Read Hmong Njua Yausuas 3 Bible Online

Yausuas 3 - Hmong Njua bible

Yausuas 3

¹Nub tom qaab thaus sawv ntxuv Yausuas hab cov Yixalayees txawm tawm huv puab lub yeej ntawm taj ntoo Akaxias moog rua nraag ntug dlej Yauladees. Puab tsuam yeej rua ntawd npaaj yuav hlaa dlej.

²Tom qaab ntawd peb nub, cov thawjcoj ncig moog thoob plawg huv lub yeej,

³hab has rua cov pejxeem has tas, “Thaus mej pum cov povthawj kwv lub Phijxaab kws ntim tug TSWV kws yog mej tug Vaajtswv txujlug cog tseg, mej ca le thaj cuab lawv puab qaab,

⁴mej txhaj paub kev moog, rua qhov mej tsi tau moog dlua txujkev ntawd ib zag le. Tabsis mej tsi xob moog ze lub Phijxaab, mej yuavtsum moog kuas nrug dleb kwvyees le ob txheeb tshim.”

⁵Yausuas has rua cov tuabneeg has tas, “Mej ca le tu mej lub sab, rua qhov pigkig tug TSWV yuav ua tej txujci tseemceeb rua mej pum.”

⁶Tom qaab ntawd Yausuas has kuas cov povthawj kwv lub Phijxaab kws ntim Vaajtswv tej lug cog tseg moog ua suavdlawg ntej hab puab ua lawv le nwg has.

⁷Tug TSWV has rua Yausuas has tas, “Tej txujci kws nub nua kuv ua yuav ua rua cov Yixalayees fwm has tas koj yog ib tug tuabneeg tseemceeb, hab puab yuav paub has tas, kuv nrug nraim koj ib yaam le kuv nrug Mauxes.

⁸Koj ca le has rua cov povthawj kws kwv lub Phijxaab has tas, thaus puab moog txug nraag ntug dlej Yauladees lawm, puab yuavtsum moog nreg huv dlej tog.”

⁹Yausuas has rua cov tuabneeg has tas, “Mej ca le txaav lug ze ntawm nuav hab noog tej lug kws tug TSWV kws yog mej tug Vaajtswv has rua mej.

¹⁰Thaus mej taabtom moog rua huv lub tebchaws ntawd, tug TSWV yuav ntab cov Kana-aas, cov Hitis, cov Hivis, cov Pelixes, cov Nkinkasis, cov Amaules hab cov Yenpus tawm ntawm mej hauv ntej moog. Mej txhaj yuav paub has tas tug Vaajtswv kws muaj sa nyob nrug nraim mej,

¹¹thaus puab kwv tug TSWV kws kaav lub nplajteb nuav lub Phijxaab hlaa tug dlej Yauladees ua mej ntej.

¹²Nwgnuav mej ca le xaiv cov Yixalayees kaum ob leeg txivneej ib xeem ib tug tuaj.

¹³Thaus cov povthawj kwv tug TSWV kws kaav lub nplajteb nuav lub Phijxaab nqeg kag rua huv dlej lawm, tug dlej Yauladees yuav faib hlo ua kev rua puab moog.”

¹⁴Thaus ntawd yog lub caij sau qoobloo, dlej taabtom fuam luj heev. Cov tuabneeg tawm huv lub yeej moog hlaa tug Dlej Yauladees; cov povthawj kwv lub Phijxaab moog ua suavdlawg ntej, thaus kws cov povthawj nqeg kag rua huv tug dlej,

¹⁶dlej txawm teev tsi ndlwg. Tug dlej ntawd yaav hauv dlej puv moog txug peg lub nroog Adaas kws nyob ntawm Xalethaas ib saab hab tug dlej ntawd yaav qaab dleg nqhuab moog ti nkaus nraag Havtxwv Tuag. Cov tuabneeg txhaj hlaa tau moog rua tim lub nroog Yelikaus.

¹⁷Cov povthawj kwv tug TSWV lub Phijxaab moog sawv huv plawv tug dlej Yauladees kws nqhuab lawm tog txug thaus cov tuabneeg moog dlhau rua saab tid taag huv tuabsi lawm.