Read Hmong Njua Yausuas 19 Bible Online

Yausuas 19 - Hmong Njua bible

Yausuas 19

¹Xeem Xime-oos yog paab ob kws Yausuas faib aav rua puab, lawv le puab tej tsev tuabneeg. Puab cheebtsaam aav nthuav moog txug ndlua ntawm xeem Yudas tug nrimteb

²kws yog losloov lub nroog Npesenpas lossis Senpas, Muladas,

³Haxas Sualis, Npalas, Exees,

⁴Etaulas, Npethus, Haumas,

⁵Xikelas, Npes Makanpaus, Haxas Xuxas,

⁶Npes Lenpaus hab Saluhees: Taagnrho muaj kaum peb lub nroog hab tej zog kws nyob ibncig.

⁷Hab Ayees, Limoos, Ethes hab Asas: Taagnrho muaj plaub lub nroog hab tej zog kws nyob ibncig.

⁸Losloov tej zog kws nyob ibncig tej nroog ntawd moog rua ntawm Npalas Npees (lossis Lamas) kws nyob saab qaabteb. Tej kws has lug nuav yog feem aav kws faib rua xeem Xime-oos ua puab tug lawv le puab tej tsev tuabneeg.

⁹Vim xeem Yudas tau aav dlaav puab nyob tsi taag txhaj muab ib feem faib rua xeem Xime-oos.

¹⁰Xeem Xenpuloos yog paab peb kws Yausuas faib aav rua puab lawv le puab tej tsev tuabneeg. Puab cheebtsaam aav nthuav moog txug ndlua lub nroog Xalis.

¹¹Puab tug nrimteb txij ndlua ntawd moog rua saab nubpoob moog txug rua Male-as npuab lub nroog Danpeses hab lawv tug dlej ntawm Yaunees saab nubtuaj.

¹²Tug nrimteb pib ntawm Xalis moog rua saab nubtuaj moog txug rua Khilaus Tanpaus moog rua Danpelas hab nce moog rua peg Yafias.

¹³Tug nrimteb saab nubtuaj tseem moog ntxiv rua Nkas Hefeles hab Ekaxees, nkhaus lawv lub nroog Ne-as tug nrimteb moog txug ndlua ntawm Limoos.

¹⁴Saab qaumteb, tug nrimteb nkhaus moog rua Hanathoos hab moog xaus rua ntawm lub Haav Itahees.

¹⁵Losloov lub nroog Katas, Nahalas, Siloos, Idalas hab Npelehees: Taagnrho muaj kaum ob lub nroog hab tej zog kws nyob ibncig.

¹⁶Tej kws has lug nuav yog tej nroog hab tej zog huv cheebtsaam kws faib rua xeem Xenpuloos ua puab tug lawv le puab tej tsev tuabneeg.

¹⁷Xeem Ixakhas yog paab plaub kws Yausuas faib aav rua puab lawv le puab tej tsev tuabneeg.

¹⁸Puab cheebtsaam aav yog losloov lub nroog Yexelees, Khexulaus, Sunees,

¹⁹Hafalais, Si-oos, Anahalas,

²⁰Lanpis, Kisi-oos, Enpes,

²¹Lemes, Enkanees, Ehadas, hab Npepaxes.

²²Puab tug nrimteb npuab Tanpaus, Sahaxumas, hab Npes Semes, hab moog xaus rua ntawm tug Dlej Yauladees, taagnrho muaj kaum rau lub nroog hab tej zog kws nyob ibncig.

²³Tej kws has lug nuav yog tej nroog hab tej zog huv cheebtsaam aav kws faib rua xeem Ixakhas ua puab tug lawv le puab tej tsev tuabneeg.

²⁴Xeem Aseles yog paab tsib kws Yausuas faib aav rua puab lawv le puab tej tsev tuabneeg.

²⁵Puab cheebtsaam aav yog losloov lub nroog Helekas, Halis, Npetees, Akesas,

²⁶Alas Meles, Amas, hab Misales. Tug nrimteb Saab nubpoob npuab lub Roob Kalemees hab Sihaus Linas.

