg rua sau lub nroog Nkinpe-oos; lub hli, ca le nreg rua sau lub Haav Aiyaloos.”

¹³Lub nub hab lub hli txawm nreg lawv le Yausuas has moog txug thaus cov Yixalayees tua yeej puab cov yeebncuab. Zaaj xwmtxheej nuav puab muab sau tseg rua huv Yasas phoo ntawv. Lub nub nreg rua sau nruab ntug ntev le ib nub nkaus.

¹⁴Txij thaus u lug txug naj nub nua, yeej tsi tau muaj ib zag kws tug TSWV noog tuabneeg lug le nub ntawd. Tug TSWV tuaj cov Yixalayees tog.

¹⁵Tom qaab ntawd, Yausuas hab nwg cov tubrog txhaj rov lug rua huv lub yeej kws nyob huv Nkilenkas lawm.

¹⁶Cov Amaules tsib tug vaajntxwv tsiv moog nkaum rua huv lub qhov tsua Makedas,

¹⁷tabsis muaj tuabneeg pum hab lug has qha rua Yausuas has tas tsib tug vaajntxwv ntawd tsiv moog nkaum huv lub qhov tsua Makedas.

¹⁸Yausuas has tas, “Ca le dlov ib cov pobzeb luj lug txhaws lub qhov tsua hab tso tuabneeg zuv ntawm rooj qho.

¹⁹Tabsis mej tsi xob tso tseg. Mej yuavtsum caum cov yeebncuab moog hab tuaj tom qaab tua puab; tsi xob pub kuas puab tsiv dlim rov moog rua huv puab tej nroog le! Tug TSWV kws yog mej tug Vaajtswv tub pub mej tua yeej puab lawm.”

²⁰Yausuas hab cov Yixalayees tua cov yeebncuab tuag coob heev, tabsis muaj ibtxha tsiv moog nkaum rua ntawm tej ntsaa yeej kws thaiv lub nroog lawm, puab txhaj tsi raug tua.

²¹Yausuas cov tubrog rov lug cuag nwg huv lub yeej ntawm Makedas, txhua tug puavleej nyob txhij txhua. Tsi muaj leejtwg yuav muaj cuabkaav tshev lossis tawmtsaam cov Yixalayees le.

²²Yausuas has rua nwg cov tubrog tas, “Mej ca le qheb lub qhov tsua hab coj tsib tug vaajntxwv ntawd lug cuag kuv.”

²³Cov tubrog txhaj moog qheb lub qhov tsua hab coj tsib tug vaajntxwv kws kaav lub nroog Yeluxalees, lub nroog Henploos, lub nroog Yamus, lub nroog Lakhis hab lub nroog Enkiloos tawm huv qhov tsua

²⁴lug cuag Yausuas. Yausuas txhaj hu taagnrho cov tubrog Yixalayees lug cuag nwg, hab nwg kuas cov thawj tubrog kws nrug nwg moog tsuj cov vaajntxwv ntawd cejdlaab. Ces puab ua lawv le Yausuas has.

²⁵Yausuas has rua cov thawj tubrog tas, “Mej tsi xob ntshai lossis qaug zug. Mej ca le ua sab tawv qhawv hab tso sab rua tug TSWV, rua qhov nwg yeej pum zoo kuas mej ua le nuav rua peb cov yeebncuab.”

²⁶Yausuas muab tsib tug vaajntxwv ntawd tua hab coj moog dlai rua ntawm tsib tug ntoo ib nub tsaus ntuj.

²⁷Thaus lub nub poob qho lawm, Yausuas has kuas cov tubrog moog muab cov vaajntxwv ntawd txu hab coj moog pov rua huv lub qhov tsua kws puab tsiv moog nkaum, hab puab muab ib cov pobzeb luj lug txhaws lub qhov tsua. Naj nub nua tej pobzeb ntawd tseem nyob.

