Read Hmong Njua Yausuas 14 Bible Online

Yausuas 14 - Hmong Njua bible

Yausuas 14

¹Nuav yog has txug muab lub tebchaws Kana-aas kws nyob ntawm tug dlej Yauladees saab nubpoob faib rua cov Yixalayees. Tug povthawj Ele-axas, Noos tug tub Yausuas hab cov Yixalayees txhua xeem tej thawjcoj yog cov faib rua puab,

²puab rhu ntawv faib cheebtsaam aav ntawm tug dlej Yauladees saab nubpoob rua cuaj xeem hab ib nraab xeem Manaxes lawv le tug TSWV has rua Mauxes lawm.

³Mauxes tub faib lub tebchaws ntawm tug dlej Yauladees saab nubtuaj rua ob xeem hab ib nraab xeem lawm. (Yauxej caajceg faib ua ob xeem, xeem Manaxes hab xeem Efalayees.) Tabsis Mauxes tsi faib aav rua xeem Levis. Rua qhov puab nyob qhov twg, puab yeej tau aav lug ua vaaj ua tsev hab tau tshaav zaub rua puab tej tsaj lawm.

⁵Cov Yixalayees muab lub tebchaws faib lawv le tug TSWV has rua Mauxes lawm.

⁶Muaj ib nub xeem Yudas ibtxha tuaj cuag Yausuas ntawm Nkilenkas, mas Yefunes tug tub Kalej kws yog cuab Kenis has rua Yausuas has tas, “Koj yeej paub qhov kws tug TSWV has rua nwg tug tubkhai Mauxes txug koj hab kuv thaus peb tseem nyob ntawm Kades Npane-as lawm.

⁷Thaus tug TSWV tug tubkhai Mauxes khaiv kuv huv Kades Npane-as tuaj soj lub tebchaws nuav, kuv noobnyoog muaj plaub caug xyoo. Kuv coj tej lug tseeb rov lug qha rua nwg.

⁸Cov tuabneeg kws nrug kuv moog soj tebchaws ua rua peb cov tuabneeg ntshai heev. Tabsis kuv muab sab npuab tug TSWV kws yog kuv tug Vaajtswv.

⁹Vim kuv ua le ntawd, Mauxes txhaj coglug has tas, kuv hab kuv cov xeebntxwv yuav tau feem aav huv lub tebchaws kws kuv tau moog tsuj ua kuv tug.

¹⁰Tabsis txij thaus tug TSWV has rua Mauxes lug txug nwgnuav tub tau plaub caug tsib xyoos lawm. Thaus ntawd cov Yixalayees tseem taug kev lug hlaa taj suabpuam, hab tug TSWV tseem pub kuv muaj sa nyob lug txug naj nub nua lawv le nwg tau coglug tseg lawm. Koj sim saib! Nwgnuav kuv tub muaj yim caum tsib xyoos lawm,

¹¹tabsis nub nua kuv tseem muaj zug khov kho ua taug rog hab ua taug num ib yaam le thaus Mauxes khaiv kuv moog soj tebchaws.

¹²Nwgnuav, thov koj muab cheebtsaam kws ua laaj roob rua kuv lawv le tug TSWV tau coglug tseg rua kuv, nub kws kuv hab cov tuabneeg kws nrug kuv moog soj tebchaws lug qha rua Mauxes. Peb qha rua mej suavdlawg has tas, cov tuabneeg Anakees kws luj hab sab nyob huv tej nroog luj kws muaj ntsaa yeej thaiv khov heev. Tej zag tug TSWV yuav nrug nraim kuv hab kuv yuav lawv tau puab tawm ib yaam le tug TSWV tau coglug tseg lawm.”

¹³Yausuas foom koob moov rua Yefunes tug tub Kalej hab muab lub nroog Henploos rua nwg ua nwg tug.

¹⁴Lub nroog Henploos tseem yog Yefunes tug tub Kalej kws yog cuab Kenis cov xeebntxwv le, rua qhov Kalej muab sab npuab tug TSWV kws yog cov Yixalayees tug Vaajtswv.

¹⁵Yaav taag lug lub nroog Henploos nuav hu ua Alenpas. (Alenpas yog cov Anakees ib tug tuabneeg kws muaj zug heev.) Lub tebchaws txhaj nyob thaajyeeb tsi ua rog.