Read Hmong Njua Yausuas 2 Bible Online

Yausuas 2 - Hmong Njua bible

Yausuas 2

¹Tom qaab ntawd, Yausuas tso ob tug tuabneeg tawm huv puab lub yeej kws nyob ntawm taj ntoo Akaxias moog soj lub nroog Yelikaus huv tebchaws Kana-aas tuabywv. Thaus obtug moog txug huv lub nroog Yelikaus lawm, obtug moog su huv ib tug namndlav kws npe hu ua Lahaj lub tsev.

²Tug vaajntxwv kws kaav lub nroog Yelikaus nov has tas, mo ntawd muaj ob tug tuabneeg Yixalayees tuaj rua huv puab lub nroog lawm, yog tuaj soj tebchaws.

³Vaajntxwv txawm tso tuabneeg moog has rua Lahaj has tas, “Koj ca le coj ob tug txivneej kws tuaj su huv koj tsev tawm lug rua peb, rua qhov obtug tuaj soj peb lub tebchaws.”

⁴[Tabsis Lahaj tub coj obtug moog zais rua huv cov maaj kws nwg hlais lug ca rua sau tsev lawm.] Lahaj has rua puab tas, “Muaj ob tug txivneej tuaj huv kuv tsev nuav tag, tabsis kuv tsi paub has tas sov obtug tuaj qhov twg tuaj; hab thaus tsaus ntuj zuag kws luas tseem tsi tau kaw roojvaag, obtug tub tawm moog lawm. Kuv tsi paub sov obtug moog rua qhov twg lawm. Mej ca le caum obtug qaab moog, nyaj mej yuav moog caum cuag.”

⁷Thaus vaajntxwv cov tuabneeg ntawd tawm moog dlhau lawm, luas txawm kaw roojvaag. Puab nrhav moog ti nkaus nraag ntug dlej Yauladees ntu kws tuabneeg pheej hlaa moog lug los tsi pum le.

⁸Thaus obtug tsi tau pw, Lahaj nce moog has rua obtug tas,

⁹“Kuv paub has tas tug TSWV tub muab lub tebchaws nuav rua mej lawm. Tej tuabneeg kws nyob huv lub tebchaws nuav poob sab hab ntshai mej kawg le.

¹⁰Peb nov has tas thaus mej lug nraag tebchaws Iziv lug, tug TSWV ua rua Havtxwv Lab qhuav qhawv ua kev rua mej moog hab peb tseem nov has tas, thaus mej lug txug ntawm ntug dlej Yauladees saab nubtuaj, mej nteg tau Xihoos hab Aunkas kws yog cov Amaules ob tug vaajntxwv tua povtseg lawm.

¹¹Thaus peb nov tej xwm nuav, peb txhawj hab ntshai kawg le. Peb txhua tug qaug zug taag vim tej kws mej ua ntawd. Tug TSWV kws yog mej tug Vaajtswv yog tug Vaajtswv kws kaav sau ntuj hab huv nplajteb nuav.

¹²Muaj Vaajtswv saib ntsoov peb, yog le ntawd meb yuavtsum coglug rua kuv has tas, mej yuav ua zoo rua kuv hab kuv tej kwvtij neejtsaa ib yaam le kuv tub ua zoo rua meb lawm, thov meb muab ib yaam khoom ua timkhawv rua kuv, kuv txhaj yuav ntseeg meb.

¹³Thov meb coglug rua kuv has tas, meb yuav paab kuv nam kuv txiv, kuv cov nug, kuv cov vivncaug hab puab tsev tuabneeg kuas dlim, tsi xob ca luas tua peb.”

¹⁴Ob tug txivneej ntawd has rua Lahaj has tas, “Yog wb tsi ua lawv le wb has, thov kuas Vaajtswv rhu wb txujsa! Yog koj tsi qha qhov kws wb tuaj nuav rua leejtwg paub le, thaus tug TSWV muab lub tebchaws nuav rua peb lawm, wb yuav ua lawv le tej lug kws wb tau cog tseg rua koj.”

¹⁵Lahaj lub tsev nyob npuab tug ntsaa yeej kws thaiv lub nroog. Nwg tso hlua dlauv ntawm qhovrais lawv tug ntsaa yeej moog rua saab nrau rua obtug nqeg tsiv lawm.

¹⁶Nwg has rua obtug tas, “Meb ca le tsiv moog nraim peb nub rua peg tej roob kuas vaajntxwv cov tuabneeg kws nrhav meb rov lug taag tsaiv, meb yuav moog qhov twg los meb maam le moog, puab txhaj tsi pum meb.”

¹⁷Ob tug txivneej ntawd has rua Lahaj has tas, “Wb yuav ua lawv le koj kuas wb coglug rua koj.

¹⁸Koj yuavtsum ua le nuav. Thaus peb tuaj tua mej lub tebchaws, koj yuavtsum muab ib pluaj ntaub lab khi rua ntawm lub qhovrais kws koj tso hlua rua wb nqeg tsiv. Koj ca le coj koj nam koj txiv, koj cov nug, koj cov vivncaug hab puab tsev tuabneeg tuaj nyob huv koj tsev.

¹⁹Yog leejtwg tawm huv koj tsev moog rua saab nrau, nwg raug tua tuag los nwg tsuas ris nwg lub txim xwb, wb yuav tsi nrug paub; tabsis yog cov tuabneeg kws nyob huv koj tsev raug tua tuag, wb yuav ris lub txim ntawd.

²⁰Yog has tas koj qha tej kws wb tuaj nuav rua luas paub lawm, wb yuav tsi ua lawv le tej lug kws koj kuas wb coglug rua koj.”

²¹Lahaj pum zoo ua lawv le obtug has, nwg txhaj kuas obtug tawm moog. Thaus obtug tawm moog lawm, nwg txawm muab ib pluaj ntaub lab khi rua ntawm qhovrais.

²²Obtug txawm tsiv moog nkaum peg roob; mas vaajntxwv cov tuabneeg moog nrhav obtug rua txhua qhov tau peb nub los nrhav tsi tau le. Puab txhaj rov lug rua huv Yelikaus lawm.

²³Tom qaab ntawd obtug maam le nqeg sau roob lug hlaa tug dlej Yauladees moog cuag Yausuas. Obtug pav tej xwm ntawd huv tuabsi rua Yausuas noog,

²⁴hab obtug has ntxiv tas, “Wb paub tseeb has tas tug TSWV tub muab lub tebchaws nuav rua peb lawm, cov tuabneeg kws nyob huv lub nroog ntawd ntshai peb kawg le.”