Read Hmong Njua Yausuas 22 Bible Online

Yausuas 22 - Hmong Njua bible

Yausuas 22

¹Yausuas hu taagnrho xeem Lunpees, xeem Khas hab xeem Manaxes Saab Nubtuaj lug cuag nwg.

²Yausuas has rua puab tas, “Mej tau ua txhua yaam kws tug TSWV tug tubkhai Mauxes has rua mej ua, hab mej tub ua lawv le kuv has lawm.

³Txij thaus pib lug txug nwgnuav, mej tsi tso mej cov kwvtij Yixalayees tseg le. Mej ua tuab zoo noog hab ua lawv le tug TSWV kws yog mej tug Vaajtswv tej lug saamfwm.

⁴Nwgnuav mej cov kwvtij Yixalayees tub nyob thaajyeeb quas lug lawv le tug TSWV kws yog mej tug Vaajtswv tau coglug tseg lawm. Mej ca le rov moog tsev, moog rua mej lub tebchaws ntawm tug Dlej Yauladees saab nubtuaj kws tug TSWV tug tubkhai Mauxes tub muab rua mej lawm.

⁵Mej yuavtsum ncu ntsoov ua lawv le tej kevcai kws Mauxes tub qha rua mej lawm has tas: hlub tug TSWV kws yog mej tug Vaajtswv, ua lawv le nwg sab nyam, noog nwg lug, muab sab npuab nwg, hab ua nwg teg num kuas kawg mej lub sab lub ntsws.”

⁶Yausuas foom koob moov rua puab, tso puab moog tsev hab has tas: “Mej rov moog tsev, thov Vaajtswv pub mej muaj txag npluanuj, muaj tsaj txhu coob, muaj nyaj muaj kub, muaj tooj muaj hlau hab muaj tsoog tsho naav. Muab tej kws mej moog txeeb tau ntawm yeebncuab lug faib rua mej tej kwvtij.” Ces puab txawm rov moog tsev lawm. Mauxes tub muab lub tebchaws ntawm tug Dlej Yauladees saab nubtuaj faib rua ib nraab xeem Manaxes lawm, tabsis Yausuas muab lub tebchaws ntawm tug Dlej Yauladees saab nubpoob faib rua ib nraab xeem Manaxes hab lwm xeem.

⁹Yog le ntawd, Xeem Lunpees, xeem Khas hab xeem Manaxes Saab Nubtuaj txhaj rov moog tsev. Puab tso puab cov kwvtij Yixalayees rua ntawm lub nroog Silaus huv tebchaws Kana-aas hab puab rov moog rua tebchaws Nkile-as kws puab txeeb tau lug lawv le tug TSWV tau has rua Mauxes kuas has rua puab lawm.

¹⁰Thaus xeem Lunpees, xeem Khas hab xeem Manaxes Saab Nubtuaj rov lug txug huv Nkelilaus kws nyob ntawm ntug dlej Yauladees saab nubpoob, puab teeb tau ib lub thaaj luj hab zoo heev rua ntawm ntug dlej.

¹¹Muaj tuabneeg moog qha rua cov kwvtij Yixalayees has tas, “Mej noog kuv has! Xeem Lunpees, xeem Khas hab xeem Manaxes Saab Nubtuaj teeb tau ib lub thaaj rua ntawm Nkelilaus kws nyob ntawm ntug Dlej Yauladees kws yog peb saab!”

¹²Thaus cov kwvtij Yixalayees nov zaaj nuav, puab txawm tuaj sis sau rua huv Silaus hab npaaj moog tua cov xeem kws nyob saab nubtuaj.

¹³Cov kwvtij Yixalayees txhaj tso tug povthawj Finehas kws yog Ele-axas tug tub moog cuag xeem Lunpees, xeem Khas hab xeem Manaxes Saab Nubtuaj kws nyob huv tebchaws Nkile-as.

¹⁴Muaj kaum leej thawjcoj, ib xeem ib leeg ntawm cov xeem kws nyob saab nubpoob nrug Finehas moog, puab puavleej yog cov thawj ntawm tej tsev tuabneeg hab tej cuab.

¹⁵Puab moog cuag xeem Lunpees, xeem Khas hab xeem Manaxes Saab Nubtuaj huv tebchaws Nkile-as,

¹⁶hab has rua tug TSWV tsaav tuabneeg has tas, “Vim le caag mej ua tej kev phem nuav tawmtsaam cov Yixalayees tug Vaajtswv? Qhov kws mej teeb lub thaaj nuav rua mej, yog mej ntxeev sab rua tug TSWV! Tsi yog mej ua lug pehawm nwg!

¹⁷Mej puas tseem ncu tau tej kev txhum kws peb ua nyob ntawm Pe-us kws tug TSWV tso sub tawg sub ntshaa rau txim rua peb? Naj nub nua peb raug txomnyem tub yog vim tej ntawd ntaag. Peb ua txhum luj le ntawd tseem tsi tau txaus hab los?

¹⁸Mej yuav tso tug TSWV tseg los? Yog nub nua mej ntxeev sab rua tug TSWV, pigkig nwg yuav chim rua peb cov Yixalayees txhua tug.

¹⁹Yog mej lub tebchaws nuav tsi huv, mej ca le tuaj rua tim tug TSWV lub tebchaws kws teeb tug TSWV lub Tsevntaub. Tuaj thov peb muab aav rua mej. Tabsis mej tsi xob ntxeev sab rua tug TSWV lossis ntxeev sab rua peb hab moog teeb dlua lwm lub thaaj ntxiv rua tug TSWV kws yog peb tug Vaajtswv lub.

