Read Hmong Njua Yausuas 8 Bible Online

Yausuas 8 - Hmong Njua bible

Yausuas 8

¹Tug TSWV has rua Yausuas has tas, “Ca le coj taagnrho koj cov tubrog moog tua lub nroog A-is; tsi xob ntshai lossis qaug zug. Kuv yuav paab kuas koj moog tua yeej tug vaajntxwv kws kaav lub nroog ntawd, kuv tub muab nwg lub tebchaws, lub nroog hab nwg cov tuabneeg cob rua koj teg lawm.

²Koj ca le moog tua lub nroog A-is hab nwg tug vaajntxwv lawv le koj ua rua lub nroog Yelikaus hab tug vaajntxwv, tabsis zag nuav koj tseg tej khoom tseemceeb, hab tej tsaj kws mej txeeb tau lug ua koj tug. Mej ca le txhij tubrog hab nyaag tuabywv moog tuaj tom puab qaab tua lub nroog.”

³Yog le ntawd Yausuas txhaj txhij tubrog moog tua lub nroog A-is. Nwg xaiv nwg cov tubrog tau peb caug txheeb leej kws khov kho hab kuas puab moog thaus ib taag mo.

⁴Yausuas has rua puab tas, “Mej moog nkaum ze rua ntawm ntug nroog npaaj rawv tog sis tua.

⁵Kuv hab cov tubrog kws nrug kuv, peb yuav txeem moog rua huv lub nroog ua ntej. Thaus cov tubrog huv lub nroog A-is tawm tuaj tua peb, peb yuav ua txuj thim tsiv rov qaab ib yaam le peb ua thawj zag.

⁶Puab yeej yuav caum peb tua tuaj dlhau ntug nroog. Puab yuav xaav has tas, peb swb puab ib yaam le thawj zag.

⁷Thaus ntawd mej ca le tawm huv mej tej chaw nkaum moog txeeb kag lub nroog. Tug TSWV kws yog mej tug Vaajtswv tub muab lub nroog ntawd rua mej lawm.

⁸Thaus mej txeeb tau lub nroog lawm, mej ca le tis suavtawg hlawv lub nroog lawv le tug TSWV tau has lawm. Tej nuav yog lug saamfwm rua mej.”

⁹Yausuas kuas puab moog nrhav chaw nkaum ntawm lub nroog A-is saab nubpoob nruab nraab ntawm lub nroog A-is hab Npethees zuv tog. Mo ntawd Yausuas tseem nyob huv lub yeej.

¹⁰Taagkig sawv ntxuv Yausuas hu nwg cov tubrog tuaj ua ke. Ces Yausuas hab cov Yixalayees cov thawjcoj txawm coj cov tubrog moog rua peg lub nroog A-is.

¹¹Yausuas hab cov tubrog kws nrug nwg txawm moog rua ntawm ncauj ke kws moog rua huv lub nroog, hab puab tsuam yeej rua ntawm ntug nroog saab qaumteb kws muaj ib lub vuaghaav quas puab hab lub nroog A-is.

¹²Yausuas coj kwvyees le tsib txheeb leej tubrog nrug nwg moog nkaum ntawm lub nroog A-is saab nubpoob, nruab nraab ntawm lub nroog A-is hab Npethees.

¹³Cov tubrog kws yuav xub moog tua, puab tsuam yeej rua ntawm lub nroog saab qaumteb, hab dlua le lwm cov, puab moog zuv kev rua saab nubpoob. Mo ntawd Yausuas nyob ib mos huv lub vuaghaav.

¹⁴Thaus tug vaajntxwv kws kaav lub nroog A-is pum Yausuas cov tubrog, nwg txawm txhij nwg cov tubrog ceev nrooj tuaj. Nwg hab nwg cov tubrog taug lub haav Yauladees tuaj tua cov Yixalayees ntawm qhov chaw kws puab sis tua thawj zag. Tabsis vaajntxwv tsi paub has tas, cov tubrog Yixalayees yuav puav tom qaab tuaj.

¹⁵Yausuas hab cov tubrog kws nrug nwg ua txuj swb hab tsiv moog rua tom taj suabpuam.

¹⁶Luas hu taagnrho cov txivneej huv nroog tuaj caum Yausuas puab tua, hab thaus puab caum Yausuas cov tubrog moog dleb nroog lawm.

¹⁷Cov txivneej huv lub nroog A-is txhua tug moog caum cov Yixalayees tua tsi tseg ib tug ca zuv lub nroog le, hab tseg lub roojvaag qheb lug ca.

