Read Hmong Njua Yausuas 4 Bible Online

Yausuas 4 - Hmong Njua bible

Yausuas 4

¹Thaus cov tuabneeg moog dlhau tug Dlej Yauladees rua saab tim u lawm, tug TSWV has rua Yausuas has tas,

²“Koj ca le xaiv cov Yixalayees kaum ob leeg, ib xeem ib leeg,

³hab kuas puab ib leeg khaws ib lub pobzeb huv plawv Dlej Yauladees ntawm thaaj chaw kws cov povthawj sawv lug tso rua ntawm thaaj chaw kws mo nuav mej yuav moog tsuam chaw su.”

⁴Yausuas hu kaum ob leeg kws nwg tub xaiv tau lawm ntawd lug cuag nwg,

⁵hab nwg has rua puab tas, “Mej ca le moog rua huv tug Dlej Yauladees, ntawm tug TSWV kws yog mej tug Vaajtswv lub Phijxaab hauv ntej. Mej ib leeg khaws ib lub pobzeb kwv sau xubpwg lug rua cov Yixalayees ib xeem ib lub.

⁶Cov pobzeb ntawd yuav ua lub cim rua cov tuabneeg ncu txug tej xwm kws tug TSWV tau ua lug lawm. Yaav tom ntej yog mej cov mivnyuas nug mej has tas, ‘Pawg pobzeb nuav pev txug dlaabtsi?’

⁷Ces mej yuavtsum qha rua puab has tas, thaus u cov povthawj kwv tug TSWV lub Phijxaab lug hlaa tug dlej Yauladees, tug dlej txawm teev tsi ndlwg. Cov pobzeb nuav yuav ua cim rua cov Yixalayees ncu ntsoov txug tej xwm kws muaj rua ntawm thaaj chaw nuav moog taag puab simneej.”

⁸Puab txawm moog ua lawv le Yausuas has rua puab, puab kwv kaum ob lub pobzeb huv plawv Dlej Yauladees lug, ib lub rua ib xeem, coj lug tso rua ntawm qhov chaw kws puab tsuam yeej lawv le tug TSWV has rua Yausuas lawm.

⁹Yausuas muab dlua kaum ob lub pobzeb teeb rua huv plawv Dlej Yauladees ntawm qhov chaw kws cov povthawj kwv lub Phijxaab lug sawv. (Naj nub nua cov pobzeb ntawd tseem nyob huv plawv dlej.)

¹⁰Cov povthawj sawv huv plawv tug dlej Yauladees moog txug thaus puab ua txhua yaam tav taag lawv le tug TSWV kuas Yausuas has rua suavdlawg lawm. Tej nuav muaj lawv le Mauxes has tseg. Cov tuabneeg moog ceev nrooj taag rua saab ntug dlej tim u.

¹¹Thaus suavdlawg moog dlhau rua saab tim u lawm, cov povthawj kws kwv tug TSWV lub Phijxaab maam lug moog ua suavdlawg ntej.

¹²Cov txivneej kws yog xeem Lunpees, xeem Khas hab ib nraab xeem Manaxes nqaa puab tej cuabyeej ua rog hlaa moog ua suavdlawg ntej lawv le Mauxes tub has tseg rua puab lawm.

¹³Suav taagnrho cov tubrog ntawd muaj kwvyees le plaub caug txheeb leej kws npaaj rawv moog ua rog, tug TSWV saib ntsoov puab hlaa dlej moog rua huv lub taj kws nyob ze lub nroog Yelikaus.

¹⁴Qhov kws nub ntawd tug TSWV ua, ua rua cov Yixalayees suavdlawg fwm has tas, Yausuas yog ib tug tuabneeg kws tseemceeb. Puab fwm Yausuas moog taag nwg simneej ib yaam le puab fwm Mauxes.

¹⁵Tug TSWV has rua Yausuas has tas,

¹⁶“Koj has kuas cov povthawj kws kwv lub Phijxaab ca le tawm huv tug dlej Yauladees lug.”

¹⁷Yausuas ua lawv le ntawd,

¹⁸thaus cov povthawj lug txug tim ntug dlej lawm, dlej txawm nphau nphwv lug puv nkaus kwj ib yaam le qub.

¹⁹Nub kws puab hlaa tug dlej Yauladees, yog lub ib hlis ntuj nub xab kaug hab puab lug tsuam yeej rua ntawm Nkilenkas kws nyob ntawm lub nroog Yelikaus saab nubtuaj.

²⁰Yausuas muab kaum ob lub pobzeb kws puab khaws huv tug Dlej Yauladees lug teeb ua ib pawg rua ntawm thaaj chaw kws puab su ntawd.

²¹Yausuas has rua cov Yixalayees has tas, “Yaav tom ntej yog mej tej mivnyuas nug mej has tas, ‘Pawg pobzeb nuav yog pev txug dlaabtsi?’

²²Mej yuavtsum qha rua mej cov mivnyuas kuas paub txug lub sijhawm kws cov Yixalayees taug kev qhuav qhawv huv tug dlej Yauladees lug,

²³rua qhov tug TSWV kws yog mej tug Vaajtswv ua rua tug dlej Yauladees qhuav ua kev rua mej moog ib yaam le thaus u nwg tau ua rua Havtxwv Lab faib hlo ua kev qhuav qhawv rua peb lug.

²⁴Vim muaj tej xwm nuav, tej tuabneeg kws nyob thoob nplajteb txhaj paub has tas, tug TSWV yog tug kws muaj fwjchim luj kawg nkaus, hab mej yuavtsum fwm tug TSWV kws yog mej tug Vaajtswv moog ibtxhis le.”