Read Hmong Njua Yausuas 13 Bible Online

Yausuas 13 - Hmong Njua bible

Yausuas 13

¹Thaus Yausuas laug heev lawm. Tug TSWV has rua nwg tas, “Koj tub laug heev lawm, tabsis lub tebchaws tseem tshuav ntau qhov kws mej tsi tau moog txeeb,

²yog taagnrho cheebtsaam kws cov Filitees hab cov Nkesus nyob,

³moog rua cheebtsaam Avimes kws nyob saab qaabteb, (lub tebchaws txij ndlua ntawm tug Dlej Sihus kws yog ntawm cov Iziv tug nrimteb saab qaumteb moog txug ndlua ntawm cov Ekiloos tug nrimteb kws ibtxwm paub has tas yog cov Kana-aas le. Cov Filitees cov vaajntxwv nyob huv lub nroog Nkaxas, Asedaus, Asekeloos, Nkathas hab Ekiloos).

⁴Tshuav taagnrho lub tebchaws Kana-aas hab Melas, (kws yog cov Xidoos tug) moog rua ntawm Afes kws nyob ntawm cov Amaules tug nrimteb;

⁵tebchaws Nkenpas hab taagnrho tebchaws Lenpanoos moog rua saab nubtuaj, txij ndlua ntawm Npankas kws nyob ntawm lub Roob Helemoos saab qaabteb moog rua ntawm lub Dlawm Hamas.

⁶Nuav yog xaam taagnrho cov Xidoos lub tebchaws kws nyob sau tej laaj roob ntu nruab nraab ntawm tej Roob Lenpanoos hab Milefus Mees. Kuv yuav ntab cov tuabneeg huv lub tebchaws ntawd tawm ua ntej kws cov Yixalayees moog nyob. Koj yuavtsum muab lub tebchaws faib rua cov Yixalayees lawv le kuv has rua koj lawm.

⁷Nwgnuav koj ca le muab lub tebchaws faib rua cov Yixalayees cuaj xeem hab ib nraab xeem Manaxes ua puab tug moog le.”

⁸Xeem Lunpees, xeem Khas hab ib nraab xeem Manaxes tub tau feem aav kws tug TSWV tug tubkhai Mauxes faib rua puab lawm; yog cheebtsaam ntawm tug dlej Yauladees saab nubtuaj.

⁹Puab le aav txij ndlua ntawm Alu-es (kws nyob ntawm lub Haav Alenoos) hab lub nroog kws nyob huv plawv lub vuaghaav ntawd, hab taagnrho lub taj nraag ntawm Medinpas moog txug rua Dinpoos;

¹⁰hab moog txug ntawm cov Amoos tug nrimteb hab taagnrho cov nroog kws cov Amaules tug Vaajntxwv Xihoos kws nyob huv lub nroog Hesenpoos kaav.

¹¹Losloov cheebtsaam Nkile-as, cheebtsaam Nkesus hab cheebtsaam Makhas, taagnrho lub Roob Helemoos, hab taagnrho tebchaws Npasaas moog rua ntawm lub nroog Xalekas.

¹²Losloov lub nroog Asetalus hab lub nroog Edeles kws Vaajntxwv Aunkas kaav. Aunkas yog tug vaajntxwv kawg ntawm cov Lefayees. Mauxes tua yeej cov tuabneeg nuav hab muab puab ntab tawm tsiv moog.

¹³Tabsis cov Yixalayees tsi ntab cov Nkesus hab cov Makhas; puab tseem nrug cov Yixalayees nyob huv lub tebchaws.

¹⁴Mauxes tsi faib aav rua xeem Levis lawv le tug TSWV tau has rua Mauxes has tas, puab feem tug yog tej kws cov Yixalayees coj tuaj fij rua sau tug TSWV kws yog cov Yixalayees tug Vaajtswv lub thaaj.

¹⁵Mauxes faib aav rua xeem Lunpees ua puab tug lawv le puab tej tsev tuabneeg.

