Read Hmong Njua Yausuas 11 Bible Online

Yausuas 11 - Hmong Njua bible

Yausuas 11

¹Thaus Vaajntxwv Yanpees kws kaav lub nroog Haxaules nov has tas, Yausuas hab nwg cov tubrog tua yeej ntau lub nroog lawm, nwg xaa xuv moog rua Vaajntxwv Yaunpas kws kaav lub nroog Madoos, tug vaajntxwv kws kaav lub nroog Siloos hab tug vaajntxwv kws kaav lub nroog Akisas,

²tug vaajntxwv kws nyob sau roob saab qaumteb, tug vaajntxwv kws nyob huv lub Haav Yauladees ntawm Havtxwv Kalilais saab qaabteb, tug vaajntxwv kws nyob ntawm taw roob, hab tug vaajntxwv kws nyob ntawm ntug havtxwv ze lub nroog Daules,

³hab Vaajntxwv Yanpees has moog rua cov Kana-aas kws nyob lawv ob saab ntug dlej Yauladees, cov Amaules, cov Hitis, cov Pelixes, cov Yenpus kws nyob sau roob hab cov Hivis kws nyob ntawm taw roob Helemoos huv tebchaws Mixepas huv tuabsi.

⁴Puab coj puab cov tubrog coob heev tuaj npaum le tej xuabzeb ntawm ntug havtxwv. Puab muaj neeg hab tsheb neeg ntau kawg le.

⁵Taagnrho cov vaajntxwv nuav sis sau ua ke tuaj tsuam yeej rua ntawm ntug Dlej Meloos tua cov Yixalayees.

⁶Tug TSWV has rua Yausuas has tas, “Koj tsi xob ntshai puab, pigkig taav lub caij nuav, kuv yuav paab cov Yixalayees tua kuas puab tuag taag huv tuabsi. Tom qaab ntawd koj ca le muab puab tej neeg txav leeg rawg hab hlawv puab tej tsheb neeg.”

⁷Yausuas hab nwg cov tubrog moog tua puab cov yeebncuab ntawm tug Dlej Meloos thaus puab tsi nwm le.

⁸Tug TSWV tub muab cov yeebncuab cob rua cov Yixalayees teg lawm; puab txhaj caum cov yeebncuab tua moog txug ntawm Milefus Mees hab Xidoos kws nyob saab qaumteb, hab moog txug rua ntawm lub Haav Mixepas kws nyob saab nubtuaj. Puab sis tua moog txug thaus cov yeebncuab tuag taag.

⁹Yausuas ua rua cov yeebncuab lawv le tug TSWV has rua nwg lawm. Yausuas txhaj muab cov yeebncuab tej neeg txav leeg rawg hab hlawv puab tej tsheb neeg.

¹⁰Yausuas rov lug txeeb tau lub nroog Haxaules hab muab tug vaajntxwv kws kaav lub nroog ntawd tua. (Thaus ntawd lub nroog Haxaules muaj fwjchim dlua lwm lub nroog huv lub tebchaws ntawd.)

¹¹Puab muab txhua tug kws nyob huv lub nroog ntawd tua tuag taag tsi tseg ib tug seem le hab muab lub nroog hlawv.

¹²Yausuas tua yeej cov vaajntxwv, txeeb tau puab tej nroog, hab muab txhua tug tuabneeg tua tuag huv tuabsi lawv le tug TSWV tug tubkhai Mauxes tau has tseg lawm.

¹³Tabsis cov Yixalayees tsi hlawv tej nroog kws nyob sau tej pov roob, Yausuas tsuas hlawv lub nroog Haxaules nkaus xwb.

¹⁴Cov Yixalayees nqaa tej khoom muaj nqes hab coj tej tsaj txhu huv lub nroog ntawd moog ua puab tug. Tabsis puab muab cov tuabneeg tua tuag taag tsi tseg ib tug seem le.

¹⁵Tug TSWV tub has rua nwg tug tubkhai Mauxes lawm, kuas Mauxes has rua Yausuas, kuas Yausuas ua lawv le tej kws has lug ntawd. Yausuas ua txhua yaam lawv le tug TSWV has rua Mauxes.

¹⁶Yausuas txeeb tau taagnrho lub tebchaws: cheebtsaam kws ua laaj roob hab taw roob, tsi has qaabteb hab qaumteb, taagnrho cheebtsaam Nkusees, cheebtsaam mojsaab qhua kws nyob saab qaabteb, hab taagnrho lub Haav Yauladees.

¹⁷Cheebtsaam saab qaabteb txij ndlua ntawm lub Roob Halaj kws ze rua ntawm Edoos, hab saab qaumteb moog txug ndlua Npankas huv lub Haav Lenpanoos kws nyob ntawm lub Roob Helemoos saab qaabteb. Yausuas ua rog nrug cov vaajntxwv kws kaav tej cheebtsaam ntawd tau ntev loo, tabsis thaus kawg Yausuas nteg tau cov vaajntxwv ntawd hab muab tua povtseg huv tuabsi lawm.

¹⁹Tsuas yog tshuav lub nroog Nkinpe-oos kws cov Hivis ibtxha kws nrug cov Yixalayees cog phoojywg txhaj tsi raug tua xwb. Dlua le lwm lub nroog raug tua hab raug rhuav puamtsuaj taag.

²⁰Tug TSWV ua kuas puab muaj lub sab tawv tuaj tua cov Yixalayees, yog le ntawd cov Yixalayees txhaj tsi hlub tshua puab hab muab puab tua puamtsuaj taag. Tej nuav muaj lawv le tug TSWV has rua Mauxes lawm.

²¹Thaus ntawd Yausuas moog tua hab rhuav cov tuabneeg Anakees kws luj hab sab heev kws nyob sau tej pov roob huv lub nroog Henploos, lub nroog Denpis, lub nroog Anas hab taagnrho sau tej laaj roob kws cov Yudas hab cov Yixalayees nyob. Yausuas tua cov tuabneeg hab rhuav puab tej nroog puamtsuaj taag huv tuabsi.

²²Tsi tshuav cov tuabneeg Anakees ib tug seem nyob huv cov Yixalayees lub tebchaws le; tsuas tshuav leej puav nyob huv Nkaxas, Nkathas hab Asedaus xwb.

²³Yausuas txeeb tau taagnrho lub tebchaws lawv le tug TSWV has tseg rua Mauxes lawm. Yausuas muab lub tebchaws faib rua cov Yixalayees txhua xeem, nyag nyob muaj nyag cheebtsaam aav. Cov Yixalayees txhaj tau nyob thaajyeeb lug tsi ua rog le lawm.