Read Hmong Njua 2 Thexalaunikes 3 Bible Online

2 Thexalaunikes 3 - Hmong Njua bible

2 Thexalaunikes 3

¹Cov kwvtij, thov mej naj nub thov Vaajtswv paab peb, kuas peb muab sab rau qha Vaajtswv txujlug. Vaajtswv txujlug txhaj yuav nrov nchaa moog thoob plawg txhua qhov chaw, hab muaj nqes rua suavdlawg ib yaam le tub muaj nqes rua huv mej lawm.

²Hab thov Vaajtswv paab kuas peb dlim ntawm cov tuabneeg sab phem hab limham txhais teg, rua qhov yeej yuav muaj ibtxha tsi ntseeg Vaajtswv txujlug.

³Tabsis Vaajtswv yog tug kws ncaaj nceeg, nwg yuav txhawb mej tug zug hab tsi pub dlaab Ntxwgnyoog ua phem rua mej.

⁴Vaajtswv tub qha rua peb paub lawm has tas, mej taabtom ua lawv le tej kws peb tau qha rua mej lawm, hab mej tseem yuav naj nub ua le ntawd moog lawm yaav tom ntej.

⁵Thov Vaajtswv qha mej lub sab kuas mej paub noog Vaajtswv lug, hab paab kuas mej ua tau sab ntev ib yaam le Yexus Khetos tau ua qha rua mej lawm.

⁶Cov kwvtij, peb tuav peb tug Tswv Yexus Khetos lub npe saamfwm rua mej has tas, mej tsi xob moog nrug cov tuabneeg tubnkeeg ua ke. Puab cov ntawd tsi ua lawv le tej lug kws peb qha rua mej lawm.

⁷Mej suavdlawg puavleej paub has tas, yeej tsimnyog mej ua lawv le mej tau pum peb ua lug lawm, thaus peb tseem nrug mej nyob los peb yeej tsi tubnkeeg le.

⁸Peb tsi tog leejtwg yug peb, tabsis peb naj nub naj mo siv zug ua num. Peb ua le ntawd kuas mej cov txhaj tsi muaj ib tug ntxhuv sab rua peb.

⁹Qhov kws peb ua le ntawd tsi yog peb tsi muaj cai has kuas mej yug peb, tabsis yog peb ua yaam ntxwv qha rua mej, kuas mej paub ua le peb ua.

¹⁰Thaus peb tseem nrug mej nyob, peb qha rua mej has tas, yog leejtwg tsi kaam ua num, mej tsi xob pub mov rua tug ntawd noj.

¹¹Peb has le nuav, rua qhov peb nov has tas mej cov muaj qee leej tubnkeeg, nyob dlawb xwb, tsi ua ib yaam num dlaabtsi le. Tsi yog le ntawd xwb, puab tseem pheej moog taabkaum lwm tug teg num hab.

¹²Peb tuav peb tug Tswv Yexus Khetos lub npe saamfwm rua cov tuabneeg tubnkeeg ntawd kuas puab yuavtsum ua num yug puab, puab tsi xob tog luas noj xwb.

¹³Cov kwvtij, mej tsi xob dlhuav ua tej num zoo.

¹⁴Yog mej cov muaj leejtwg tsi noog tej lug kws peb sau rua huv tsaab ntawv nuav, ces mej tsi xob moog nrug tug ntawd ua ke, kuas nwg paub txaajmuag rua tej kws nwg tau ua lug lawm.

¹⁵Tabsis mej tsi xob ntxub nwg, mej yuavtsum ntuag nwg ib yaam le mej ntuag mej tej kwvtij.

¹⁶Thov tug Tswv kws yog lub hauvpaug ntawm txujkev kaaj sab, pub kuas mej muaj kev kaaj sab txhua lub sijhawm hab txhua qhov kws mej moog. Thov tug Tswv nrug nraim mej suavdlawg nyob.

¹⁷Kuv yog Paulus, tsaab ntawv nuav yog kuv txhais teg sau tuaj rua mej ntaag. Kuv suam kuv lub npe rua txhua tsaab ntawv kws kuv xaa tuaj rua mej.

¹⁸Thov peb tug Tswv Yexus Khetos foom koob moov rua mej suavdlawg.