Read Hmong Njua Yausuas 9 Bible Online

Yausuas 9 - Hmong Njua bible

Yausuas 9

¹Qhov kws cov Yixalayees muaj yeej ntawd nrov nchaa moog txug cov vaajntxwv kws nyob ntawm tug dlej Yauladees saab nubpoob, tsi has sau tej laaj roob, tej taw roob, tej taj nraag hab lawv ntug Havtxwv Meditelanees moog rua peg Lenpanoos. Cov vaajntxwv nuav yog cov kws kaav cov Hitis. cov Amaules, cov Kana-aas, cov Pelixes, cov Hivis hab cov Yenpus.

²Cov vaajntxwv nuav koom ua ke tuaj tua Yausuas hab cov Yixalayees.

³Tabsis cov Nkinpe-oos kws yog cov Hivis, nov tej kws Yausuas tua yeej lub nroog Yelikaus hab lub nroog A-is,

⁴ces cov Nkinpe-oos txawm tuav tswvyim tuaj dlaag Yausuas. Puab muab tej khoom noj ntim rua huv tej naab kws qub qub hab to qhov lawm, hab muab cawv txiv maab ntim rua huv cov naab tawv qub qub nog rua puab cov neeg luav thauj tuaj.

⁵Puab naav tej rig tsho hab rau tej khau ndluag ndluag kws tub zoo muab povtseg lawm xwb, hab tej ncuav kws puab coj tuaj tub qhuav hab tuaj pwm taag lawm.

⁶Puab tuaj rua huv lub yeej kws nyob ntawm Nkilenkas, puab has rua Yausuas hab cov Yixalayees has tas, “Peb taug kev dleb heev tuaj, peb xaav tuaj nrug mej sis coglug.”

⁷Tabsis cov Yixalayees teb has tas, “Vim le caag peb txhaj yuav nrug mej sis coglug?, tej zag mej nyob ibncig ze ntawm nuav xwb.”

⁸Puab has rua Yausuas has tas, “Peb txaus sab ua koj cov tubqhe.” Yausuas nug puab has tas, “Mej yog leejtwg hab mej tuaj qhov twg tuaj?”

⁹Puab has rua Yausuas has tas: “Peb tuaj lub tebchaws kws dleb heev tuaj, rua qhov peb tau nov txug tug TSWV kws yog mej tug Vaajtswv hab txhua yaam txujci kws nwg tau ua nraag tebchaws Iziv,

¹⁰hab tej kws nwg tau ua rua ob tug vaajntxwv kws kaav cov Amaules kws nyob tim tug dlej Yauladees saab nubtuaj kws yog Vaajntxwv Xihoos kws kaav lub nroog Hesenpoos hab Vaajntxwv Aunkas kws nyob huv lub nroog kws Asetalus kaav huv tebchaws Npasaas.

¹¹Peb cov thawjcoj hab cov pejxeem kws nyob huv peb lub tebchaws kuas peb npaaj mivntsiv khoom noj khoom haus taug kev tuaj cuag koj ua koj qhev hab thov nrug koj sis coglug.

¹²Thaus peb sawv kev tuaj peb tej ncuav tseem suv, tabsis koj saib, tub qhuav hab tuaj pwm taag.

¹³Thaus peb ntim kua txiv maab rua huv cov naab tawv nuav, cov naab tseem tshab, tabsis koj saib! Tej naab to taag, peb tej rig tsho hab khau los ndluag taag vim peb taug kev dleb heev tuaj.”

¹⁴Cov Yixalayees txawm txais cov khoom kws cov tuabneeg nuav coj tuaj qee yaam, tabsis puab tsi nug tug TSWV le.

¹⁵Yausuas pum zoo nrug cov Nkinpe-oos cog phoojywg hab ca puab nrug cov Yixalayees nyob. Cov Yixalayees tej thawjcoj txawm coglug has tas, puab yuav ceev tej lug cog tseg ntawd.

¹⁶Tom qaab kws coglug taag tau peb nub, cov Yixalayees maam le paub has tas cov tuabneeg ntawd nyob ibncig ze ntawm puab xwb.

¹⁷Cov Yixalayees moog peb nub xwb, puab txawm moog txug cov nroog kws cov tuabneeg ntawd nyob: cov nroog ntawd yog lub nroog Nkinpe-oos, lub nroog Khefilas, lub nroog Npeluthas, hab lub nroog Kili-as Ye-alees.

¹⁸Tabsis cov Yixalayees tsi tua puab, rua qhov cov thawjcoj tub tuav tug TSWV kws yog cov Yixalayees tug Vaajtswv lub npe nrug cov tuabneeg ntawd sis coglug lawm. Cov Yixalayees txhaj le ywg puab cov thawjcoj,

¹⁹tabsis cov thawjcoj teb has tas, “Peb tub tuav tug TSWV kws yog cov Yixalayees tug Vaajtswv lub npe nrug puab coglug lawm, nwgnuav peb tua tsi tau puab cov ntawd.

²⁰Peb yuavtsum ca puab nrug peb nyob vim tej lug kws peb cog tseg rua puab, yog peb tsi ca puab nyob, Vaajtswv yuav rau txim rua peb.

²¹Peb tseg puab nyob, tabsis ca puab moog txav tawg hab nqaa dlej rua peb.” Cov Yixalayees tej thawjcoj pum zoo ua le ntawd.

²²Yausuas tso tuabneeg moog coj cov Nkinpe-oos tuaj cuag nwg. Yausuas nug puab has tas, “Vim le caag mej tuaj dlaag peb has tas, mej yog tuabneeg nyob dleb heev tuaj? Tabsis mej nyob ibncig ntawm nuav xwb?

²³Vim mej dlaag le ntawd, Vaajtswv txhaj rau txim rua mej. Mej cov tuabneeg yuav ua qhev txav tawg hab nqaa dlej rua huv kuv tug Vaajtswv lub Tuamtsev moog le.”

²⁴Puab teb has tas, “Qhov kws peb ua le nuav vim peb paub has tas, tug TSWV kws yog mej tug Vaajtswv tau has rua nwg tug tubkhai Mauxes has tas nwg yuav muab taagnrho lub tebchaws Kana-aas nuav rua mej, hab mej yuav tua cov tuabneeg kws nyob huv lub tebchaws nuav kuas tuag taag huv tuabsi ib yaam le mej tau ua taag lug lawm. Peb dlaag mej le ntawd, vim peb ntshai mej heev, peb ua neej nyob ntshai quas rwg xwb.

²⁵Nwgnuav peb nyob huv mej xibteg lawm, mej yuav ua le caag rua peb los nyob ntawm mej pum zoo.”

²⁶Yog le ntawd, Yausuas txhaj tsi pub kuas cov Yixalayees tua puab,

²⁷tabsis txij nub ntawd moog cov Nkinpe-oos ua qhev txav tawg hab nqaa dlej rua cov Yixalayees hab rua tug TSWV lub thaaj. Puab tseem ua qhev le ntawd rua huv tug TSWV lub Tuamtsev lug txug naj nub nua.