Read Hmong Njua Yausuas 21 Bible Online

Yausuas 21 - Hmong Njua bible

Yausuas 21

¹Xeem Levis cov thawjcoj moog cuag tug povthawj Ele-axas, Noos tug tub Yausuas, hab txhua xeem Yixalayees cov thawjcoj ntawm tej tsev tuabneeg,

²ntawm lub nroog Silaus huv tebchaws Kana-aas hab has tas, “Tug TSWV has rua Mauxes kuas muab ib cov nroog kws muaj tshaav zaub nyob ibncig rua peb tej tsaj noj rua peb nyob.”

³Yog le ntawd, cov thawjcoj txhaj faib tej nroog kws muaj tshaav zaub huv puab tej cheebtsaam rua xeem Levis lawv le tug TSWV tau has rua cov Yixalayees lawm.

⁴Xeem Levis kws yog cuab Kauhas yog thawj paab kws cov thawjcoj faib nroog rua. Tug povthawj Aloos cov xeebntxwv tej tsev tuabneeg tau kaum peb lub nroog huv xeem Yudas, xeem Xime-oos hab xeem Npeenyamees cheebtsaam aav.

⁵Dlua le lwm tsev tuabneeg ntawm cuab Kauhas, tau kaum lub nroog huv xeem Efalayees, xeem Daas hab xeem Manaxes Saab Nubpoob cheebtsaam aav.

⁶Cuab Nkesoos tau kaum peb lub nroog huv xeem Ixakhas, xeem Aseles, xeem Nathalis hab xeem Manaxes Saab Nubtuaj cheebtsaam aav.

⁷Cuab Melalis tej tsev tuabneeg tau kaum ob lub nroog huv xeem Lunpees, xeem Khas hab xeem Xenpuloos cheebtsaam aav.

⁸Cov Yixalayees rhu ntawv faib tej nroog kws muaj tshaav zaub rua xeem Levis lawv le tug TSWV tau has rua Mauxes lawm.

⁹Tej kws has lug nuav yog tej npe nroog huv xeem Yudas hab xeem Xime-oos cheebtsaam aav kws muab faib

¹⁰rua Aloos cov xeebntxwv kws yog cuab Kauhas hab yog Levis cov xeebntxwv. Puab yog thawj paab kws xub lug rhu ntawv.

¹¹Puab rhu tau lub nroog Alanpas, (Alanpas yog Anas txiv) kws nwgnuav yog lub nroog Henploos huv xeem Yudas cheebtsaam aav ua laaj roob kws muaj tshaav zaub nyob ibncig.

¹²Tabsis tej teb hab tej zog kws nyob ibncig lub nroog ntawd tub xub muab rua Yefunes tug tub Kalej ua nwg tug lawm.

¹³Cov nroog kws muab ntxiv rua lub nroog Henploos, (yog ib lub nroog cawm sav) kws muab faib rua tug povthawj Aloos cov xeebntxwv yog: Linas,

¹⁴Yatis, Etemuas

¹⁵Hauloos, Denpis,

¹⁶Ayees, Yutas hab Npexeles Semes kws muaj tej tshaav zaub: Taagnrho muaj cuaj lub nroog nyob huv xeem Yudas hab xeem Xime-oos cheebtsaam aav.

¹⁷Huv xeem Npeenyamees cheebtsaam aav yog muaj plaub lub nroog: Nkinpe-oos, Nkenpas,

¹⁸Anathaus, hab Alimoos kws muaj tshaav zaub.

¹⁹Taagnrho kaum peb lub nroog kws muab faib rua Aloos cov xeebntxwv kws ua povthawj puavleej muaj tshaav zaub.

²⁰Xeem Levis lwm tsev tuabneeg kws yog cuab Kauhas yog tau cov nroog huv xeem Efalayees cheebtsaam aav.

²¹Puab tau plaub lub nroog: Sekhees (yog ib lub nroog cawm sav) kws muaj tshaav zaub nyob huv xeem Efalayees cheebtsaam aav kws ua laaj roob, Nkexes,

²²Kixais hab Npethes Hauloos kws muaj tshaav zaub.

²³Huv xeem Daas cheebtsaam aav, puab tau plaub lub nroog: Etekes, Nkinpethoos,

²⁴Aiyaloos hab Nkalimoos kws muaj tshaav zaub.

²⁵Huv xeem Manaxes Saab Nubpoob cheebtsaam aav, puab tau ob lub nroog Tanas hab Nkalimoos kws muaj tshaav zaub.

²⁶Taagnrho kaum lub nroog kws muab rua cuab Kauhas tej tsev tuabneeg puavleej muaj tshaav zaub.

²⁷Xeem Levis kws yog cuab Nkesoos tau ob lub nroog huv xeem Manaxes Saab Nubtuaj cheebtsaam aav: Nkaulaas (yog ib lub nroog cawm sav) kws nyob huv Npasaas hab Npetelas kws muaj tshaav zaub.

²⁸Huv Xeem Ixakhas cheebtsaam aav, puab tau plaub lub nroog: Kisi-oos, Denpelas,

²⁹Yamus hab Enkanees kws muaj tshaav zaub.

³⁰Huv xeem Aseles cheebtsaam aav, puab tau plaub lub nroog Misales, Adoos,

³¹Hekas hab Lehaus kws muaj tshaav zaub.

³²Huv xeem Nathalis cheebtsaam aav, puab tau peb lub nroog: Kedes (yog ib lub nroog cawm sav) kws nyob huv Kalilais, Hamus, Daules hab Katas kws muaj tshaav zaub.

³³Taagnrho kaum peb lub nroog kws muab rua cuab Nkesoos tej tsev tuabneeg puavleej muaj tshaav zaub.

³⁴Xeem Levis lwm paab kws yog cuab Melalis, tau plaub lub nroog huv xeem Xenpuloos cheebtsaam aav: Yaunees, Kaletas,

³⁵Dinas hab Nahalas kws muaj tshaav zaub.

³⁶Huv xeem Lunpees cheebtsaam aav, puab tau plaub lub nroog: Npexeles, Yahas,

³⁷Kedemaus, hab Mefas kws muaj tshaav zaub.

³⁸Huv xeem Khas cheebtsaam aav, puab tau plaub lub nroog: Lamaus (yog ib lub nroog cawm sav) kws nyob huv Nkile-as, Mahana-ees,

³⁹Hesenpoos hab Yaxes kws muaj tshaav zaub.

⁴⁰Yog le ntawd, cov nroog kws muab rua cuab Melalis taagnrho muaj kaum ob lub nroog.

⁴¹Thoob plawg huv lub tebchaws kws cov Yixalayees nyob, puab muab plaub caug yim lub nroog kws muaj tshaav zaub nyob puagncig rua xeem Levis.

⁴³Thaus puab moog tua hab txeeb tau taagnrho lub tebchaws kws tug TSWV tau coglug tseg rua puab cov yawmkoob has tas yuav muab rua puab lawm. Puab txawm lug nyob huv lub tebchaws ntawd.

⁴⁴Tug TSWV pub puab tau nyob thaajyeeb quas lug huv lub tebchaws ntawd lawv le nwg tau coglug tseg rua puab cov yawmkoob lawm. Puab cov yeebncuab tsi muaj cuabkaav tuaj tawmtsaam puab le, rua qhov tug TSWV ca cov Yixalayees kovyeej puab tej yeebncuab.

⁴⁵Tug TSWV ua lawv le nwg tau coglug tseg rua cov Yixalayees lawm.