Read Hmong Njua 2 Thexalaunikes 2 Bible Online

2 Thexalaunikes 2 - Hmong Njua bible

2 Thexalaunikes 2

¹Cov Kwvtij, qhov kws peb tug Tswv Yexus yuav rov lug hab qhov kws nwg yuav coj peb suavdlawg moog nrug nwg nyob, kuv thov qha rua mej has tas,

²mej tsi xob rawm poob sab lossis ntxhuv sab rua qhov kws mej nov has tas, tub txug lub sijhawm kws Yexus lug lawm. Tej zag ntshai muaj tej tug qha txug tej kws yuav tshwm muaj lug yaav tom ntej rua mej lossis muaj tej tug qha has le ntawd lossis muaj tej tug has tas, yog peb sau has le ntawd rua huv peb tej ntawv kws peb xaa tuaj rua mej los tsi paub.

³Txawm yog le caag los xij, mej tsi xob ca leejtwg ntxag tau mej le. Rua qhov thaus tseem tsi tau txug Nub kws tug Tswv Yexus rov qaab lug, yuav muaj tuabneeg sau nthwv tuaj tawmtsaam Vaajtswv zag kawg, hab suavdlawg yuav pum tug kws ua phem ntawd lug. Tug ntawd yog tug kws yuav raug kev puamtsuaj.

⁴Nwg yuav tawmtsaam txhua yaam kws tuabneeg pe, hab tej kws tuabneeg hu ua vaajtswv. Nwg yuav khaav has tas nwg yog tug kws muaj fwjchim luj dlua ndlais tej ntawd huv tuabsi. Tsi yog le ntawd xwb, nwg tseem yuav moog nyob huv lub Tuamtsev, hab qha suavdlawg has tas nwg yog vaajtswv ntaag.

⁵Mej tsi ncu qaab lawm los? Thaus kuv tseem nrug mej nyob, kuv tub qha tej ntawd rua mej lawm.

⁶Tabsis naj nub nwgnuav muaj ib yaam txwv tsi pub kuas tej ntawd tav. Mej tub paub yaam ntawd lawm. Thaus txug lub sijhawm ntawd suavdlawg yuav pum tug kws ua phem ntawd.

⁷Txujkev phem kev qas kws suavdlawg tsi paub, nwgnuav tub pib muaj lawm. Tabsis yuav tsi muaj tej ntawd moog txug thaus tug kws txwv raug ntab tawm moog, maam le muaj lug.

⁸Thaus tug kws txwv raug ntab tawm moog lawm, suavdlawg yuav pum tug kws ua phem ntawd. Hab thaus tug kws ua phem ntawd lug lawm, tug Tswv Yexus yuav tshuab paa tua tug ntawd povtseg. Thaus nwg pum dlheev Yexus hab Yexus lub fwjchim kws ci ntsaa ab, ces taamsim ntawd, nwg yuav puamtsuaj moog.

⁹Dlaab Ntxwgnyoog yuav khaiv tug kws ua phem ntawd lug, hab pub fwjchim rua nwg kuas nwg ua tau ntau yaam txujci txawv txawv. Hab nwg yuav ua tej yaam kws ua rua suavdlawg xaav tsi thoob le, tabsis tej ntawd puavleej tsi tseeb.

¹⁰Nwg yuav ua ntau yaam kev phem ntxag cov tuabneeg kws yeej yuav raug puamtsuaj moog. cov tuabneeg ntawd yuav raug puamtsuaj, rua qhov puab tsi kaam noog hab tsi nyam txujlug tseeb kws yuav paab tau kuas puab dlim puab lub txim.

¹¹Tub yog le ntawd Vaajtswv txhaj ca txujkev dlaag ntxag lug tshoov puab lub sab kuas puab ntseeg tej kws tsi tseeb.

¹²Yog le ntawd, Vaajtswv yuav rau txim rua txhua tug kws nyam ua phem hab tsi ntseeg txujlug tseeb.

¹³Cov kwvtij kws tug Tswv hlub, peb naj nub ua Vaajtswv tsaug, rua qhov Vaajtswv tub xaiv mej lug ua cov kws xub tau txais kev cawm dlim lug ntawd Vaaj Ntsujplig lub fwjchim hab ua kuas mej ua tau tsaav tuabneeg kws dlawbhuv, vim qhov kws mej ntseeg qhov tseeb.

¹⁴Thaus peb qha Txujmoo Zoo rua mej, Vaajtswv hu mej lug ntseeg, kuas mej dlim mej lub txim. Mej txhaj yuav tau peb tug Tswv Yexus Khetos tug tshwjchim kws ci ntsaa ab lug ua mej tug.

¹⁵Yog le ntawd cov kwvtij, mej yuavtsum muab sab rau ntseeg tsi xob tso tseg. Hab mej yuavtsum khaws tej lug kws peb tub qha rua mej lawm ca, tsi has tej kws peb qha mej thaus peb tseem nrug mej nyob, hab tej kws peb sau rua huv ntawv, mej yuavtsum khaws tej ntawd huv tuabsi.

¹⁶Thov peb tug Tswv Yexus Khetos hab Vaajtswv tug kws yog peb leej Txiv tug kws hlub peb, hab txhawb peb tug zug, kuas peb muaj kev ca sab moog le,

¹⁷nwg yuav nplig mej lub sab hab txhawb mej tug zug, kuas mej ua tau txhua yaam zoo, tsi has tej num kws mej ua hab tej lug kws mej has.