¹⁶Puab le aav txij ndlua ntawm Alu-es, (kws nyob ntawm lub Haav Alenoos) hab lub nroog kws nyob huv plawv lub vuaghaav ntawd, hab taagnrho lub taj nraag kws nyob puagncig lub nroog Medinpas;

¹⁷hab losloov lub nroog Hesenpoos hab cov nroog kws nyob huv lub taj nraag yog: Dinpoos, Npamaus Npa-aas, Npethes, Npa-aasme-oos,

¹⁸Yahas, Kedemaus, Mefas,

¹⁹Kiliyathas, Xinpemas, Xeles Sahas kws nyob sau lub laaj roob huv lub vuaghaav,

²⁰Npes Pe-us hab tej ntaav zaag ntawm lub Roob Pikhas hab Npethes Yesimaus;

²¹hab losloov cov nroog kws nyob huv tej taj nraag, hab taagnrho cheebtsaam kws cov Amaules tug Vaajntxwv Xihoos kws nyob huv lub nroog Hesenpoos kaav. Mauxes tua yeej Xihoos ib yaam le nwg tua yeej cov numtswv kws nyob huv tebchaws Midias: Evis, Lekees, Xules, Hules hab Lenpas. Taagnrho cov numtswv nuav puavleej nrug Vaajntxwv Xihoos kaav tebchaws.

²²Npe-us tug tub Npala-aas kws txawj saib moov yog ib tug ntawm cov tuabneeg kws cov Yixalayees muab tua lawm.

²³Xeem Lunpees tug nrimteb saab nubpoob yog lawv tug dlej Yauladees. Tej nroog hab tej zog kws has taag lug nuav yog muab rua xeem Lunpees ua puab tug lawv le puab tej tsev tuabneeg.

²⁴Mauxes faib aav rua xeem Khas ua puab tug lawv le puab tej tsev tuabneeg.

²⁵Puab le aav yog losloov ntawm lub nroog Yaxes hab taagnrho cov nroog kws nyob huv Nkile-as, ib nraab tebchaws Amoos moog txug rua ntawm Alu-es kws nyob ntawm Lanpas saab nubtuaj;

²⁶puab le aav txij ndlua ntawm Hesenpoos moog rua ntawm Lamas Mipes, Npetunis, hab txij ndlua ntawm Mahana-ees moog txug rua ntawm cov Ludenpas tug nrimteb.

²⁷Nyob huv lub Haav Yauladees, yog losloov tej nroog hab tej zog: Npethes Halas, Npes Nilas, Xukaus hab Xafoos, feem aav seem kws Vaajntxwv Xihoos kws nyob huv lub nroog Hesenpoos kaav. Puab tug nrimteb saab nubpoob lawv tug dlej Yauladees moog txug rua peg Havtxwv Kalilais.

²⁸Cov nroog hab cov zog kws has lug nuav, yog cov kws muab faib rua xeem Khas ua puab tug lawv le puab tej tsev tuabneeg.

²⁹Mauxes faib aav rua ib nraab xeem Manaxes ua puab tug lawv le puab tej tsev tuabneeg.

³⁰Puab le aav txij ndlua ntawm Mahana-ees hab losloov tebchaws Npasaas kws Vaajntxwv Aunkas kaav, hab taagnrho Yais rau caum lub zog kws nyob huv tebchaws Npasaas;

³¹hab losloov lub tebchaws Nkile-as ib nraab moog rua ntawm lub nroog Asetalus hab lub nroog Edeles kws yog cov tuamceeb nroog huv tebchaws Npasaas kws Vaajntxwv Aunkas kaav. Taagnrho cov nroog hab cov zog nuav muab faib rua Manaxes tug tub Makhis cov xeebntxwv ib nraab ua puab tug lawv le puab tej tsev tuabneeg.

³²Thaus Mauxes nyob huv lub taj nraag Mau-am, nwg faib lub tebchaws ntawm lub nroog Yelikaus hab tug dlej Yauladees saab nubtuaj rua cov Yixalayees;

³³tabsis Mauxes tsi faib aav rua xeem Levis. Nwg has rua puab tas, puab feem tug yog tej kws suavdlawg coj tuaj fij rua tug TSWV kws yog cov Yixalayees tug Vaajtswv xwb.