²⁰Mej ncu ntsoov has tas, Zelas tug tub Akhaas tsi ua lawv le tug TSWV tej lug, nwg tsi muab tej khoom hlawv kuas taag huv tuabsi; cov Yixalayees txhaj raug txim vim tej ntawd.” Muaj ntau leej tuag nrug Akhaas vim nwg tej kev txhum.

²¹Xeem Lunpees, xeem Khas hab xeem Manaxes Saab Nubtuaj teb rua cov thawjcoj ntawm tej tsev tuabneeg ntawm cov xeem kws nyob saab nubpoob has tas,

²²“Tug muaj fwjchim luj yog Vaajtswv! Nwg yog tug TSWV! Tug muaj fwjchim luj yog Vaajtswv! Nwg yog tug TSWV! Nwg paub tej kws peb ua nuav hab peb xaav kuas mej paub! Yog has tas peb ntxeev sab hab tsi muab sab npuab tug TSWV, thov tsi xob pub kuas peb muaj sa nyob!

²³Yog has tas peb tsi noog tug TSWV lug, peb teeb lub thaaj nuav hlawv peb tej khoom theej txhoj, tej nplej lossis tej khoom fij ua kev sis raug zoo, ces ca tug TSWV rau txim rua peb.

²⁴Tsi yog peb ntxeev sab! Qhov kws peb teeb lub thaaj nuav, yog peb ntshai nyob tsaam yaav tom ntej mej tej xeebntxwv yuav has rua peb cov xeebntxwv has tas, ‘Mej tau ua dlaabtsi rua tug TSWV kws yog cov Yixalayees tug Vaajtswv?

²⁵Tug TSWV muab tug Dlej Yauladees ua tug nrim quas nruab nraab ntawm peb hab mej, mej cov kws yog xeem Lunpees hab xeem Khas, tsi tau ua dlaabtsi rua tug TSWV le.’ Ces mej cov xeebntxwv yuav ua rua peb cov xeebntxwv tso txujkev pehawm tug TSWV tseg.

²⁶Peb teeb lub thaaj nuav, tsi yog teeb lug hlawv tsaj fij lossis hlawv khoom fij,

²⁷tabsis yog peb teeb lug ua lub cim qha rua peb hab rua mej hab rua peb tej xeebntxwv ntau tam tom qaab paub has tas, peb yeej pehawm tug TSWV, hlawv khoom theej txhoj hab fij khoom ua kev sis raug zoo taabmeeg tug TSWV lub Tsevntaub. Tej nuav yog peb ua tseg kuas mej tej xeebntxwv tsi xob has tas, ‘Mej tsi tau ua dlaabtsi rua tug TSWV le.’

²⁸Tej nuav yog tej kws peb txhawj txug. Yog muaj tseeb le peb xaav ntawd tag, peb tej xeebntxwv txhaj muaj lug has tas, ‘Mej sim saib! Peb cov yawmkoob muaj lub thaaj zoo ib yaam le tug TSWV lub hab. Tsi yog peb teeb lug hlawv tsaj lossis hlawv khoom fij, tabsis yog teeb lug ua lub cim tseg rua mej hab peb xwb.’

²⁹Tsi yog peb ntxeev sab lossis tso tug TSWV tseg, peb yuav ca le teeb dlua ib lub thaaj hlawv tsaj, hlawv nplej lossis lwm yaam khoom fij. Peb yeej tsi teeb dlua lwm lub thaaj kuas zoo le tug TSWV kws yog peb tug Vaajtswv lub kws nyob ntawm tug TSWV lub Tsevntaub hauv ntej.”

³⁰Tug povthawj Finehas hab kaum leej thawjcoj kws sawv cev tsoom pejxeem kws yog cov thawj ntawm tej tsev tuabneeg ntawm cov xeem nyob saab nubpoob kws nrug Finehas moog ntawd nov tej lug kws xeem Lunpees, xeem Khas hab xeem Manaxes Saab Nubtuaj has, puab txhaj txaus sab.

³¹Tug povthawj Finehas kws yog Ele-axas tug tub has rua puab peb xeem ntawd has tas, “Nwgnuav peb paub has tas, tug TSWV nrug peb nyob. Tsi yog mej ntxeev sab rua tug TSWV, tabsis yog mej ua kuas cov Yixalayees dlim tug TSWV txujkev rau txim xwb.”

³²Finehas hab cov thawjcoj kws nrug nwg moog tso xeem Lunpees, xeem Khas hab xeem Manaxes Saab Nubtuaj rua huv tebchaws Nkile-as hab rov lug cuag cov Yixalayees rua huv tebchaws Kana-aas, hab pav txhua yaam rua puab.

³³Cov kwvtij Yixalayees txaus sab hab ua Vaajtswv tsaug. Puab tsi has txug qhov kws yuav tua hab rhuav lub tebchaws kws xeem Lunpees, hab xeem Khas nyob lawm.

³⁴Xeem Lunpees hab xeem Khas has tas, “Lub thaaj nuav ua timkhawv rua peb suavdlawg has tas tug TSWV yog Vaajtswv!” Yog le ntawd, puab txhaj tis npe rua lub thaaj ntawd hu ua “Timkhawv.”