Read Hmong Njua Yausuas 20 Bible Online

Yausuas 20 - Hmong Njua bible

Yausuas 20

¹Tug TSWV has rua Yausuas has tas,

²“Koj has rua cov Yixalayees kuas puab ca le xaiv ib cov nroog cawm sav lawv le kuv has rua Mauxes qha rua koj lawm.

³Yog leejtwg tua yuam kev raug ib tug tuabneeg tuag, tug ntawd ca le tsiv moog nkaum huv cov nroog ntawd kuas dlim ntawm tug kws nrhav nwg tua pauj.

⁴Nwg yuavtsum tsiv moog nkaum huv cov nroog ntawd ib lub, moog rua ntawm qhov chaw txav txim kws nyob ntawm roojvaag nroog, hab pav tej xwm ntawd qha rua cov thawjcoj. Ces puab txhaj yuav pub nwg moog rua huv lub nroog hab muab chaw rua nwg nyob.

⁵Yog has tas, tug kws nrhav nwg tua tuaj txug ntawm roojvaag los puab yuav tsi muab nwg cob rua tug ntawd. Puab yuav tsomkwm nwg, rua qhov yog nwg tua yuam kev raug tuag xwb, tsi yog nwg chim hab txhobtxwm tua.

⁶Nwg yuav tau nyob huv lub nroog ntawd moog txug nub kws luas coj nwg moog txav txim lossis moog txug nub kws tug ua Povthawj Hlub lub sijhawm ntawd tuag tsaiv, nwg maam le tau rov moog rua huv nwg lub nroog.”

⁷Yog le ntawd, saab tebchaws ntawm tug Dlej Yauladees saab nubpoob, puab txhaj tshwj lub nroog Kedes huv Kalilais huv xeem Nathalis cheebtsaam aav kws ua laaj roob; lub nroog Sekhees huv xeem Efalayees cheebtsaam aav kws ua laaj roob; hab lub nroog Henploos huv xeem Yudas cheebtsaam aav kws ua laaj roob.

⁸Ntawm tug Dlej Yauladees saab nubtuaj huv lub taj suabpuam kws nyob ntawm lub nroog Yelikaus saab nubtuaj, puab xaiv lub nroog Npexeles huv xeem Lunpees cheebtsaam aav; lub nroog Lamaus huv Nkile-as kws yog xeem Khas cheebtsaam aav; hab lub nroog Nkaulaas huv Npasaas kws yog xeem Manaxes cheebtsaam aav.

⁹Cov nroog cawm sav nuav, yog cov Yixalayees xaiv rua puab hab cov tuabneeg txawv tebchaws kws nrug puab nyob. Yog leejtwg tua yuam kev raug ib tug tuabneeg tuag, nwg txhaj tau chaw moog nkaum huv cov nroog ntawd ib lub kuas dlim tug kws nrhav nwg tua; nwg txhaj tsi raug tua ua ntej luas txav txim rua nwg.