Read Hmong Njua Yausuas 24 Bible Online

Yausuas 24 - Hmong Njua bible

Yausuas 24

¹Tom qaab ntawd Yausuas hu taagnrho cov Yixalayees txhua xeem tuaj txoos ua ke rua ntawm Sekhees. Nwg kuas cov txwjlaug, cov thawjcoj, cov txav txim hab cov Yixalayees cov numtswv tuaj nyob taabmeeg Vaajtswv.

²Yausuas has rua suavdlawg tas, “Tug TSWV kws yog cov Yixalayees tug Vaajtswv has le nuav: ‘Thaus u mej cov yawmkoob tseem nyob ntawm ntug Dlej Efalates saab tim, puab pe lwm tsaav tuabneeg tej vaajtswv. Cov yawmkoob ntawd ib tug yog Telas kws yog Anplahaas hab Nahaus txiv ntaag.

³Kuv coj mej yawmkoob Anplahaas tawm huv lub tebchaws ntawd hlaa tug Dlej Efalates hab coj nwg moog thoob plawg tebchaws Kana-aas. Kuv pub nwg muaj nwg tug tub Ixaj hab muaj xeebntxwv coob.

⁴Kuv pub Ixaj muaj Yakhauj hab Exaus. Kuv muab lub tebchaws Edoos kws ua laaj roob rua Exaus ua nwg tug, tabsis mej yawmkoob Yakhauj hab nwg cov mivnyuas tsiv moog nyob nraag tebchaws Iziv.

⁵Tom qaab ntawd kuv khaiv Mauxes hab Aloos moog hab kuv tso tej kev siv kev npug lug rua tebchaws Iziv, tabsis kuv coj mej tawm lug;

⁶thaus kuv coj mej cov yawmkoob tawm nraag tebchaws Iziv lug, cov Iziv caij neeg hab tsheb neeg, tso tubrog caum puab tua. Tabsis thaus mej cov yawmkoob lug txug ntawm Havtxwv Lab,

⁷puab quaj thov kuv paab, kuv txhaj tso fuab dlub lug quas hlo puab hab cov Iziv. Kuv ua kuas havtxwv nphau lug npug nkaus cov Iziv rua huv qaab thu. Mej paub has tas kuv tau ua le caag rua cov Iziv.’ “ ‘Mej nyob ntawm taj suabpuam tau ntev heev.

⁸Kuv maam coj mej lug rua huv cov Amaules lub tebchaws kws nyob ntawm tug Dlej Yauladees saab nubtuaj. Cov Amaules tua mej, tabsis kuv ca mej tua yeej puab. Kuv ca puab puamtsuaj taabmeeg mej hab ca mej txeeb tau puab lub tebchaws.

⁹Xipules tug tub Npalaj kws ua vaajntxwv kaav tebchaws Mau-am tuaj tua mej. Nwg khaiv tuabneeg moog has rua Npe-us tug tub Npala-aas, kuas tuaj foom tsi zoo rua mej.

¹⁰Tabsis kuv tsi noog Npala-aas tej lug, Npala-aas txhaj foom koob moov rua mej. Kuv ua le ntawd, yog kuv cawm mej dlim ntawm Npalaj teg.

¹¹Mej hlaa tug Dlej Yauladees moog rua huv lub nroog Yelikaus. Cov tuabneeg huv Yelikaus tawmtsaam mej ib yaam le cov Amaules, cov Pelixes, cov Kana-aas, cov Hitis, cov Nkikasis, cov Hivis hab cov Yenpus tua mej, tabsis kuv ca mej tua yeej puab.

¹²Thaus mej taabtom lug txeem puab lub tebchaws, kuv ua rua puab ntshai heev, mej txhaj lawv tau cov Amaules ob tug vaajntxwv tawm. Mej tsi tau muab mej tej neevnti hab ntaaj tua le.

¹³Kuv muab lub tebchaws kws mej tsi tau khwv hab tej nroog kws mej txhais teg tsi tau ua pub rua mej nyob. Nwgnuav mej lug nyob huv tej nroog nuav, mej tau noj tej txiv maab hab tej txiv ntoo roj kws tsi yog mej cog.’ ”

¹⁴Yausuas has ntxiv tas, “Txij nuav moog, mej yuavtsum fwm tug TSWV, muab sab npuab nwg hab muaj lub sab dlawb paug pehawm nwg. Tsi xob pe tej vaajtswv kws mej cov yawmkoob pe tim tebchaws Mexuputamias hab nraag tebchaws Iziv, mej pehawm tug TSWV tuab leeg xwb.