¹⁸Ces tug TSWV has rua Yausuas has tas. “Ca le tsaa koj raab muv rua lub nroog A-is; kuv tub muab lub nroog ntawd cob rua koj teg lawm.” Yausuas txawm ua lawv le tug TSWV has,

¹⁹hab thaus cov tubrog kws nkaum ntawm ntug nroog pum Yausuas tsaa nwg raab muv, puab txawm sawv dlha moog rua huv lub nroog hab txeeb kag tau lub nroog. Puab txawm tis suavtawg hlawv taamsim ntawd.

²⁰Thaus cov tubrog A-is tig saib tom qaab, puab pum paa tawg nchu auv nab rua sau ntuj, ua rua puab tau kev twg, rua qhov cov tubrog Yixalayees kws tsiv rua tom taj suabpuam tig rov lug tua puab.

²¹Thaus Yausuas hab cov tubrog kws nrug nwg pum nwg lwm paab tubrog txeeb tau lub nroog A-is hab tis suavtawg hlawv lawm, puab txawm tig rov lug tua cov tubrog A-is.

²²Cov tubrog Yixalayees kws moog txeeb hab hlawv lub nroog tawm lug paab tua hab. Cov tubrog A-is pum has tas cov tubrog Yixalayees vij puab taag lawm, cov tubrog Yixalayees muab cov tubrog A-is tua tuag taag tsi muaj ib tug dlim le,

²³tsuas yog tseg tug vaajntxwv kws kaav lub nroog A-is xwb. Puab nteg tau nwg hab coj moog cuag Yausuas.

²⁴Cov tubrog Yixalayees tua cov tubrog A-is kws tuaj caum puab tuag taag rua tom taj suabpuam, ces puab rov lug rua huv lub nroog, hab muab cov tuabneeg kws nyob huv nroog tua tuag taag huv tuabsi.

²⁵Yausuas tseem tuav rawv nwg raab muv tsaa rua lub nroog A-is moog txug thaus puab tua txhua tug tuag taag huv tuabsi. Nub ntawd cov tuabneeg huv lub nroog A-is, tsi has quaspuj, txivneej kws raug tua tuag muaj kaum ob txheeb leej.

²⁷Cov Yixalayees tseg tej khoom tseemceeb hab tej tsaj kws puab txeeb tau huv lub nroog ca lawv le tug TSWV tau has rua Yausuas lawm.

²⁸Yausuas hlawv lub nroog A-is kub nyab ua moov tshauv taag. Hab nwg tseem zoo le ntawd lug txug naj nub nua.

²⁹Yausuas muab tug vaajntxwv kws kaav lub nroog A-is dlai rua ntawd ib tug ntoo moog txug thaus yuav tsaus ntuj. Thaus lub nub yuav poob qho, Yausuas has kuas nwg cov tubrog moog muab vaajntxwv lub cev txu lug hab coj moog pov rua tim ncauj ke roojvaag nroog, puab khaws pobzeb lug teeb rua sau nwg ua ib pawg luj luj; pawg pobzeb ntawd tseem nyob lug txug naj nub nua.

³⁰Yausuas teeb ib lub thaaj rua sau lub roob Enpales rua tug TSWV kws yog cov Yixalayees tug Vaajtswv.

³¹Yausuas ua lub thaaj ntawd zoo ib yaam le tug qauv kws tug TSWV tug tubkhai Mauxes qha tseg rua cov Yixalayees hab lawv le Mauxes txuj Kevcai kws has tseg tas: “Lub thaaj kws muab pobzeb ua tsi xob muab txaug hlau txaug”. Puab hlawv khoom theej txhoj rua sau lub thaaj hab muab khoom hlawv fij ua kev sis raug zoo rua tug TSWV.

³²Thaus ntawd Yausuas sau Vaajtswv txuj Kevcai kws Mauxes tub xub sau tseg lawm rua sau cov txag zeb taabmeeg cov Yixalayees.

³³Cov Yixalayees, puab cov thawjcoj, cov numtswv, cov txav txim, hab lwm tsaav tuabneeg kws nrug puab nyob, puavleej tuaj sawv ntawm tug TSWV lub Phijxaab ob saab, tig xubndlag rua cov povthawj kws kwv lub Phijxaab. Cov tuabneeg ib nraab tig nrausqaum rua lub Roob Khelixemes, hab ib nraab tig nrausqaum rua lub Roob Enpales. Tug TSWV tug tubkhai Mauxes has kuas cov Yixalayees ua le ntawd lub sijhawm kws puab tuaj txais koob moov.

³⁴Yausuas nyeem tug TSWV txuj Kevcai hab nyeem tej lug foom koob moov hab tej lug foom tsi zoo lawv le tub sau ca rua huv phoo ntawv kws teev txuj Kevcai lawm.

³⁵Txhua nqai Kevcai kws Mauxes sau tseg, Yausuas muab lug nyeem rua suavdlawg noog, tsi has quaspuj mivnyuas hab lwm tsaav tuabneeg kws nrug puab nyob.