²⁸Nub kws Yausuas moog tua hab txeeb tau lub nroog Makedas, nwg nteg tau tug vaajntxwv kws kaav lub nroog ntawd. Nwg muab tug vaajntxwv hab cov pejxeem tua tuag taag tsi tseg ib tug seem le. Yausuas ua rua tug vaajntxwv kws kaav lub nroog Makedas ib yaam le nwg ua rua tug vaajntxwv kws kaav lub nroog Yelikaus.

²⁹Tom qaab ntawd, Yausuas hab nwg cov tubrog tawm huv lub nroog Makedas moog tua lub nroog Linas.

³⁰Tug TSWV pub cov Yixalayees tua yeej tug vaajntxwv hab txeeb tau lub nroog ntawd. Puab tua txhua tug tsi tseg ib tug seem le. Puab ua rua tug vaajntxwv ntawd ib yaam le puab ua rua tug vaajntxwv kws kaav lub nroog Yelikaus.

³¹Tom qaab ntawd, Yausuas hab nwg cov tubrog tawm huv lub nroog Linas moog vij hab tua lub nroog Lakhis.

³²Nub ob, tug TSWV pub cov Yixalayees tua yeej lub nroog Lakhis, Puab tua txhua tug tsi tseg ib tug seem le. Puab ua rua lub nroog Lakhis ib yaam le puab ua rua lub nroog Linas.

³³Vaajntxwv Haulaas kws kaav lub nroog Nkexes txawm tuaj paab lub nroog Lakhis, tabsis Yausuas puab tua nwg hab nwg cov tubrog tuag taag tsi tshuav ib tug seem le.

³⁴Tom qaab ntawd, Yausuas hab nwg cov tubrog tawm huv lub nroog Lakhis moog vij hab tua lub nroog Enkiloos.

³⁵Nub kws puab txeeb tau lub nroog ntawd, puab tua cov tuabneeg huv tuag taag tsi tseg ib tug seem ib yaam le puab ua rua lub nroog Lakhis.

³⁶Tom qaab ntawd Yausuas hab nwg cov tubrog tawm huv lub nroog Enkiloos nce tej laaj roob moog tua lub nroog Henploos,

³⁷hab txeeb tau lub nroog ntawd. Puab tua tug vaajntxwv hab cov pejxeem tuag taag ib yaam le puab ua rua cov nroog kws nyob ibncig lub nroog ntawd. Yausuas puab ua rua lub nroog hab cov tuabneeg puamtsuaj taag ib yaam le puab ua rua lub nroog Enkiloos tsi tseg ib tug seem le.

³⁸Ces Yausuas hab nwg cov tubrog rov lug tua lub nroog Denpis.

³⁹Yausuas txeeb tau lub nroog, tua tug vaajntxwv hab cov nroog kws nyob ibncig ntawd. Yausuas ua rua lub nroog Denpis tug vaajntxwv ib yaam le nwg ua rua lub nroog Henploos hab lub nroog Linas hab ob tug vaajntxwv.

⁴⁰Yausuas tua yeej thoob plawg lub tebchaws, tsi has tug vaajntxwv kws nyob sau laaj roob, nyob zaaj ntaav zaag saab nubtuaj, nyob zaaj taw roob saab nubpoob, hab zaaj mojsaab saab qaabteb. Puab tua txhua tug tsi tseg ib tug seem lawv le tug TSWV has rua Yausuas lawm.

⁴¹Yausuas tua yeej txij ndlua ntawm Kades Npane-as kws nyob saab qaabteb moog rua Nkaxas kws nyob ze ntug havtxwv, hab tau taagnrho cheebtsaam Nkusees moog txug Nkinpe-oos kws nyob saab qaumteb.

⁴²Yausuas tua yeej cov vaajntxwv nuav hab puab tej nroog, rua qhov tug TSWV kws yog cov Yixalayees tug Vaajtswv tuaj cov Yixalayees tog.

⁴³Tom qaab ntawd, Yausuas hab nwg cov tubrog rov lug rua huv lub yeej kws nyob ntawm Nkilenkas.