Read Hmong Njua Yausuas 6 Bible Online

Yausuas 6 - Hmong Njua bible

Yausuas 6

¹Vim cov Yixalayees moog ze lub nroog Yelikaus, cov tuabneeg huv lub nroog txhaj kaw tej roojvaag tsi pub leejtwg tawm lossis moog tau rua huv lub nroog le.

²Tug TSWV has rua Yausuas has tas, “Kuv yuav muab lub nroog Yelikaus, tug vaajntxwv kws kaav lub nroog, hab tej tubrog kws sab tawv cob rua koj teg.

³Koj hab koj cov tubrog ca le ncig lub nroog nuav rau nub, ib nub ncig ib lwm.

⁴Koj kuas xyaa leej povthawj ib leeg nqaa ib lub xyu moog ua cov povthawj kws kwv lub Phijxaab ntej. Nub xyaa koj hab koj cov tubrog moog ncig lub nroog xyaa lwm, hab kuas cov Povthawj tshuab raaj tshuab xyu moog ua ntej,

⁵hab koj has kuas puab tshuab raaj tshuab xyu ib zaaj ua lub suab nrov ntev loo. Thaus mej nov lub suab xyu ntawd, mej suavdlawg ca le qw nrov nrov, ces tej ntsaa yeej yuav pob zuav pis zog. Thaus ntawd mej suavdlawg ca le moog kag rua huv lub nroog.”

⁶Yausuas txhaj hu cov povthawj lug cuag nwg. Nwg has rua puab tas, “Mej ca le kwv lub Phijxaab moog hab kuas xyaa leej povthawj kws nqaa xyu moog ua ntej.”

⁷Yausuas has rua cov tubrog has tas, “Peb ca le moog ncig lub nroog, ca ib paab tubrog moog ua tug TSWV lub Phijxaab ntej.”

⁸Thaus Yausuas has le ntawd taag, ib paab tubrog txawm moog ua cov povthawj kws tshuab raaj tshuab xyu ntej, paab kws moog ua cov tshuab xyu qaab yog cov povthawj kws kwv lub Phijxaab, hab ib paab tubrog lawv cov povthawj ntawd qaab. Lub sijhawm ntawd suab raaj suab xyu nrov tsi tu le.

¹⁰Yausuas has rua nwg cov tuabneeg kuas tsi xob qw hab tsi xob has lug moog txug thaus Yausuas kuas puab has, puab maam le has hab qw.

¹¹Yausuas has kuas cov povthawj kws kwv tug TSWV lub Phijxaab moog ncig lub nroog ib lwm, rov lug su huv yeej ib mos.

¹²Nub tom qaab Yausuas sawv ntxuv lug txhib cov povthawj hab cov tubrog rov moog ncig lub nroog Yelikaus ib yaam le thawj nub. Ib paab tubrog moog ua xyaa tug povthawj kws tshuab xyaa lub xyu ntej, cov povthawj kws kwv tug TSWV lub Phijxaab ua cov tshuab xyu qaab, hab ib paab tubrog lawv cov povthawj ntawd qaab. Lub sijhawm ntawd suab raaj suab xyu nrov tsi tu le.

¹⁴Nub ob los puab rov moog ncig lub nroog ib lwm, puab maam le rov lug rua huv lub yeej. Puab ua le ntawd tau rau nub.

¹⁵Nub xyaa puab sawv ntxuv moog ncig lub nroog ib yaam le txhua nub, tuab nub ntawd puab ncig xyaa lwm.

¹⁶Thaus puab ncig lwm xyaa taag, cov povthawj txawm tshuab raaj tshuab xyu, hab Yausuas has kuas nwg cov tubrog ca le qw nrov nrov, hab nwg has tas, “Tug TSWV tub muab lub nroog nuav rua mej lawm!

¹⁷Mej yuavtsum ua kuas txhua yaam kws nyob huv lub nroog nuav puamtsuaj taag, txhaj suav tau has tas, yog muab tej ntawd fij rua tug TSWV. Mej tsuas tseg tug namndlav kws hu ua Lahaj hab nwg tsev tuabneeg xwb, rua qhov nwg tau zais peb ob tug tuabneeg soj tebchaws.

¹⁸Mej tsi xob yuav ib yaam dlaabtsi kws tug TSWV has kuas muab rhuav kuas puamtsuaj huv tuabsi; yog mej muab tej ntawd lug yuav, mej yuav ua rua cov Yixalayees raug kev txomnyem hab lub yeej yuav puamtsuaj.

¹⁹Tej cuabyeej kws yog muab nyaj, muab kub, muab tooj lossis muab hlau ua, yog tej kws tshwj tseg rua tug TSWV. Mej yuavtsum coj tej ntawd lug tso rua huv tug TSWV lub txhaab.”

²⁰Cov povthawj tshuab raaj tshuab xyu. Thaus cov tubrog nov tej suab xyu, puab txawm qw nrov nrov, ces lub nroog Yelikaus tej ntsaa yeej txawm pob zuav pis zog taag. Cov tubrog txawm nce pis hlo moog rua huv lub nroog hab txeeb kag taamsim ntawd.

²¹Puab muab ntaaj tua txhua tug tuabneeg huv lub nroog, tsi has quaspuj, quasyawg, tug hlub tug yau hab tua tej nyuj tej yaaj, tej neeg luav tuag taag huv tuabsi.

²²Yausuas has rua ob tug kws moog soj tebchaws has tas, “Meb ca le moog rua huv Lahaj kws yog tug namndlav lub tsev, coj nwg hab nwg tsev tuabneeg txhua tug tawm lug, lawv le meb tau coglug rua nwg lawm.”

²³Yog le ntawd obtug txhaj moog coj Lahaj, nwg nam nwg txiv, nwg cov kwvtij hab cov tubqhe kws nyob huv nwg tsev tawm lug hab coj puab lug nyob ze cov Yixalayees lub yeej.

²⁴Ces cov Yixalayees txawm hlawv lub nroog hab txhua yaam kws nyob huv kub nyab taag, tsuas tseg tej cuabyeej kws yog muab nyaj, muab kub, muab tooj lossis muab hlau ua kws puab yuav coj lug tso rua huv tug TSWV lub txhaab xwb.

²⁵Vim tug namndlav Lahaj tau zais ob tug kws Yausuas tso moog soj lub nroog Yelikaus, Yausuas txhaj tsi tua nwg, nwg nam nwg txiv hab nwg cov kwvtij. (Lahaj cov xeebntxwv tseem nyob huv tebchaws Yixalayees lug txug naj nub nua).

²⁶Thaus ntawd Yausuas coglug saamfwm has tas, “Yog leejtwg tseem rov txhim khu lub nroog Yelikaus nuav dlua, tug ntawd yuav raug tug TSWV foom tsi zoo. Yog leejtwg khu lub nroog nuav, nwg tug tub hlub yuav tuag. Yog leejtwg khu tej roojvaag, nwg tug tub ntxawg yuav tuag.”

²⁷Tug TSWV nrug nraim Yausuas, ua rua nwg lub koob lub npe nrov nchaa moo lug moog thoob lub tebchaws.