¹⁵Yog mej tsi txaus sab pehawm tug TSWV, nub nua mej ca le txav txim sab saib mej yuav pehawm tug twg, mej yuav pe tej vaajtswv kws mej cov yawmkoob pe tim tebchaws Mexuputamias lossis pe tej vaajtswv kws cov Amaules pe huv lub tebchaws kws mej nyob nuav. Txawm yog mej yuav pe tug twg los xij, kuv hab kuv tsev tuabneeg, peb yuav pehawm tug TSWV tuab leeg xwb.”

¹⁶Cov tuabneeg teb has tas, “Peb yuav tsi tso tug TSWV tseg hab moog pe lwm tsaav tuabneeg tej vaajtswv!

¹⁷Tug TSWV kws yog peb tug Vaajtswv tau coj peb cov yawmkoob hab peb tawm ntawm kev ua luas qhev nraag tebchaws Iziv lug, hab peb tub pum tej txujci tseemceeb kws nwg ua lawm. Tug TSWV tsomkwm hab nrug nraim peb huv tej tebchaws kws peb lug dlhau lawd txhua qhov.

¹⁸Tug TSWV ntab cov Amaules kws nyob huv lub tebchaws nuav tawm moog ua ntej peb lug nyob. Yog le ntawd, peb yuav pehawm tug TSWV kws yog peb tug Vaajtswv xwb.”

¹⁹Yausuas has rua puab tas, “Ntshai mej yuav ua tsi tau tug TSWV teg num, rua qhov nwg yog Vaajtswv tug dlawbhuv. Nwg khib mej heev. Nwg yuav tsi zaam txim le.

²⁰Yog mej tso tug TSWV tseg moog pe lwm tsaav tuabneeg tej vaajtswv, nwg yuav tawmtsaam hab rau txim rua mej. Txawm yog yaav taag lug nwg tau ua zoo rua mej lawm los nwg yuav ua kuas mej puamtsuaj moog.”

²¹Cov tuabneeg has rua Yausuas has tas, “Peb yuav tsi ua le ntawd! Peb yuav pehawm tug TSWV xwb.”

²²Yausuas has rua puab tas, “Mej ncu mej tej lug tseg, mej yeej leeg has tas, mej yuav pehawm tug TSWV xwb.” Puab teb has tas, “Peb yuav ua le ntawd.”

²³Yausuas has rua puab tas, “Mej yuavtsum tso lwm tsaav tuabneeg tej vaajtswv tseg, muab sab npuab tug TSWV kws yog cov Yixalayees tug Vaajtswv.”

²⁴Puab has rua Yausuas has tas, “Peb yuav pehawm tug TSWV kws yog peb tug Vaajtswv hab noog nwg tej lug.”

²⁵Nub ntawd Yausuas txhaj kuas puab coglug, Yausuas muab tej kevcai hab tej lug saamfwm lug qha rua puab ntawm Sekhees, kuas puab coj lawv le ntawd.

²⁶Yausuas sau tej lug saamfwm ntawd rua huv phoo ntawv kws teev Vaajtswv txuj Kevcai. Yausuas muab ib lub pobzeb luj lug teeb rua huv qaab tsob ntoo qheb kws ze tug TSWV lub tsevntaub.

²⁷Yausuas has rua puab tas, “Lub pobzeb nuav yuav ua timkhawv rua peb. Lub pobzeb nuav nov txhua lu lug kws tug TSWV has rua peb, nwg yuav ua timkhawv tawmtsaam mej, kuas mej tsi xob ntxeev sab rua mej tug Vaajtswv.”

²⁸Yausuas txawm kuas puab rov qaab moog tsev, hab puab nyag rov moog rua nyag lub tebchaws lawm.

²⁹Tom qaab ntawd, Noos tug tub Yausuas kws yog tug TSWV tug tubkhai tuag thaus nwg noobnyoog muaj ib puas kaum xyoo.

³⁰Puab muab nwg log rua huv nwg thaaj aav ntawm lub nroog Tinas Xelas kws ua laaj roob huv tebchaws Efalayees kws nyob ntawm lub Roob Nkasas saab qaumteb.

³¹Tam kws Yausuas tseem ua neej nyob hab tom qaab kws nwg tuag lawm lossis ntu kws cov thawjcoj tam ntawd tseem ua neej nyob, cov Yixalayees pehawm tug TSWV xwb, hab puab pum txhua yaam kws tug TSWV tau ua paab cov Yixalayees.

³²Yauxej lub cev kws cov Yixalayees coj nraag tebchaws Iziv lug, puab muab log rua ntawm Sekhees, huv thaaj aav kws Yakhauj muab ib puas dlaim nyaj yuav ntawm Hamaules kws yog Sekhees txiv lug. Thaaj aav ntawd yog Yauxej cov xeebntxwv tug.

³³Aloos tug tub Ele-axas tuag hab puab muab nwg log rua ntawm lub nroog Nkinpe-as kws muab tu rua nwg tug tub Finehas huv tebchaws Efalayees kws ua laaj roob.