Read Hmong Njua Yausuas 18 Bible Online

Yausuas 18 - Hmong Njua bible

Yausuas 18

¹Thaus cov Yixalayees tua hab txeeb tau tebchaws taag lawd, taagnrho cov Yixalayees tuaj sis sau rua huv Silaus hab tsaa tug TSWV lub Tsevntaub. Ces lub tebchaws nyob thaajyeeb lug lawm.

²Tabsis tseem tshuav xyaa xeem Yixalayees kws tsi tau faib aav rua puab.

³Yausuas has rua cov Yixalayees has tas, “Mej tseem yuav tog txug thaus twg mej maam le moog tua hab txeeb lub tebchaws kws tug TSWV kws yog mej cov yawmkoob tug Vaajtswv tub muab rua mej lawd?

⁴Mej ca le xaiv ib xeem peb leeg txivneej tuaj rua kuv. Kuv yuav khaiv puab moog kuas thoob lub tebchaws ntsuag tej cheebtsaam kws puab nyam nyob ua puab tug. Tom qaab ntawd puab maam rov lug qha rua kuv.

⁵Yuav muab lub tebchaws kws puab moog ntsuag ntawd faib ua xyaa cheebtsaam rua puab; xeem Yudas yuav nyob cheebtsaam saab qaabteb, hab xeem Yauxej yuav nyob cheebtsaam saab qaumteb.

⁶Mej muab xyaa cheebtsaam aav ntawd sau kuas meej rua huv ntawv hab coj lug rua kuv. Kuv yuav rhu ntawv hab nug tug TSWV kws yog peb tug Vaajtswv hab faib aav rua mej.

⁷Tabsis kuv yuav tsi faib aav rua xeem Levis, rua qhov puab feem tug yog ua cov povthawj kws ua tug TSWV teg num. Tabsis xeem Khas, xeem Lunpees hab ib nraab xeem Manaxes, ces peb tub paub has tas tug TSWV tug tubkhai Mauxes tub faib cheebtsaam aav ntawm tug dlej Yauladees saab nubtuaj rua puab lawm.”

⁸Yausuas has tas “Mej ca le moog ntsuag kuas thoob lub tebchaws hab muab sau rua huv ntawv coj lug rua kuv, kuv yuav nyob huv lub nroog Silaus nuav tog rhu ntawv hab nug tug TSWV.” Thaus Yausuas has le ntawd taag, puab txawm moog ntsuag lub tebchaws lawm.

⁹Cov txivneej ntawd txawm moog thoob plawg lub tebchaws hab lug nyob quastsawg sau saib yuav muab faib le caag txhaj tau xyaa cheebtsaam, hab sau tej nroog txhua lub. Ces puab rov lug cuag Yausuas huv Silaus.

¹⁰Yausuas txhaj le rhu ntawv taabmeeg tug TSWV, hab muab tej cheebtsaam aav ntawd faib rua xyaa xeem Yixalayees ib xeem ib cheebtsaam.

¹¹Xeem Npeenyamees yog thawj paab kws Yausuas xub faib aav rua. Puab cheebtsaam aav nyob ntu nruab nraab ntawm xeem Yudas hab xeem Yauxej.

¹²Puab tug nrimteb saab qaumteb yog txij ndlua ntawm tug Dlej Yauladees nce moog rua zaaj ntaav zaag ntawm Yelikaus saab qaumteb, nkhaus moog rua saab nubpoob moog hlaa cheebtsaam kws ua laaj roob hab moog rua taj suabpuam Npethavees.

¹³Tug nrimteb moog rua zaaj ntaav zaag kws nyob saab qaabteb ntawm lub nroog Lus, (kws hu ua Npethees), nqeg moog rua Atalaus Adales, moog rua sau lub roob kws nyob saab qaabteb ntawm Npethes Hauloos Theem Qeg.

¹⁴Tug nrimteb puav lub roob nuav saab nubpoob moog rua saab qaabteb, hab moog rua ntawm Kili-as Npa-aas (lossis Kili-as Ye-alees), kws yog xeem Yudas aav. Tej kws has lug nuav yog tug nrimteb saab nubpoob.

¹⁵Tug nrimteb saab qaabteb txij ndlua ntawm ceg kaum nroog Kili-as Ye-alees moog rua ntawm cov Qhovdlej Netau-as.

¹⁶Tug nrimteb nqeg moog rua ntawm lub taw roob kws saib ntsoov lub Haav Hinoos ntawm saab qaumteb kws lub Haav Lefayees moog xaus. Tug nrimteb hlaa lub Haav Hinoos nqeg moog rua zaaj ntaav zaag saab qaabteb ntawm Yenpus hab nqeg moog rua Elaunkees.

¹⁷Tug nrimteb lem moog rua saab qaumteb moog rua Esemes, moog rua Nkelilaus kws nyob ncaaj lub Dlawm Adumees, hab tug nrimteb nqeg moog rua ntawm lub Pobzeb Npuhaas (Npuhaas yog Lunpees tug tub),

¹⁸hab hlaa saab qaumteb ntawm zaaj ntaav zaag kws saib ntsoov rua huv lub Haav Yauladees. Tug nrimteb nqeg moog rua huv lub vuaghaav ntawd,

¹⁹hab hlaa moog rua zaaj ntaav zaag ntawm Npethes Haunkelas saab qaumteb, hab moog xaus rua ntawm Havtxwv Tuag kws tug dlej Yauladees lug tshuam saab qaumteb. Tej kws has lug nuav yog tug nrimteb kawg saab qaabteb.

²⁰Tug nrimteb saab nubtuaj yog lawv tug dlej Yauladees. Tej kws has lug nuav yog cheebtsaam aav kws tu rua xeem Npeenyamees ua puab tug lawv le puab tej tsev tuabneeg.

²¹Cov nroog kws faib rua xeem Npeenyamees ua puab tug lawv le puab tej tsev tuabneeg yog: Yelikaus, Npethes Haunkelas, Emes Kexis,

²²Npes Alanpas, Xemalais, Npethees,

²³Avimes, Palas, Aupalas,

²⁴Khefalamaunis, Aufanis hab Nkenpas: Taagnrho muaj kaum ob lub nroog hab tej zog kws nyob ibncig.

²⁵Hab Nkinpe-oos, Lamas, Npelaus,

²⁶Mixepas, Khefilas, Mauxas,

²⁷Lekees, Ipees, Talalaj,

²⁸Xelas, Hales, Yenpus (lossis Yeluxalees), Nkinpe-as hab Kili-as Ye-alees: Taagnrho muaj kaum plaub lub nroog hab tej zog kws nyob ibncig. Tej kws has lug nuav yog cheebtsaam aav kws faib rua xeem Npeenyamees ua puab tug lawv le puab tej tsev tuabneeg.