Read Hmong Njua Yausuas 23 Bible Online

Yausuas 23 - Hmong Njua bible

Yausuas 23

¹Tau ib ntus ntev loo lug rua tom qaab nuav, tug TSWV pub cov Yixalayees nyob tso sab lug tsi ntshai puab tej yeebncuab kws nyob ibncig puab. Thaus ntawd Yausuas laug heev lawm,

²nwg txhaj hu taagnrho cov Yixalayees, cov txwjlaug, cov thawjcoj, cov txav txim, hab cov numtswv tuaj cuag nwg, nwg has rua puab tas, “Nwgnuav kuv laug heev lawm.

³Mej tub pum txhua yaam kws tug TSWV kws yog mej tug Vaajtswv ua rua txhua tsaav tuabneeg lawm. Nwg ua le ntawd yog nwg ua paab mej. Tug TSWV kws yog mej tug Vaajtswv tuaj mej tog paab mej tua hab txeeb tau lub tebchaws.

⁴Kuv tub muab txhua tsaav tuabneeg kws nyob huv lub tebchaws nuav tej aav, tsi has tej kws peb txeeb tau lawm lossis tej kws peb tseem tsi tau moog txeeb faib rua mej txhua xeem lawm. Tej aav nuav yog txij ndlua ntawm tug Dlej Yauladees kws nyob saab nubtuaj moog ti nkaus rua ntawm Havtxwv Meditelanees kws nyob saab nubpoob.

⁵Tug TSWV kws yog mej tug Vaajtswv yuav ntab puab tawm ua ntej mej lug rua huv lub tebchaws nuav hab nwg yuav ntab kuas puab tsiv taabmeeg mej. Mej yuav tau puab lub tebchaws lawv le tug TSWV kws yog mej tug Vaajtswv tau coglug tseg rua mej lawm.

⁶Yog le ntawd, mej yuavtsum noog lug hab ua lawv le txhua yaam kws Mauxes sau rua huv phoo Ntawv Kevcai lawm, mej tsi xob muab ib nqais tso tseg le,

⁷mej txhaj tsi moog nrug lwm tsaav tuabneeg kws nrug mej nyob koom ua ib nqaag, tsi xob pe lossis teev puab tej vaajtswv hab tuav puab tej vaajtswv npe coglug.

⁸Mej yuavtsum muab sab npuab tug TSWV ib yaam le mej ibtxwm muab sab npuab lug txug rua naj nub nua.

⁹Thaus mej lug nyob huv lub tebchaws nuav, tug TSWV muab lwm tsaav tuabneeg kws muaj zug hab muaj fwjchim ntab tawm taabmeeg mej, tsi muaj leejtwg muaj cuabkaav tiv mej le.

¹⁰Mej cov tuabneeg, ib leeg yeej muaj peevxwm ua tau kuas ib txheeb leej ntshai hab tsiv moog, rua qhov tug TSWV kws yog mej tug Vaajtswv paab mej tua puab, lawv le nwg tau coglug tseg rua mej lawm.

¹¹Mej yuavtsum hlub tug TSWV kws yog mej tug Vaajtswv.

¹²Yog mej tsi muab sab npuab tug TSWV, mej moog nrug lwm tsaav tuabneeg kws nrug mej nyob ua tshoob ua kug,

¹³kuas mej paub has tas tug TSWV yuav tsi ntab cov tuabneeg ntawd tawm moog, tabsis cov tuabneeg ntawd yuav ua teebmeem rua mej, ib yaam le lub vuj hlua lossis lub qhov kws cuab muv tog mej, hab ib yaam le tug nplawm kws nplawm mej nrausqaum lossis ib yaam le tug saus kws nyob huv mej qhovmuag. Mej yuav raug txomnyem le ntawd moog txug nub kws mej tsi tshuav ib tug seem nyob huv lub tebchaws kws tug TSWV kws yog mej tug Vaajtswv muab rua mej.

¹⁴“Nwgnuav kuv tsi muaj pistsawg xyoo nrug mej nyob lawm. Mej yeej paub has tas, tug TSWV kws yog mej tug Vaajtswv tub pub ib puas tsaav yaam zoo rua mej lawv le nwg tau coglug tseg rua mej tsi poob ib lus le.

¹⁵Tabsis mej yuavtsum ua lawv le nwg tej lug ib yaam le nwg ua lawv le nwg tej lug cog tseg rua mej hab.

¹⁶Yog mej tsi coj lawv le tug TSWV kws yog mej tug Vaajtswv tej lug kws cog tseg rua mej, mej moog pe lwm tsaav tuabneeg tej vaajtswv, nwg yuav chim hab rau txim rua mej, ces tsi ntev mej yuav tsi tshuav ib tug nyob huv lub tebchaws zoo kws nwg muab rua mej.”