Read Hmong Njua Yausuas 16 Bible Online

Yausuas 16 - Hmong Njua bible

Yausuas 16

¹Yauxej cov xeebntxwv tug nrimteb saab qaabteb yog txij ndlua ntawm tug dlej Yauladees kws ze lub nroog Yelikaus ntawm lub qhovdlej kws nyob ntawm Yelikaus saab nubtuaj moog rua taj suabpuam. Tug nrimteb pib ntawm Yelikaus nce moog rua sau lub laaj roob moog rua peg lub nroog Npethees.

²Pib ntawm Npethees moog rua Lus hab hlaa moog rua Atalus Adas kws yog cov Alekhis nyob,

³tug nrimteb nkhaus moog rua saab nubpoob ntawm cheebtsaam kws cov Yafeles nyob, hab dlhau moog rua Npethes Hauloos Theem Qeg. Tug nrimteb pib ntawd moog txug rua Nkexes, hab moog xaus rua ntawm Havtxwv Meditelanees.

⁴Yauxej cov xeebntxwv kws yog xeem Efalayees hab xeem Manaxes Saab Nubpoob tau tej aav nuav ua puab tug.

⁵Nuav yog cheebtsaam aav kws faib rua xeem Efalayees lawv le puab tej tsev tuabneeg. Puab tug nrimteb txij ndlua ntawm Atalus Adales saab nubtuaj moog rua Npethes Hauloos Theem Sab,

⁶hab pib ntawd moog rua Havtxwv Meditelanees. Lub nroog Mimethas nyob rua saab qaumteb ntawm puab lub tebchaws. Puab tug nrimteb saab nubtuaj nkhaus moog rua Tanas Silaus hab moog hlaa ntawm Yanau-as saab nubtuaj.

⁷Tug nrimteb pib ntawm Yanau-as nqeg moog rua Atalus hab Nalas dlhau moog rua ntawm Yelikaus hab moog xaus rua ntawm tug dlej Yauladees.

⁸Tug nrimteb kws moog rua saab nubpoob, pib ntawm Tapuas moog rua ntawm tug Dlej Kanas hab moog xaus rua ntawm Havtxwv Meditelanees. Tej kws has lug nuav yog cheebtsaam aav kws muab faib rua xeem Efalayees ua puab tug lawv le puab tej tsev tuabneeg,

⁹hab tej zog luj zog miv kws nyob huv xeem Manaxes tug nrimteb, tabsis muab tu rua xeem Efalayees lawm.

¹⁰Xeem Efalayees tsi ntab cov Kana-aas kws nyob huv lub nroog Nkexes tawm, yog le ntawd, cov Kana-aas txhaj tseem nrug cov Efalayees nyob lug txug naj nub nua, tabsis cov Efalayees yuam cov Kana-aas ua puab qhev.