²⁷Tug nrimteb nkhaus moog rua saab nubtuaj moog txug rua Npes Dankoos, npuab Xenpuloos hab lub Haav Itahees moog rua saab qaumteb txug peg lub nroog Npethemes hab Neyees. Tug nrimteb moog ntxiv rua saab qaumteb moog txug ntawm lub nroog Kanpus,

²⁸Enpeloos, Lehaus, Hamoos, hab Kanas moog rua ntawm lub nroog Xidoos.

²⁹Ces tug nrimteb lem moog rua Lamas moog tshuam rua ntawm lub nroog Tiles kws muaj ntsaa yeej thaiv; hab lem moog rua Hauxas hab xaus rua ntawm Havtxwv Meditelanees. Losloov lub nroog Mahalas, Akexis,

³⁰Umas, Afes hab Lehaus: Taagnrho muaj neeg nkaum ob lub nroog hab tej zog kws nyob ibncig.

³¹Tej kws has lug nuav yog tej nroog hab tej zog huv cheebtsaam aav kws faib rua xeem Aseles ua puab tug lawv le puab tej tsev tuabneeg.

³²Xeem Nathalis yog paab rau kws Yausuas faib aav rua puab lawv puab tej tsev tuabneeg.

³³Puab tug nrimteb txij ndlua ntawm Heles moog rua ntawm tsob ntoo qheb huv Xananees moog rua Adaminekes hab moog rua Yaanias, dlhau moog rua ntawm Lakus hab moog xaus rua ntawm tug Dlej Yauladees.

³⁴Tug nrimteb pib ntawd lem moog rua saab nubpoob moog txug rua Anaus Tanpaus hab pib ntawd moog rua Hukaus, npuab Xenpuloos saab qaabteb, Aseles nyob saab nubpoob, hab tug Dlej Yauladees nyob saab nubtuaj.

³⁵Tej nroog kws muaj ntsaa yeej thaiv yog: Xidis, Xeles, Hamas, Lakas, Khineles,

³⁶Adamas, Lamas, Haxaules,

³⁷Kedes, Ediles, Ehaxaus,

³⁸Yiloos, Midales, Haulees, Npetanas, hab Npes Semes: Taagnrho muaj kaum cuaj lub nroog hab tej zog kws nyob ibncig.

³⁹Tej kws has lug nuav yog tej nroog hab tej zog huv cheebtsaam aav kws faib rua xeem Nathalis ua puab tug lawv le puab tej tsev tuabneeg.

⁴⁰Xeem Daas yog paab xyaa kws Yausuas faib aav ua puab lawv le puab tej tsev tuabneeg.

⁴¹Puab cheebtsaam aav losloov lub nroog Xaulas, Esetaus, Isemes,

⁴²Sa-anpimes, Aiyaloos, Ithelas,

⁴³Eloos, Teenas, Ekiloos,

⁴⁴Etekes, Nkinpethoos, Npalas,

⁴⁵Yehus, Npenelas, Nkalimoos,

⁴⁶Meyakoos hab Lakoos moog rua cheebtsaam kws nyob ibncig lub nroog Yaupas,

⁴⁷Thaus xeem Daas lub tebchaws poob lawd, puab moog tua hab txeeb lub nroog Lases. Puab txeeb tau lub nroog lug hab tua cov tuabneeg kws nyob huv lub nroog tuag taag hab muab lub nroog ua puab tug. Puab moog nyob huv hab muab lub nroog Lases hloov npe hu ua Daas lawv le puab tug yawmkoob Daas lub npe.

⁴⁸Tej kws has lug nuav yog tej nroog hab tej zog huv cheebtsaam aav kws faib rua xeem Daas ua puab tug lawv le puab tej tsev tuabneeg.

⁴⁹Thaus cov Yixalayees faib aav rua txhua xeem taag lawd, puab muab ib feem aav rua Noos tug tub Yausuas ua nwg tug

⁵⁰lawv le tug TSWV tau has tseg lawm, puab muab lub nroog Tinas Xelas kws nyob huv xeem Efalayees cheebtsaam aav kws ua laaj roob rua Yausuas lawv le nwg thov. Yausuas ua nroog hab nyob huv.

⁵¹Tug povthawj Ele-axas, Noos tug tub Yausuas hab cov thawjcoj ntawm txhua xeem Yixalayees tej tsev tuabneeg tuaj rhu ntawv nug tug TSWV huv lub nroog Silaus, ntawm tug TSWV lub Tsevntaub. Puab muab lub tebchaws faib tav taag le ntawd.